(ភ្នំពេញ)៖ ក្រុមហ៊ុន Master Pharma Group Ltd ដែលជាក្រុមហ៊ុននាំចូល និងចែកចាយឱសថក្នុងប្រទេសកម្ពុជា តាំងពីឆ្នាំ១៩៩៤ និងបានសហការនាំចូលផ្តាច់មុខ ពីរោងចក្រ Akums Drug and Pharmaceuticals Limited បានបើកសិក្ខាសាលាផ្សព្វផ្សាយលើប្រធានបទ «ជំងឺទឹកនោមផ្អែម លើសឈាម និងជំងឺធាត់» នៅសណ្ឋាគារណាហ្គាវើល១ នៅល្ងាចថ្ងៃទី ១២ ខែធ្នូ ឆ្នាំ២០១៩នេះ ជាមួយអ្នកជំនាញក្នុងវិស័យសុខាភិបាលជាង ៣០០នាក់ រួមទាំងឱសថការី និងវេជ្ជបណ្ឌិត។
លោក រ៉ាំង សិរីវ៉ាត់ ប្រធានផ្នែកលក់ និងទីផ្សារ នៃក្រុមហ៊ុន Master Pharma Group Ltd បាននិយាយថា ជំងឺទឹកនោមផ្អែម លើសឈាម និងជំងឺធាត់ ដែលបង្កឲ្យកើតមានដូចជា គាំងបេះដូង សំពាធឈាមខ្ពស់ កើតជំងឺមហារីក និងជំងឺថប់ដង្ហើមជាដើម អាចកើតមានឡើងចំពោះមនុស្សគ្រប់វ័យ ជាពិសេសអ្នកមានវ័យកណ្តាល ដែលរបៀបរបប នៃការរស់នៅមិនត្រឹមត្រូវ គេងមិនគ្រប់គ្រាន់ ខ្វះលំហាត់ប្រាណ ញុំាគ្រឿងស្រវឹងជាដើម។
លោកបន្តថា ទោះបីជាយ៉ាងណាក៏ដោយ ជំងឺទាំងនេះក៏មានវិធីទប់ស្កាត់ផងដែរ តាមរយៈការផ្តោតទៅលើរបបអាហារ និងការរស់នៅ រួមមានដូចជាការធ្វើលំហាត់ប្រាណ គេង ដើរ រត់ ឈរ អង្គុយ ការសម្មាធិ ពិសារអាហារដែលមានជីវជាតិ និងការកាត់បន្ថយ ការសេពគ្រឿងស្រវឹង និងជក់បារីជាដើម។
Akums Drugs & Pharmaceutical គឺជារោងចក្រផលិតឱសថធំបំផុត នៅប្រទេសឥណ្ទា ដែលចុះកិច្ចសន្យារាល់ការផលិត ផលិតផលសម្រេចនៃឱសថ វត្ថុធាតុដើម គ្រឿងសំអាង ឱសថបុរាណ និងឱសថប្រភេទអរម៉ូន។ មកទល់ពេលនេះ ខាងរោងចក្របានផ្គត់ផ្គង់ ទៅលើការប្រើប្រាស់ និងផលិតឱសថ ច្រើនជាង១២% នៃតម្រូវការសរុបក្នុងប្រទេសឥណ្ទា និងក្រុមហ៊ុនថ្នាំពេទ្យល្បីល្បាញនានា និង MNCs។
Unosource Pharma ជាក្រុមហ៊ុនបុត្រសម័្ពន្ធនាំចេញរបស់ Akums Drugs & Pharmaceutical ដែលមានឱសថលើសពី ១៣០០មុខ បានចុះបញ្ជិកានៅក្នុង ៥៥ប្រទេស និងទទួលស្គាល់ពីក្រសួងសុខាភិបាល រួមមាន អាស៊ីអាគ្នេយ៍ អាហ្វ្រិក CIS និង អាមេរិកឡាទីន។ Unosource Pharma បានធ្វើការផ្គត់ផ្គង់ឱសថ ក្នុងគុណភាពខ្ពស់រួមផ្សំនឹងតម្លៃសមរម្យ ដែលអាចទទួលយកបាន នៅក្នុងទីផ្សារប្រកួតប្រជែងនានា ពេលបច្ចុប្បន្ននៅក្នុងពិភពលោក។
យ៉ាងណាមិញ Unosource Pharma បានធ្វើការផ្គត់ផ្គង់ ១០០ផលិតផលជាង នៅក្នុងប្រទេសកម្ពុជា ហើយគិតមកដល់ពេលនេះ គឺវាមានរយៈពេល ៤ឆ្នាំមកហើយ សម្រាប់គម្រោងការផ្គត់ផ្គង់នាពេលអនាគត ដែលក្រុមហ៊ុននឹងនាំចូលនូវឱសថនានាបន្ថែមទៀត មានតម្រូវការ ដើម្បីឲ្យសមស្របនៅក្នុងទីផ្សារប្រទេសកម្ពុជា៕