(ភ្នំពេញ)៖ មហោស្រពភាពយន្តជាតិលើកទី៦ ត្រូវបានបើកសម្ពោធយ៉ាងអធឹកអធម នៅសាលមហោស្រពចតុមុខ កាលពីល្ងាចថ្ងៃទី២៥ វិច្ឆិកា ក្នុងឆ្នាំ២០១៩ ដោយមានវត្តមានផលិតករ និងសិល្បករ-សិល្បការិនី ជាច្រើនចូលរួម។ ក្នុងនោះមានភាពយន្តល្បីៗចំនួន១៨រឿង ត្រូវបានដាក់ឲ្យចូលរួមប្រកួតប្រជែង ក្នុងព្រឹត្តិការណ៍ប្រចាំឆ្នាំដ៏ធំមួយនេះ ដើម្បីឲ្យស្នាដៃភាពយន្តខ្មែរ កាន់តែមានភាពល្បីល្បាញ ទាំងនៅលើឆាកជាតិ និងអន្តរជាតិ។
អ្នកតំណាងកម្មវិធីបានថ្លែងប្រាប់ថា នៅក្នុងមហោស្រពឆ្នាំនេះ មានភាពយន្តខ្មែរ ដែលត្រូវបានជ្រើសរើស ឲ្យចូលរួមប្រកួតប្រជែងមានចំនួន១៨រឿង ដោយសុទ្ធតែភាពយន្ត ដែលទទួលបានការគាំទ្រច្រើន នាពេលកន្លងមក។ កម្មវិធីនេះក៏នឹងស្វែងរកភាពយន្ត ដែលល្អផ្ដាច់គេប្រចាំឆ្នាំ តួសម្ដែងឆ្នើម និងចំណាត់ថ្នាក់ជាច្រើនផ្សេងទៀត ដើម្បីលើកកម្ពស់ភាពយន្តខ្មែរ និងតារាសម្ដែងខ្មែរ។ ការប្រកាសលទ្ធផល នឹងត្រូវធ្វើឡើងនៅថ្ងៃទី២៩ វិច្ឆិកា ខណៈដែលការវាយតម្លៃ ក៏មានការចូលរួមផ្ដល់ពិន្ទុពីសំណាក់ អ្នកជំនាញល្បីៗក្នុងស្រុក ផ្នែកផលិតភាពយន្ត។
កម្មវិធីនេះដែរ ក៏មានតារាសិល្បៈយ៉ាងច្រើនកុះករ ត្រូវបានអញ្ជើញឲ្យចូលរួម ដោយក្នុងនោះផលិតករបរទេស ក៏មានវត្តមានផងដែរ។ សិល្បករគ្រួសារតារាកម្ពុជា មិនតិចជាង២០នាក់នោះទេ បានបង្ហាញខ្លួនចូលរួម ជាមួយនឹងការរំលេចក្រមាខ្មែរ ជាអត្ថសញ្ញាណក្រុម។ សិល្បករម្នាក់ៗ ទទូចឲ្យមានការគាំទ្រភាពយន្តខ្មែរ មិនថាដាក់បង្ហាញក្នុងការប្រកួត មហោស្រពភាពយន្តនេះ មិនថាដាក់បញ្ចាំងនៅតាមរោងកុន។ មន្ត្រីអ្នកជំនាញក៏អះអាងថា មហោស្រពភាពយន្តឆ្នាំនេះ មានការផុលផុសជាងមុនៗ បើទោះជារឿងថ្មីៗ ចូលរួមប្រកួតប្រជែង មិនសូវមានច្រើនយ៉ាងណាក្ដី៕