(សេអ៊ូល)៖ តារាស្រីសមាជិកក្រុម Red Velvet កញ្ញា Wendy បច្ចុប្បន្ននេះកំពុងរងរបួសធ្ងន់ ដោយសារតែកាលពីម្សិលមិញ នាងជួបហេតុការណ៍ធ្លាក់ពីលើឆាក ពេលកំពុងហាត់សម សម្រាប់សម្តែងក្នុងព្រឹត្តិការណ៍តន្ត្រី ចុងឆ្នាំរបស់ទូរទស្សន៍ SBS។ រហូតមកទល់នឹងពេលនេះ អ្នកគាំទ្រសម្តែងនូវការព្រួយបារម្ភចំពោះនាងគ្រប់គ្នា និងសង្ឃឹមថា នាងនឹងប្រសើរឡើងឆាប់ៗ។ នេះបើតាមការចេញផ្សាយពីសារព័ត៌មាន Koreaboo នៅថ្ងៃទី២៦ ខែធ្នូ ឆ្នាំ២០១៩។
អ្នកគាំទ្រមានការអន់ចិត្ត ចំពោះផលិតកម្ម SM ចំពោះស្ថានការណ៍អសុវត្ថិភាពនេះ។ ពួកគេក៏មានការខឹងសម្បារផងដែរ ចំពោះទូរទស្សន៍ SBS ដែលនៅតែចាក់ផ្សាយសកម្មភាពថតទុកមុន របស់ Red Velvet។
យ៉ាងណាមិញ ផលិតកម្ម SM បានបញ្ចេញសេចក្ដីថ្លែងការណ៍ជុំវិញរបួសរបស់ Wendy និងបានបញ្ជាក់ថា Red Velvet មិនអាចសម្ដែងកម្មវិធីចុងឆ្នាំ របស់ទូរទស្សន៍ SBS Gayo Daejeon ឆ្នាំ ២០១៩ បាននោះទេ។ បន្ថែមពីនេះ SM បានប្រាប់សារព័ត៌មានថា អំឡុងការហាត់សមសម្រាប់ការសម្ដែងផ្ទាល់ខ្លួន របស់នាង Wendy បានធ្លាក់ពីលើឆាក និងរងរបួស។
ផលិតកម្មបានបន្តថា Wendy ត្រូវបាននាំទៅមន្ទីរពេទ្យភ្លាមៗ ដើម្បីទទួលការពិនិត្យ និងព្យាបាលពីក្រុមគ្រូពេជ្រឲ្យល្អិតល្អន់ ហើយនាងត្រូវរបួសចំមុខ បាក់ឆ្អឹងត្រគាក និងកដៃ នៅផ្នែកខាងស្ដាំនៃដងខ្លួន។ នាងបានឆ្លងកាត់ការព្យាបាលជាបន្ទាន់ ហើយពេលនេះកំពុងរង់ចាំការពិនិត្យបន្ថែម៕