(ភ្នំពេញ)៖ លោក វង្ស ពិសិដ្ឋ ផលិតករ បានថ្លែងឲ្យដឹងក្នុងពិធីបើកសម្ពោធបញ្ចាំង ភាពយន្តរឿង «គ្រូប៊ីអាយជី» នាថ្ងៃទី០៦ ខែមករា ឆ្នាំ២០២០នេះថា ភាពយន្តមួយនេះ នឹងកំណត់ដាក់បញ្ចាំងគ្រប់រោងនៅថ្ងៃទី០៩ ខែមករា ឆ្នាំ២០២០ ដោយថវិកាចំណេញពីការលក់សំបុត្រ២០ភាគរយ នឹងបរិច្ចាគជូនមន្ទីរពេទ្យគន្ធបុប្ផា និងជូនមូលនិធិចាស់ជរា របស់សមាគមលោក ហេង ឡុង។ ការសម្រេចចិត្តរបស់ក្រុមការងារទាំងមូលនោះ គឺដោយសារតែលោកចង់ឲ្យស្នាដៃដែលប្រឹងផលិតបាន គឺជារឿងរបស់មហាជនទាំងមូល ដែលមានន័យថា តម្លៃសំបុត្ររបស់មហាជន នឹងក្លាយជាប្រយោជន៍របស់សង្គម២០ភាគរយ។ លោកក៏ទទូចឲ្យចូលរួមគាំទ្រភាពយន្តខ្មែរមួយនេះ ឲ្យបានច្រើន ដើម្បីលើកទឹកចិត្តផលិតករ និងបានរួមចំណែកជួយសង្គម។
ជាការពិតផលិតករល្បីឈ្មោះលោក វង្ស ពិសិដ្ឋ ប្រឡូកក្នុងការងារជាអ្នកដឹកនាំ សម្ដែងអស់ច្រើនឆ្នាំ បានសម្រេចចិត្តចាប់ដៃជាមួយ លោក ម៉ារ៉ា ប៊ុណ្ណា ចេញផលិតភាពយន្ត ដោយខ្លួនឯងតែម្ដង ក្នុងរឿង «គ្រូប៊ីអាយជី»។ នេះជាភាពយន្តខ្នាតធំ ដែលគេមើលឃើញថា គឺជាការបញ្ចេញក្បាច់គុន ដែលលោកធ្លាប់តែផលិតរឿងឲ្យគេ មកផលិតស្នាដៃជារបស់ខ្លួន ដែលមិនខុសពីការប្រមូលវិជ្ជាគុនបង្អួត និងលើកស្ទួយដល់វិស័យភាពយន្ត។
លោក ម៉ារ៉ា ប៊ុណ្ណា ដែលជាដៃគូសហការ និងជាតារាចម្រៀងល្បីមួយរូបផង បានថ្លែងថា រឿង «គ្រូប៊ីអាយជី» គឺជារឿងដែលលោកចំណាយដើមទុនផលិត ក្រោមការចាប់ដៃជាមួយម្ចាស់ផលិតកម្មជាដៃគូ គឺលោក វង្ស ពិសិដ្ឋ និងក្រុមការងារផ្សេងទៀត តាំងពីរង្វង់១ឆ្នាំមុនមកម្ល៉េះ ប៉ុន្តែមកពីភាពយន្តនេះ សម្រិតសម្រាំងច្រើន ដោយមានប្លង់ខ្លះត្រូវថតឡើងវិញ និងកែកុនបច្ចេកទេសជាច្រើន នៅពេលយល់ថាខ្វះខាត ដើម្បីឲ្យភាពយន្តនេះមានទាំងស្ដង់ដារពេញលេញ។ លោកថាមួយរឿងនេះ លោកប្រាកដចិត្តខ្ពស់ទាំងគុណភាពរឿងទាំងប្លង់ ទាំងសំឡេង ដែលលោកធានាថា គឺមានស្ដង់ដាប្រកួតប្រជែងគ្រប់គ្រាន់។ ក្នុងនោះវត្តមានប្រមូលផ្ដុំគ្នាសុទ្ធតែតារាល្បីៗរួមមាន អ្នកនាង សុខ សោម៉ាវត្តី, លោក ជា សុវណ្ណនរាហ៍, នាយក្រិន និង លោក ប៊ីអាយជី ជាដើម ព្រមជាមួយនឹងការរំលេចឈុតភ័យរន្ធត់ សើចហៀរទឹកភ្នែក និងមនោសញ្ចេតនាស្នេហា ក្នុងផ្ទៃរឿងតែមួយ ក៏ជាទំនុកចិត្តសម្រាប់ការទាក់ទាញអ្នកគាំទ្រ។
លោក វង្ស ពិសិដ្ឋ បន្ថែមថា ដ្បិតថា នេះជាភាពយន្តថ្មី ដែលជាស្នាដៃរបស់ខ្លួន ប៉ុន្តែមិនមែនជាការបញ្ចេញថ្មីដៃលើកដំបូងនោះទេ ដោយសារតែនៅក្នុងវិស័យភាពយន្ត លោកបានផលិតរឿងឲ្យទូរទស្សន៍ និង ផលិតកម្មមានចំនួនរាប់មិនអស់ទៅហើយ ទើបលោកមានទំនុកចិត្ត៕