(ភ្នំពេញ)៖ បទចម្រៀងក្ដៅៗរបស់តារាចម្រៀង ស៊ូ ស៊ីរីកា ក្រោមចំណងជើងថា «គ្មានអ្នកណាចាប់អារម្មណ៍ខ្ញុំទេ» មិនត្រឹមតែទទួលបានការចាប់អារម្មណ៍ នៅប៉ុន្មានថ្ងៃនេះបុណ្ណោះទេ ប៉ុន្តែក៏មានអត្ថន័យចាក់ដោត និងធ្វើស៊ីអារម្មណ៍អ្នកគ្មានគូៗ មិនណយដែរ ក្នុងពេលដែលអំឡុងចុងឆ្នាំ គឺអ្នកណាៗ ក៏ចង់មានគ្នា និងចង់ស្វីតៗ ហើយមានអ្នក Take Care នោះដែរ។ មួយបទ «គ្មានអ្នកណាចាប់អារម្មណ៍ខ្ញុំទេ» របស់នាង ក៏ជួយឲ្យតារាស្រីរូបនេះ ទទួលការចាប់អារម្មណ៍ នៅមិនដំណាច់ឆ្នាំនេះ ផងដែរ។
តាមការកត់សម្គាល់ បទចម្រៀង «គ្មានអ្នកណាចាប់អារម្មណ៍ខ្ញុំទេ» របស់ ស៊ូ ស៊ីរីកា ត្រូវគេឮចាក់បន្លឺនៅតាមហាង និងទីសារធារណៈនាប៉ុន្មានថ្ងៃនេះ ដោយអ្នកស្ដាប់ភាគច្រើនសុទ្ធតែយល់ថា មួយបទនេះទាំងពីរោះនិងមានអត្ថន័យចាក់ដោត ជាពិសេសគឺបទមួយនេះ ហាក់ធ្វើស៊ីអារម្មណ៍អ្នកឯកោ នៅពេលមនុស្សគូភាគច្រើន សុទ្ធតែបង្អួតគម្រោងដើរលម្ហែកាយស្វីតៗ មុនថ្ងៃឆ្លងឆ្នាំ និងឆ្លងឆ្នាំ។
ទឹកដមសំឡេងរបស់ ស៊ូ ស៊ីរីកា នៅក្នុងបទនេះ ក៏ស្ដាប់ទៅប្លែកត្រចៀកខុសពីបទមុនៗ ទើបគ្រាន់តែចេញ MV មិនទាន់បានប៉ុន្មាន ក៏ទទួលបានការគាំទ្រតែម្ដង។ ជាក់ស្ដែងក្រឡេកទៅមើលសង្គមហ្វេសប៊ុក និងយូធូប ក៏មានការចែកចាយបទនេះ គួរឲ្យកត់សម្គាល់ផងដែរ បន្ថែមពីលើការចាក់បន្លឺ ដែលគេបានឮនៅតាមទីសាធារណៈ៕