(ភ្នំពេញ)៖ សម្រាប់ទិសដៅក្នុងការអភិវឌ្ឍន៍របស់ក្លឹប ក្នុងការបោះជំហានទៅរកភាពអាជីពពិតប្រាកដ ការអភិវឌ្ឍន៍យុវជនគឺជាទិសដៅអទិភាពមួយ ក្នុងចំណោមផែនការអភិវឌ្ឍន៍ធំៗមួយចំនួនទៀត ដូច្នេះតាមរយៈសមិទ្ធផលរបស់លោកគ្រូ ហៅ សុជាតិ កន្លងមក ក្លឹបប្រាកដណាស់ លោកនឹងសម្រេចបានលទ្ធផលល្អក្នុងការបង្កើតធនធានកីឡាករល្អៗជាច្រើន មកកាន់ឈុតធំក្នុងឆ្នាំជាបន្ដបន្ទាប់។
អ្វីដែលសំខាន់ផងនោះសម្រាប់ លោកគ្រូ ហៅ សុជាតិ ដែលជាគ្រូបង្គោលរបស់យើង នឹងត្រូវតំឡើងទៅជានាយកបច្ចេកទេសគ្រប់គ្រង និងអភិវឌ្ឍន៍យុវជនរបស់ក្លឹប ចាប់ពីរដូវកាលក្រោយតទៅ។
គួដឹងដែរថា នេះក៏ជាពេលវេលាដ៏សមរម្យមួយសម្រាប់លោកគ្រូហៅ សុជាតិ ដែលអនុញ្ញាតិឲ្យលោកមានពេលវេលាគ្រប់គ្រាន់ ក្នុងការបន្ដការសិក្សាផ្នែកគ្រូបង្វឹកកម្រិតខ្ពស់ ដែលលោកខកខានកាលពីឆ្នាំមុន អំឡុងពេលដែលមមាញឹកក្នុងការដឹកនាំក្រុមឈុតធំរបស់យើង ឲ្យទទួលបានលទ្ធផលគួរជាទីគាប់ចិត្ត។
សូមបញ្ជាក់ផងដែរថា លោក ហៅ សុជាតិ បានសាងជូនក្លឹប ក្នុងពេលដឹកនាំក្រុមធំកន្លងមក ដោយជួយឱ្យពួកយើងគ្រងជើងឯកលីគ រដូវកាល ២០១៧ ក៏ដូចជាជើងឯកពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៣ ឆ្នាំ២០១៩ ថ្មីៗនេះថែមទៀតផង៕
