(ភ្នំពេញ)៖ តើនរណាខ្លះ នៅមិនទាន់បានទស្សនា ខ្សែភាពយន្តរឿង «ឃ្លាតទៅសែនឆ្ងាយ»? ភាពយន្តដែលបង្ហាញពីប្រវត្តិឈឺចាប់ របស់ប្រជាពលរដ្ឋខ្មែរ ក្នុងរបបដ៏ខ្មៅងងឹត ៣ឆ្នាំ៨ខែ២០ថ្ងៃ (របបខ្មែរក្រហម) នៅតែអាចធ្វើឲ្យទស្សនិកជន សម្រក់ទឹកភ្នែកដដែល ជាពិសេសទស្សនិកជន ដែលធ្លាប់ឆ្លងកាត់នូវរបបវាលពិឃាដ ដ៏យង់ឃ្មងមួយនេះ ព្រោះតែភាពឈឺចាប់ ព្រាត់ប្រាស់បងប្អូន បែបបាក់គ្រួសារគ្មានថ្ងៃបំភ្លេចបាន។
បើទោះជាខ្សែភាពយន្តមួយនេះ បានចាក់បញ្ចាំងអស់រយៈពេលច្រើនឆ្នាំក៏ពិតមែន ប៉ុន្តែខ្សែភាពយន្តនេះ នៅតែអាចទាញអារម្មណ៍ទស្សនិកជន ឲ្យចង់ទស្សនាម្តងហើយម្តងទៀត ទោះដឹងថា នៅពេលកំពុងទស្សនាខ្សែភាពយន្តមួយនេះហើយ ត្រូវហូរទឹកភ្នែកដោយមិនដឹងខ្លួនក៏ដោយ។
ភាពយន្ត «ឃ្លាតទៅសែនឆ្ងាយ» ត្រូវបានជ្រើសរើសយកមកបញ្ចាំងឡើងវិញ នៅក្នុងស្ថានីយទូរទស្សន៍ CTN ចំថ្ងៃខួបលើកទី៤១ ឆ្នាំ ថ្ងៃរំដោះ៧មករា ដោយក្នុងនោះទស្សនិកជន អាចចូលរួមឆ្លើយសំណួរ បញ្ចេញមតិយោបល់ ដែលទាក់ទងនឹងសាច់រឿង និងបង្ហាញអារម្មណ៍ពិតរបស់ខ្លួន ចំពោះអ្នកដែលបានឆ្លងកាត់របបដ៏ឈឺចាប់មួយនេះ។ ជាភាពយន្តឆ្លុះបញ្ចាំងពីប្រវត្តិសាស្រ្តខ្មែរ គឺដើម្បីឲ្យកូនខ្មែរទាំងអស់ គ្រប់ស្រទាប់ យល់ដឹងកាន់តែច្បាស់ពី «របបប្រល័យពូជសាសន៍ខ្មែរក្រហម»។
សូមបញ្ជាក់ថា ចំពោះទស្សនិកជន ដែលមិនទាន់បានទស្សនាភាពយន្ត «ឃ្លាតទៅសែនឆ្ងាយ» នឹងមានផ្សាយជូនទស្សនា នៅលើកញ្ចក់ទូរទស្សន៍ CTN នៅថ្ងៃអង្គារ ទី០៧ ខែមករា ឆ្នាំ២០២០ វេលាម៉ោង៧៖០០នាទីយប់៕