(ភ្នំពេញ)៖ បវរកញ្ញាឯក Miss Planet International 2019 គឺកញ្ញា Monique best មកពីប្រទេសអាហ្វ្រិកខាងត្បូង បានអញ្ជើញមកដល់ប្រទេសកម្ពុជា កាលពីយប់ថ្ងៃទី០៨ ខែមករា ឆ្នាំ២០២០ ជាមួយនឹងរូបសម្រស់ដ៏ស្រស់សោភា ព្រមទាំងស្នាមញញឹមគួរឲ្យស្រឡាញ់។ គ្រាន់តែមកដល់ ក្នុងប្រទេសកម្ពុជាជាថ្មីវិញភ្លាម កញ្ញា Monique best បានសម្ដែងអារម្មណ៍រំភើបរីករាយ ព្រោះតែនាងអាចសម្រេចបំណងប្រាថ្នា បានទស្សនកិច្ចប្រទេសកម្ពុជាគ្រប់ទីកន្លែង ជាពិសេសនាងក៏បានសន្យាថា នឹងចូលរួមក្នុងកិច្ចការសង្គម ផ្សព្វផ្សាយពីបរិស្ថាន ទេសចរណ៍ និងផ្ដល់ជូននូវបទពិសោធន៍ស្ដីពីការប្រកួត «Miss Planet International» ដែលកម្ពុជាធ្វើជាម្ចាស់ផ្ទះ ដោយមានប្រទេសចំនួន៧៥ បានបញ្ជូនបេក្ខភាពរបស់ខ្លួន ដើម្បីចូលរួម។
កញ្ញាកំពូលសម្រស់ Monique best មានទឹកចិត្តប៉ងប្រាថ្នាមកប្រទេសកម្ពុជាយូរមកហើយ ដោយពេលនេះនាងសម្រេចបំណងរបស់ខ្លួន បន្ទាប់ពីមានផែនការជាច្រើន ដែលអ្នករៀបចំគ្រោងទុកជូននាង។ នាពិធីទទួលបវរកញ្ញានោះ មានវត្តមាន អ្នកស្រី ស កេសរ៉ា និងស្វាមី, លោក ហ៊ុន សុផា ជំនួយការអមទីស្ដីការគណៈរដ្ឋមន្ត្រី និងជាប្រធានទីផ្សារសម្រាប់ផ្នែកបវរកញ្ញា, វេជ្ជ ទីវ វីរៈ Le Premier Healthcare ។
កញ្ញា Monique best បានឱ្យដឹងថា នាងមកដល់ប្រទេសកម្ពុជា គឺជាអារម្មណ៍មួយចង់មកចូលរួមយូរមកហើយ ទើបតែមានពេលវេលាសមស្រប។ នាងមកកាន់ប្រទេសកម្ពុជាចំនួន១ខែ ដើម្បីបំពេញបេសកកម្មជាច្រើន ដូចជាផ្សព្វផ្សាយបរិស្ថាន ទេសចរណ៍ និងការចូលរួមបង្ហាញវត្តមាន និងបទពិសោធន៍ ស្តីពីការប្រកួត។ ក្រោយពីជាប់ជាបវរកញ្ញាមក នាងបានចូលលរួមកម្មវិធីជាច្រើនដូចជា ផ្សាយពីការការពារបរិស្ថាន ចូលរួមលើកទឹកចិត្តកុមារកំព្រា ជាដើម។ លើសពីនេះ នាងនឹងចូលរួមកម្មវិធី សន្និសីទសារព័ត៌មានធ្វើនៅកម្ពុជា ស្តីពីការប្រឡងជាលក្ខណៈអន្តរជាតិ ដែលមាន៧៥ប្រទេស ហើយកម្ពុជា ធ្វើជាអ្នករៀបចំមានរូបនាងក៏ចូលរួមបំផុសផងដែរ។
នាងក៏បង្ហាញអារម្មណ៍ថា មានពេលវេលាល្អលើកនេះ នាងនឹកទៅកម្សាន្តនាខេត្តសៀមរាប ជាពិសេសតំបន់ប្រាសាទអង្គរវត្ត ព្រោះនាងស្រឡាញ់ទីនោះណាស់។ សូមបញ្ជាក់ថា «Miss Planet International 2020» ដែលប្រទេសកម្ពុជាធ្វើជាម្ចាស់ផ្ទះ នឹងរៀបចំឡើងនៅក្នុងអំឡុងខែមេសា ឆ្នាំ២០២០ ខាងមុខនេះ៕