(ភ្នំពេញ)៖ ផលិតកម្ម Galaxy Navatra បានបញ្ចេញស្នាដៃភាពយន្តលើកទី២របស់ខ្លួន មានចំណងជើងថា «កុំងាកក្រោយ» ដែលជាភាពយន្តបែបភ័យរន្ធត់តក់ស្លុត ព្រឺព្រួច ក្រោមការដឹកនាំសម្ដែងដោយផលិតករវ័យក្មេង លោក ចាន់ណា រ៉ូណាន់។ ស្របពេលជាមួយនឹងការបញ្ចេញស្នាដៃលើកទី២នេះ ផលិតកម្ម Galaxy Navatra នឹងប្រកាសបញ្ចាំងទូទាំងប្រទេសព្រមគ្នាតែម្ដង ដើម្បីឆ្លើយតបនឹងការចង់តាមដានទស្សនា របស់ទស្សនិកជន។
លោក យឹម តាស្រង់ អ្នកគ្រប់គ្រងទូទៅក្នុងផលិតកម្ម Galaxy Navatra បានថ្លែងប្រាប់ថា ភាពយន្តរឿង «កុំងាកក្រោយ» នឹងចាក់បញ្ចាំងគ្រប់រោងភាពយន្តព្រមគ្នា នៅថ្ងៃទី២៦ ខែធ្នូ ឆ្នាំ២០១៩ នេះ ហើយមិនត្រឹមតែអ្នកភ្នំពេញទេ ដែលបានទស្សនា ពោលគឺរោងភាពយន្តតាមខេត្តដូចជាខេត្ត បាត់ដំបង-សៀមរាប-ព្រះសីហនុ-បន្ទាយមានជ័យ-ប៉ោយប៉ែត-តំបន់អ្នកលឿង-ស្វាយរៀង និងខេត្ត កំពង់ចាម ក៏អាចទស្សនាព្រមៗគ្នាដែរ។
យ៉ាងណាមិញ លោកទទូចដល់មហាជនទាំងអស់ ចូលរួមទស្សនាឲ្យបានច្រើនកុះករ ដើម្បីជួយលើកស្ទួយភាពយន្តខ្មែរ នឹងជាការផ្ដល់នូវកម្លាំងចិត្តយ៉ាងធំធេង ដល់ផលិតករ ក្នុងការផលិតភាពយន្ត ដាក់បញ្ចាំងលើទីផ្សារ នៅលើកក្រោយៗបន្តទៀត៕