(ភ្នំពេញ)៖ ដើម្បីវប្បធម៌ខ្មែរ ក្រុមការងារល្ខោនខោល និងអ្នករៀបចំព្រឹត្តិការណ៍ «រាត្រីចងចាំ» ពិតជាមិនខ្លាចឡើយ ពាក្យថានឿយហត់ គឺខំហាត់សមទាំងយប់ថ្ងៃ និងរៀបចំឲ្យកាន់តែល្អ អស់ពីកំលាំងកាយចិត្ត សម្រាប់ត្រៀមសម្តែងចែកជូនភ្ញៀវទេសចរណ៍ជាតិ និងអន្តរជាតិ បានទស្សនា។
ព្រឹត្តិការណ៍ «រាត្រីចងចាំ» ត្រូវបានរៀបចំឡើងដោយក្រសួងវប្បធម៌ និងវិចិត្រសិល្បៈ ដែលនឹងចាប់ផ្តើមនៅថ្ងៃទី២៨ ខែវិច្ឆិកា ឆ្នាំ២០១៩នេះ ចាប់ពីវេលាម៉ោង ៦៖០០ល្ងាចតទៅ។ ព្រឹត្តិការណ៍ «រាត្រីចងចាំ» ធ្វើឡើងនៅទីលានជល់ដំរី នៃក្រុងសៀមរាប ដើម្បីរំលឹកដល់ថ្ងៃដែលល្ខោនខោលកម្ពុជា ចូលជាសម្បត្តិបេតិកភណ្ឌវប្បធម៌អរូបីនៃមនុស្សជាតិ។
លោកស្រី ភឿង សកុណា រដ្ឋមន្ត្រីក្រសួងវប្បធម៌ បានមានប្រសាសន៍ទៅកាន់ប្រព័ន្ធផ្សព្វផ្សាយក្នុងស្រុកថា ព្រឹត្តិការណ៍សិល្បៈនេះ គឺមានការសម្តែងល្ខោនខោលទ្រង់ទ្រាយធំ និងមានគោលដៅចង់ឲ្យសាធារណជនជាតិ និងអន្តរជាតិ បានឃើញ បានស្គាល់កាន់តែច្បាស់អំពីកិត្យានុភាពនៃវប្បធម៌ជាតិខ្មែរ ខណៈដែលល្ខោនខោលខ្មែរ ត្រូវបានទទួលស្គាល់ដោយអង្គការ UNESCO អស់រយៈពេល១ឆ្នាំមកហើយ។
សូមសាធារណៈជនជាតិ និងអន្តរជាតិ ចូលរួមទស្សនាដោយសេរី ជាមួយនឹងការសម្តែងទស្សនីយភាពដ៏អស្ចារ្យរបស់ខ្មែរ នៅទឹកដីសៀមរាបអង្គរនៅថ្ងៃនេះ ចាប់ពីវេលាម៉ោង ៦៖០០ តទៅ៕