(ភ្នំពេញ)៖ ការប្រកួតបាល់ទាត់លក្ខណៈមិត្តភាព ជាមួយក្រុមពាណិជ្ជករចិន កាលពីយប់ថ្ងៃទី២៦ ខែវិច្ឆិកា ឆ្នាំ២០១៩ ក្រុមតារាបាល់ទាត់មហាហង្ស ដែលជាក្រុមពាក់កណ្ដាលអាជីពពីតារាជាច្រើនដួង បានធ្វើឲ្យអ្នកគាំទ្រចាប់អារម្មណ៍ខ្លាំង ដោយបានបំបាក់ក្រុមពាណិជ្ជករចិន ក្នុងលទ្ធផល៧-០ ក្នុងការប្រកួត២វគ្គពេញ។ ក្នុងតារាចម្រៀងកំពុងពេញនិយម លោក ខេម រកបាន១គ្រាប់ ដើម្បីជួយដល់ក្រុមឈ្នះ កាន់តែច្រើន។
តារាចម្រៀង ខេម បានប្រាប់ឲ្យដឹងថា លោករីករាយដែលក្រុមតារាមហាហង្ស អាចរកគ្រាប់បាល់បានច្រើន។ ក្រោមការខិតខំរួមកម្លាំងគ្នា អ្វីក៏អាចសម្រេចបាន។ ក្រៅពីជួយដល់សុខភាព យើងបានរិះរកតិចនិចល្អៗបន្តទៀត ដើម្បីឲ្យក្រុមឈានឡើង។ កីឡាបាល់ទាត់លោកពិតជាស្រឡាញ់ តាំងពីមិនទាន់ក្លាយជាអ្នកសិល្បៈមកម្ល៉េះ។
បើតាមការលើកឡើងរបស់លោក អ៊ិន សុភិន បានឲ្យដឹងថា នេះជាមោទនភាពរបស់យើង ទោះនេះជាការប្រកួត២ភាគី តែក៏ជាសញ្ញាមួយដកបទពិសោធន៍ថ្មីៗទៀត។ លោកអរគុណដល់ក្រុមតារាមហាហង្ស ដែលសហការគ្នា នាំជោគជ័យ សំខាន់រឹតចំណងមិត្តភាពកម្ពុជា-ចិន ក្រៅពីសុខភាព។
លោកបន្តថា ជាការពិត ការប្រកួតនេះ លេចសញ្ញាវិជ្ជមានយ៉ាងខ្លាំង លើភាគីខាងក្រុមបាល់ទាត់មហាហង្ស ដោយបានសហការសាមគ្គីគ្នាយ៉ាងល្អ ផ្តួលដៃគូប្រកួត។ លោកសង្កេតឃើញថា នៅវគ្គទី១ តារាមហាហង្សទាត់ចូល៤គ្រាប់ នាំមុខខាងភាគីក្រុមពាណិជ្ជករចិន។ ក្រោយសម្រាកចូលដល់វគ្គទី២ ឃើញថា លំនឹង និងជំហរនៃការរក្សាបាល់ទាត់របស់ក្រុមខ្មែរ នៅតែគ្របលើចិន ដោយស្មារតីទទួលខុសត្រូវខ្ពស់ដដែល។
នៅទីបំផុត មហាហង្សបានទាត់ចូល ស៊ី៣គ្រាប់ទៀត ដោយចប់ការប្រកួតឃើញថា មហាហង្សនាំមុខខាងពាណិជ្ជករចិន ៧ទល់នឹង០ ហើយចាត់ទុកថា ជាលទ្ធផលដ៏ពិសេសមួយ សម្រាប់ក្រុមទាំងមូល៕
