(ភ្នំពេញ)៖ បន្ទាប់ពីបានឃើញ គ្រួសារក្រីក្រខ្សត់ជាស្ត្រីមេម៉ាយ ហើយត្រូវចិញ្ចឹមកូនតូចៗ១០នាក់ រកអង្ករហូបបាយស្ទើរគ្មាន និងបានដើរសុំឆ្អឹងត្រីគេ យកទៅដាក់ជាមួយអំបិល ហូបជាមួយបាយ មើលទៅគួរឲ្យសង្វេគ ត្រូវបានចែកចាយលើបណ្ដាញសង្គម Facebook រួចមក តារាចម្រៀង តន់ ច័ន្ទសីម៉ា ដែលកំពុងតែមានឈ្មោះបោះសំឡេង បានប្រកាសថា ខ្លួនសូមជួយឧបត្ថម្ភ នូវអង្ករ ១តោន និងថវិកាមួយចំនួន សូមបងប្អូនជួយ Share ជូនដំណឹងឲ្យគាត់ដឹងផង នាងព្រមទាំងក្រុមការងារ និងចាត់ចែងយកជូនពួកគាត់ ឬផ្តល់លេខទូរស័ព្ទគាត់ ដើម្បីនាងទាក់ទង។
តាមគណនី Facebook ឈ្មោះថា «Standard Living» បានបង្ហោះរឿងរ៉ាវដ៏គួរឲ្យរំជួលចិត្តមួយ បន្ទាប់ពីជួបក្មេងៗគ្រួសារក្រីក្រខ្សត់ មកសុំឆ្អឹងត្រី យកទៅដាក់ជាមួយអំបិល ហូបជាមួយបាយ ឃើញហើយពិតជាសង្វេគមែនទែន។ គណនេយ្យខាងលើបានឲ្យដឹងបែបនេះថា «មិញនឹង (មុននេះបន្តិច) ខ្ញុំទប់ទឹកភ្នែកមិនបាន ហួសចិត្តពេក គាត់ទៅសុំឆ្អឹងត្រី ដែលមិត្តខ្ញុំបេះយកសាច់ធ្វើទឹកគ្រឿង ហើយសល់ឆ្អឹងនឹងសាច់តិចៗ ស្មានតែគាត់យកទៅណា លោកអើយលោក ខ្ញុំឲ្យមិត្តទៅមើលហើយក៏ខលទៅ មើលឃើញខ្ញុំក៏អួលដើមក យកទៅនាំកូនហូបបាយ ជាមួយឆ្អឹងត្រីនឹងអំបិលម្ទេស។ ខ្ញុំក៏សម្រេចប្រាប់រឿងរកការជួយដល់គាត់ និយាយជាមួយគាត់ ហើយរំភើបឡើងយំ សូមបងប្អូនជួយគាត់ផង»។
បើតាមគណនីហ្វេសប៊ុកដដែល បានឲ្យដឹងបន្ថែម ស្រ្តីខាងលើជាស្ត្រីមេម៉ាយ ហើយត្រូវចិញ្ចឹមកូនតូចៗ១០នាក់ រកអង្ករហូបបាយស្ទើរគ្មាន រស់នៅភូមិខ្នា ឃុំក្រទួត ស្រុកស្វាយក្រៅ ខេត្តសៀមរាប។ នឹងមានអ្នកលេងបណ្តាញសង្គមហ្វេសប៊ុក ចាប់អារម្មណ៍ស៊ែរចែកចាយ ដោយក្តុកក្តួលពេលឃើញរូបថតជាច្រើនសន្លឹក នឹងរូបភាពកំសត់របស់គ្រួសារក្រីក្រមួយនេះ ដោយក្រសឹងតែគ្មានអ្វីញាំ នឹងសុំឆ្អឹងត្រីសល់ពីគេបោះចោលមកចែកគ្នាញ៉ាំ ពិតជាសង្វេគណាស់។
ទន្ទឹមនឹងនោះ តារាចម្រៀងស្រីកំពុងក្រសោបបានប្រជាប្រិយ ក្រោយឈានជើងចូលទ្រនំធំ កាឡាក់ស៊ី ណាវ៉ាត្រា របស់ឧកញ៉ាវ័យក្មេងចិត្តសប្បុរស ឡេង ណាវ៉ាត្រា និងត្រូវអ្នកគាំទ្រស្គាល់ច្បាស់ថា ជាម្ចាស់បទ «គេនោះជាស្រីកាប់ដាវ» កញ្ញា តន់ ច័ន្ទសីម៉ា ក៏មិនអាចឃាត់ចិត្តទប់អារម្មណ៍ ដ៏សែនស្រណោះចំពោះរូបភាពនេះបាន ក៏ចេញសារប្រកាសផ្ដល់នូវទឹកចិត្តខ្លួនតាមរយៈការជូនថវិកា និងគ្រឿងឧបភោគបរិភោគ ក្នុងសំណេរមួយថា «នាងខ្ញុំ តន់ ចន្ទសីម៉ា សូមចែករំលែកក្តីស្រឡាញ់ និងសុំចូលរួមចំណែកជួយគ្រួសាររបស់គាត់នូវ អង្ករ ១តោន ត្រីខ ១០យួរ មី ៣០ កេស និងថវិកា ២០ ម៉ឺនរៀល សូមបងប្អូនជួយ Share ជូនដំណឹងឱ្យគាត់ដឹងផង នាងខ្ញុំព្រមទាំងក្រុមការងារ និងចាត់ចែងយកជូនពួកគាត់ ឬផ្តល់លេខទូរស័ព្ទគាត់ ដើម្បីនាងខ្ញុំទាក់ទងទៅ»៕