(ភ្នំពេញ)៖ តារាចម្រៀងកំពុងកាក់កបខ្លាំងលើមុខជំនួញ កញ្ញា ម៉ូលីកា បច្ចុប្បន្នស្រីស្អាតសម្រស់ប្រៀបបាននឹងបុប្ផារូបនេះ ទោះបីជាមិនសូវបង្ហាញវត្តមានក្នុងសិល្បៈដូចមុន ដោយយកពេលទៅពង្រឹងមុខជំនួញក្ដី តែនាងនៅតែត្រូវទទួលបានការគាំទ្រ ពីទស្សនិកជន។ យ៉ាងណាមិញ ក្រៅពីជោគជ័យលើជំនួញហើយនោះ កញ្ញា ម៉ូលីកា ក៏ជោគជ័យខ្លាំងលើរឿងស្នេហា ដោយជារឿយគេតែងសសង្កេតឃើញស្រីស្អាតរូបនេះ បណ្ដើរគូស្នេហ៍ដើរលេងនៅទីកន្លែងកម្សាន្តនានា។ អ្វីដែលកាន់តែធ្វើឲ្យទស្សនិកជន ចាប់អារម្មណ៍ខ្លាំងទៀតនោះគឺ ក្រោយទាក់ទងគ្នាប្រមាណជាង៣ឆ្នាំ ពេលនេះស្រាប់តែ ម៉ូលីកា ត្រៀមដឹកដៃអនាគតស្វាមីខ្លួន ចូលរោងការនៅដើមឆ្នាំ២០២០ខាងមុខនេះ។
ជាការពិតណា អតីតតារាចម្រៀងនៅក្នុងផលិតកម្មរ៉ុក កញ្ញា ម៉ូលីកា ដែលសព្វថ្ងៃ ជាអ្នកលក់ផលិតផលថែរក្សាសម្រស់ ដែលមានប្រជាប្រិយភាពនោះ គ្រោងនឹងដឹកដៃគូស្នេហ៍ចូលរោងការ នៅក្នុងក្នុងថ្ងៃទី ១៨ ខែមករា ឆ្នាំ ២០១៩ នេះ។ បើយោងតាមប្រភពជិតស្និទ្ធ នឹងតារាចម្រៀងរូបនេះ បានបង្ហើបឲ្យដឹងថា មង្គលការរបស់ស្រីស្អាតរូបនេះ គ្រោងចំណាយទឹកប្រាក់ប្រមាណជា ១៥ ម៉ឺនដុល្លារ ឯណោះដើម្បីធ្វើឲ្យកម្មវិធី កាន់តែមានភាពលេចធ្លោ។
ប្រភពជិតស្និទ្ធនឹងតារាចម្រៀង ម៉ូលីកា បានបង្ហើបបន្ថែមថា ពិធីមង្គលការរបស់នាង នឹងរៀបចំនៅឌឹព្រីមៀរសែនសុខ ដែលនឹងមានរៀបចំពិធីយ៉ាងអធិកអធម ដោយចំណាយថវិកា ប្រមាណជា១៥ម៉ឺនដុល្លារ ដើម្បីរៀបចំ និងគ្រោងហៅភ្ញៀវកិត្តិយសយ៉ាងច្រើន ក៏ដូចជាមិត្តអ្នកសិល្បៈផងដែរ។
ចំពោះដំណឹងនេះ បានធ្វើឲ្យទស្សនិកជន ជាពិសេសអ្នកគាំទ្រ បានចូលរួមអបអរសាទរ ក៏ដូចជាពាក្យពេចន៍ជូនពរដល់កញ្ញា ម៉ូលីកា និងអនាគតស្វាមី ឲ្យមានក្ដីសុខសុភមង្គល៕