(ភ្នំពេញ)៖ កូនសិស្សសិល្បៈរបស់លោក ស៊ីន ច័ន្ទឆាយ៉ា គឺតារាចម្រៀង ម៉ា ច័ន្ទបញ្ញា បានព្រលយនូវពាក្យក្នុងចិត្តរបស់ខ្លួន ឲ្យមហាជនបានដឹងថា ការឲ្យតម្លៃជាអធិរាជសំឡេងមាស ស៊ីន ស៊ីសាមុត គឺមានតែនៅលើបបូរមាត់ប៉ុណ្ណោះ ខណៈដែលចាប់តាំងពីលោក ស៊ីន ស៊ីសាមុត ទទួលមរណភាពក្នុងឆ្នាំ១៩៧៦ មក គ្រួសារនេះបានជួបប្រទះនូវការខ្វះខាត ខ្វះការយកចិត្តទុកដាក់ និងមានជីវភាពខ្សត់ខ្សោយ រហូតដល់ចៅរបស់លោក ស៊ីន ស៊ីសាមុត គឺលោក ស៊ីន សេដ្ឋាកុល ទទួលមរណភាពបន្តទៀត ក៏នៅតែដដែល។ និយាយរួមគឺបានន័យថា ក្រុមគ្រួសារនេះ មិនសូវទទួលបានការយកចិត្តទុកដាក់ រហូតដល់ទៅ៣ជំនាន់មកហើយ ពោលគឺមិនសមនឹងកេរ្តិ៍ឈ្មោះជា «អធិរាជសំឡេងមាស» នោះឡើយ។
តារាចម្រៀងលោក ម៉ា ច័ន្ទបញ្ញា ដែលត្រូវបានគេស្គាល់ថា ជាសិស្សរបស់លោក ស៊ីន ច័ន្ទឆាយ៉ា បានបង្ហាញនូវអារម្មណ៍ផ្ទាល់ខ្លួន បន្ទាប់ពីមរណភាពរបស់លោក ស៊ីន សេដ្ឋាកុល ថា «នេះគឺជាគ្រួសារអធិរាជសំឡេង មាស ស៊ីន ស៊ីសាមុត (Sin Sisamouth) ដែលមានមនុស្សមួយចំនួនធំ (ក៏មានអ្នកគួរឲ្យគោរពជាច្រើនតែងជួយពួកគាត់ដែរ) តែងតែស្រឡាញ់ គោរពយកចិត្តទុកដាក់ ចាត់ទុកគាត់ជា Idol រហូតមានអ្នកខ្លះក្លាយជាអ្នកមានបាន ដោយសារបទចម្រៀងរបស់លោក ក៏ប៉ុន្តែមរណភាព ភាពកម្សត់របស់គ្រួសារលោក បែរជាមិនត្រូវបានមនុស្សមួយចំនួនធំ យកចិត្តទុកដាក់ជាមួយពួកគាត់ ជិត៣ជំនាន់ហើយ។ កាលពីលោកគ្រូរបស់ខ្ញុំ ស៊ីន ច័ន្ទឆាយ៉ា នៅមានព្រះជន្ម គាត់បានលួចខ្សិបខ្ញុំថា បើថ្ងៃណាមួយបញ្ញាបានជោគជ័យហើយ ធ្វើជាគំរូ កុំភ្លេចគ្រួសារ បងប្អូនខ្លួនឯង ពិសេសលោកគ្រូធំ ព្រោះពួកគេនេះហើយ ដែលជនជាតិខ្មែរយើងមួយចំនួន តែងតែនិយាយតែមាត់ តែមិនសូវឲ្យតម្លៃ»។
លោកបន្តថា «ជាអកុសល ខ្ញុំមិនទាន់បានជួយដល់លោកគ្រូដិតដល់ផង លោកគ្រូ និងបងប្រុស ដែលជាអ្នកស្នងត្រកូលលោកតា បានលាចាកលោកទាំងអភ័ព្ទ (ជំងឺបេះដូង ជំងឺលើសឈាម ជំងឺដែលកើតចេញពីភាពខូចចិត្ត ដើម្បីជីវភាព ភាពអស់សង្ឃឹមដែលលាក់ជ្រៅនៅខាងក្នុង)។ ល្ងាចចប់ការងារភ្លាម ខ្ញុំបានចំណាយពេលវេលាបន្តិចបន្ទួច របស់ខ្ញុំទៅចូលបុណ្យ លើកទឹកចិត្ត និងបង្ហាញពីជំហរខ្លះៗតាមបណ្ដាំលោកគ្រូ នៅឆ្នាំថ្មីនេះ ឃើញថា មិនសូវមានសិល្បករណាច្រើន បានមកចូលរួមពិធីនោះទេ។ ឃើញតែគ្រួសារដ៏សោកសៅ ដែលមានលោកយាយជាភរិយាកម្សត់ របស់លោកតា ស៊ីន ស៊ីសាមុត តែប៉ុណ្ណោះ»។
លោកបន្ថែមទៀតថា «ជាគ្រួសារលោកគ្រូធំផ្នែកសិល្បៈទាំងមូល ព្រោះតែគ្នាគ្មានខ្សែ មិនសូវចេះ Protocol ស្ថានភាពក៏ចេះតែដុនដាប អស់ពីលោកគ្រូឆាយា នៅគៀកដឹងរឿង មកដល់បង កុល អ្នករង់ចាំដំណឹង ពេលនេះបន្ទុកទាំងមូលធ្លាក់ដល់ កូនស្រីពៅ។ គាត់បាននិយាយទាំងទប់ទឹកភ្នែកពីជំហរ និងក្ដីសង្ឃឹមដ៏សោកសៅប្រាប់ខ្ញុំ។ ចាត់ទុកជាការអំពាវនាវ (មិនហ៊ានអញ្ជើញ ព្រោះខ្លាច «គេ» ប្រកាន់ សូមមេត្តាបងៗព័ត៌មានជួយនាំដំណឹងនេះ ដល់បងប្អូនសិល្បៈ អ្នកគាំទ្រទាំងឡាយបានដឹង «បន្ថែមទៀត» ផង។ សូមមេត្តា!»។
យ៉ាងណាមិញ ដើម្បីជួយដល់គ្រួសារលោក ស៊ីន ស៊ីសាមុត លោក ម៉ា ច័ន្ទបញ្ញា បានបញ្ជាក់ជំហថា «សូមអធ្យាស្រ័យផង នៅឆ្នាំថ្មីនេះ ខ្ញុំនឹងព្យាយាមធ្វើការបរិច្ចាគ រាល់ការអញ្ជើញទាំងឡាយណា ពីអ្នកគាំទ្រខ្ញុំឲ្យច្រៀងបទពីសង្គម ៣០% ទៅ ៤០%ទុកជាគំរូ ជូនគ្រួសារលោកគ្រូខ្ញុំ ដែលពីមុន ខ្ញុំបាទមិនងាយទទួលការសម្ដែងចម្រៀង បទពីសង្គមបែបនេះទេ ព្រោះមិនចង់យកបទមរតកដើមមករកកម្រៃ ហើយនឹងព្យាយាមជួយរៀបចំការិយាល័យ ស៊ីន ស៊ីសាមុត ឡើងវិញ តាមលទ្ធភាព ជូនគ្រួសារលោក។ (បើមានអ្នកឧបត្ថម្ភល្អ ខ្ញុំនឹងព្យាយាមចាត់ទុកពេញ១០០%ដល់គ្រួសារលោក)»។
គួរបញ្ជាក់ថា ចៅប្រុសបង្កើតរបស់អធិរាជសំឡេងមាស លោក ស៊ីន ស៊ីសាមុត គឺលោក ស៊ីន សេដ្ឋាកុល បានទទួលមរណភាព កាលពីថ្ងៃទី ៣០ ខែធ្នូ ឆ្នាំ២០១៩ ដោយសារជំងឺ ដាច់សរសៃឈាមខួរក្បាល ក្នុងវ័យ៣៧ឆ្នាំ ដោយពិធីបុណ្យសព បានប្រព្រឹត្តធ្វើនៅឯវត្តចាក់អង្រែក្រោម ខណៈដែលគេសង្កេតឃើញមាន អ្នកសិល្បៈតិចតួចបំផុតចូលរួម ធ្វើឲ្យកម្មវិធីបុណ្យមួយនេះ ហាក់មានភាពស្ងាតជ្រងំ។ ម្យ៉ាងវិញទៀត មហាជនទូទាំងប្រទេស ស្ទើរតែគ្មានអ្នកបានដឹងផងថា ជាមរណភាពរបស់ចៅប្រុសអធិរាជសំឡេងមាស លោក ស៊ីន ស៊ីសាមុត៕