(ភ្នំពេញ)៖ ផលិតករល្បីឈ្មោះ លោក លៀក លីដា បានថ្លែងអះអាងថា ក្រោយរឿង «នាឡិកាដាស់វិញ្ញាណ» ចាក់បញ្ចាំងចប់រួចរាល់ នៅក្នុងប្រទេសថៃ និងឡាវ ជាពិសេសនៅតាមបណ្ដាប្រទេសនានា ក្នុងតំបន់អាស៊ីអាគ្នេយ៍ លោកសង្ឃឹមយ៉ាងមុតមាំថា ភាពយន្តខ្មែរ នឹងកាន់តែមានទីផ្សារទូលំទូលាយជាងមុន ហើយនឹងមានផលិតករខ្មែរជាច្រើនទៀត បង្ហាញស្នាដៃជាបន្តបន្ទាប់លើទីផ្សារអន្តរជាតិ។
ចាងហ្វាងផលិតកម្ម LD Picture រូបនេះ បានបន្ថែមឱ្យដឹងថា ស្នាដៃដំបូងរបស់ខ្លួន ដែលចំណាយទុនផលិតមិនធ្លាប់មាន នឹងក្លាយជាស្នាដៃមួយបើកផ្លូវ សម្រាប់ភាពយន្តខ្មែរ ធ្វើឲ្យបរទេសទទួលស្គាល់ ពីការផលិតភាពយន្តខ្មែរ នាពេលបច្ចុប្បន្ន។ «យើងមិនសូវរំពឹងថា នឹងទទួលបានជោគជ័យខ្លាំងទេ សម្រាប់ស្នាដៃមួយនេះ។ តែយើងសង្ឃឹមថា នេះជាស្នាដៃមួយធ្វើឲ្យបរទេសទទួលស្គាល់ថា យើងពិតជាមានសមត្ថភាព ផលិតរឿងប្រកបដោយស្តង់ដារ មិនចាញ់ពួកគេនោះទេ»។
ដោយឡែក ក្រឡេកមើលក្នុងផេក Major Group នៅប្រទេសថៃណោះវិញ គ្រាន់តែផុសរូបភាពមួយសន្លឹក ដោយភ្ជាប់អត្តន័យនៃសាច់រឿងនេះ គឺទទួលការកោតសរសើរ និងមានអ្នកចែករំលែករាប់ពាន់នាក់ ជាបន្តបន្ទាប់ក្នុងប្រទេសថៃ។ នេះគឺជាសញ្ញាមួយបញ្ជាក់ពីកម្រិតគុណភាព ភាពយន្តរបស់ខ្មែរដែលអាចចូលទីផ្សារអន្តរជាតិ ដោយមានការទទួលស្គាល់ព្រមទាំងឱ្យតម្លៃ ពីសំណាក់ប្រទេសជិតខាត។
ខណៈកំពុងទទួលការគាំទ្រ ពីទស្សនិកជនក្នុងប្រទេសកម្ពុជា ភាពយន្តកម្រិតស្តង់ដាររឿង «នាឡិកាដាស់វិញ្ញាណ» របស់ផលិតកម្ម LD Picture ផ្ដើមបញ្ចេញថ្ងៃបញ្ចាំងច្បាស់លាស់ហើយ នៅប្រទេសថៃ និងឡាវ ដោយចាប់ផ្ដើមពីថ្ងៃ ២៦ ខែធ្នូ ចុងឆ្នាំ២០១៩នេះតទៅ។
កំពុងបញ្ចាំងតាមរោងភាពយន្តនានា ក្នុងប្រទេសកម្ពុជា បានទទួលការសាទរ និងគាំទ្រជាខ្លាំងពីទស្សនិកជនទាំងសាច់រឿង និងការសម្ដែងរបស់តួអង្គនីមួយៗ។ ក្នុងនោះអ្នកគាំទ្រជាច្រើន បានបញ្ចេញទស្សនៈផ្សេងៗគ្នា ដោយលើកសរសើរថា នេះគឺជាភាពយន្តមួយប្រកបដោយស្តង់ដារ និងមានគុណភាពធ្វើឲ្យអ្នកទស្សនាពេញចិត្ត។
ក្រៅតែពីការកំណត់ថ្ងៃច្បាស់លាស់ ការបញ្ចាំងនៅថៃ និងឡាវ រឿង «នាឡិកាដាស់វិញ្ញាណ» ក៏ត្រៀមបង្ហាញកាលបរិច្ឆេទបញ្ចាំង នៅប្រទេសផ្សេងៗទៀតដូចជា ភូមា វៀតណាម ម៉ាឡេស៊ី និងឥណ្ឌូណេស៊ីជាដើម ក្នុងពេលឆាប់ៗខាងមុខនេះ៕
