(ភ្នំពេញ)៖ តារាសម្ដែងល្បីខាងក្បាច់គុណ និងបានអភិវឌ្ឍខ្លួន ក្លាយជាអ្នកដឹកនាំ សម្ដែងរឿងវ័យក្មេង លោក សុខ ដែន ថ្មីៗនេះ លោកបានបញ្ចេញខ្សែសាច់រឿងខ្លីមួយ បែបអប់រំ ដែលមានចំណងជើងថា «វិប្បដិសារី» ដើម្បីធ្វើការប្រកួតប្រជែង ក្នុងកម្មវិធីមហោស្រពភាពយន្តខ្នាតខ្លីថ្នាក់ជាតិលើកទី២ ដោយទទួលបានការចាប់អារម្មណ៍ បើទោះបីជារឿងនេះ ពុំទទួលបានជយលាភីក្ដី។ យ៉ាងណាមិញ ទោះបីជាវីដេអូអប់រំខ្លី របស់លោក សុខ ដែន ដែលមានចំណងជើងថា «វិប្បដិសារី» មិនទទួលបានពានរង្វាន់ក្ដី តែគេក៏នៅតែសង្កេតឃើញថា វីដេអូមួយនេះ បង្កប់ទៅដោយអត្ថន័យអប់រំខ្ពស់ ដែលធ្វើឲ្យមានការគាំទ្រខ្លាំង។
ជាការពិត រឿង «វិប្បដិសារី» និយាយពីជីវិតបុរសក្រីក្រម្នាក់ ដែលទទួលបានការមើលងាយ ស្អប់ខ្ពើម និងមិនឲ្យតម្លៃ ពីសំណាក់មនុស្សមួយចំនួន ថាជាក្មេងបាតសង្គម ទាំងដែលបុរសក្រីក្រម្នាក់នោះជាមនុស្សល្អ ចេះជួយទុក្ខធុរៈអ្នកដទៃ។ ចុងក្រោយនៃសាច់រឿងទាំងមូល បញ្ចប់ទៅដោយការសោកស្ដាយ និងមានវិប្បដិសារី ចំពោះការបាត់បង់បុរសម្នាក់នោះ។
តម្លៃអប់រំក្នុងសាច់រឿងមួយនេះ គឺចង់សម្ដៅលើមនុស្ស សូមកុំឆាប់វាយតម្លៃមនុស្ស ត្រឹមតែសំបកក្រៅ ជាពិសេសនោះ គឺត្រូវគិតឲ្យច្បាស់មុននឹង សម្រេចចិត្តធ្វើអ្វីមួយ កុំឲ្យមានវិប្បដិសារីនៅថ្ងៃក្រោយ។ ចុងក្រោយនៃ សាច់រឿងទាំងមូល ត្រូវបានបញ្ចប់ទៅដោយការសោកស្ដាយ និងការមានវិប្បសារី ពេញមួយជីវិត ព្រោះតែការគិតខុសរបស់មនុស្ស និងការសន្និដ្ឋានខុស៕
