(ភ្នំពេញ)៖ ភាពយន្តដែលបង្ហាញពីប្រវត្តិឈឺចាប់ របស់ប្រជាពលរដ្ឋខ្មែរ ក្នុងរបបដ៏ខ្មៅងងឹត ៣ឆ្នាំ៨ខែ២០ថ្ងៃ (របបខ្មែរក្រហម) មានចំណងជើងថា «ឃ្លាតទៅសែនឆ្ងាយ» ត្រូវបានជ្រើសរើសយកមកបញ្ចាំងឡើងវិញ នៅក្នុងស្ថានីយទូរទស្សន៍ CTN ចំថ្ងៃខួបលើកទី៤១ ឆ្នាំ ថ្ងៃរំដោះ៧មករា ដោយក្នុងនោះទស្សនិកជន អាចចូលរួមឆ្លើយសំណួរ បញ្ចេញមតិយោបល់ ដែលទាក់ទងនឹងសាច់រឿង និងបង្ហាញអារម្មណ៍ពិតរបស់ខ្លួន ចំពោះអ្នកដែលបានឆ្លងកាត់របបដ៏ឈឺចាប់មួយនេះ។
ខ្សែភាពយន្តរឿង «ឃ្លាតទៅសែនឆ្ងាយ» គឺជាភាពយន្តឆ្លុះបញ្ចាំងពីប្រវត្តិសាស្រ្តខ្មែរ គឺដើម្បីឲ្យកូនខ្មែរទាំងអស់ គ្រប់ស្រទាប់ យល់ដឹងកាន់តែច្បាស់ពី «របបប្រល័យពូជសាសន៍ខ្មែរក្រហម» ។ កូនខ្មែរទាំងអស់ ត្រូវតែរៀនសូត្រ ពីប្រវត្តិសាស្រ្តរបស់ខ្លួន ជាពិសេសគឺការធ្វើពលិកម្មរបស់ម្ដាយ ឪពុក ជីដូន ជីតា ដើម្បីថែរក្សាជីវិតកូន ដែលនេះជាប្រធានបទមួយ អប់រំកុលបុត្រ កុលធីតា។
ប្រវត្តិសាស្រ្តដ៏ជូរចត់ នៃអតីតកាលខ្មែរ ក្រោមរបបប្រល័យពូជសាសន៍ ខ្មែរក្រហម ត្រូវបានអ្នកដឹកនាំសម្ដែងរឿងសង្ឃឹមថា ខ្មែរទាំងអស់ ជាពិសេសយុវវ័យ និងសិស្សានុសិស្ស គួរគប្បី ត្រូវតែរៀនសូត្រ ហើយត្រូវតែយកប្រវត្តិសាស្ត្រដ៏ជូរចត់មួយនេះ ដើម្បីធ្វើជាការអភិវឌ្ឍខ្លួន និងកសាងប្រទេស ឲ្យមានសុខសន្តិភាពជារៀងរហូត មិនឲ្យធ្លាក់ទៅក្នុងវិនាសកម្មនោះ សារជាថ្មីនោះទេ។ ភាពយន្ត «ឃ្លាតទៅសែនឆ្ងាយ» ដឹកនាំសម្ដែងដោយលោក លោក ឆាយ បូរ៉ា អតីតប្រធានសមាគមភាពយន្តកម្ពុជា។
សូមបញ្ជាក់ថា ចំពោះទស្សនិកជន ដែលមិនទាន់បានទស្សនាភាពយន្ត «ឃ្លាតទៅសែនឆ្ងាយ» ទស្សនិកជនអាចទស្សនាបានតាមរយៈ Facebook Active ដែលនឹងធ្វើការ Live នៅលើ Facebook MYTV នៅថ្ងៃទី០៤ ខែមករា ឆ្នាំ២០២០ ខាងមុខនេះ។ ភាពយន្តរឿង «ឃ្លាតទៅសែនឆ្ងាយ» នឹងមានផ្សាយជូនទស្សនា នៅលើកញ្ចក់ទូរទស្សន៍ CTN នៅថ្ងៃអង្គារ ទី០៧ ខែមករា ឆ្នាំ២០២០ វេលាម៉ោង៧៖០០នាទីយប់៕
