(ភ្នំពេញ)៖ ថ្មីៗនេះ អតីតបេក្ខភាព «The Voice Kids Cambodia» រដូវកាលទី១ អ៊ុក សុវណ្ណារី បានធ្វើឲ្យទស្សនិកជន មានការចាប់អារម្មណ៍យ៉ាងខ្លាំង ខណៈដែលស្ងាត់ៗ តារាចម្រៀងស្រីវ័យក្មេងរូបនេះ បានចេញនូវបទចម្រៀងជាលើកដំបូង ក្នុងផលិតកម្ម Galaxy ខណៈដែលបទថ្មីទីមួយរបស់នាង មានចំណងជើងថា «ខ្ញុំក្លាយជាអ្នកជំងឺស្នេហា»។ យ៉ាងណាមិញ បទនេះគឺជាការបញ្ចេញស្នាដៃនិពន្ធថ្មី​ របស់កវីនិពន្ធល្បីឈ្មោះ គឺលោក យឹម តាស្រង់ ដើម្បីឲ្យនាងមានឱកាស វាយលុកទីផ្សារចម្រៀង ដែលកំពុងតែពោរពេញ ដោយការប្រកួតប្រជែងនេះ។

តាមរយៈបទចម្រៀងមួយបទនេះ​ ត្រូវបានអ្នកនិពន្ធលោក យឹម តាស្រង់ ​លើកឡើងឲ្យដឹងថា ចាប់តាំងពីលោក មានវត្តមានចូលរួមផលិត ក៏ដូចជានិពន្ធ នូវបទចម្រៀងនៅក្នុងផលិតកម្ម​ Galaxy កវីរូបនេះ បានមានស្នាដៃនិពន្ធបទចម្រៀង ទើបតែបានប៉ុន្មានបទតែប៉ុណ្ណោះ។ ដោយឡែកស្នាដៃចម្រៀងថ្មី «ខ្ញុំក្លាយជាអ្នកជំងឺស្នេហា» គឺជាបទចម្រៀងមួយបទ ដែលពោរពេញទៅដោយអត្ថន័យ ឈឺចាប់ក្នុងរឿងស្នេហា​ជ្រាលជ្រៅ។ មួយវិញទៀតបទនេះ ជាបទថ្មីសម្រាប់យុវតី អ៊ុក សុវណ្ណារី ​ដែលលោកខិតខំសម្រិតសម្រាំងឡើង យ៉ាងពិសេសទាំងទំនុកច្រៀង និងអត្ថន័យ។

យ៉ាងណាមិញ បទ «ខ្ញុំក្លាយជាអ្នកជំងឺស្នេហា» ដែលជាចម្រៀងដំបូង​របស់ អ៊ុក សុវណ្ណារី ​រៀបរាប់ពីការបាត់បង់ និងឈឺចាប់ក្នុងរឿងស្នេហា​មួយនេះ ត្រូវបានគេសង្កេតឃើញថា មានការគាំទ្រពីសំណាក់ទស្សនិកជន ពោលគឺមានអ្នកចូលទស្សនាច្រើន​ដង ពេលបង្ហោះបានប៉ុន្មានថ្ងៃប៉ុណ្ណោះ៕