(សេអ៊ូល)៖ ជាការកត់សម្គាល់ តារាកូរ៉េប្រុសល្បីឈ្មោះ អតីតសមាជិកក្រុម BIGBANG បានស្ងប់ស្ងាត់រយៈពេល៨ខែមកហើយ ចាប់តាំងពីដីកាចាប់ខ្លួនដំបូងរបស់លោកត្រូវបានច្រានចោល (ត្រូវបានចាត់ទុកថាគ្មានតម្លៃ) ជាហេតុធ្វើឲ្យតារាប្រុសរូបនេះរួចផុតពីការឃុំខ្លួន។ តែយ៉ាងណា បច្ចុប្បន្ននេះអយ្យការបានធ្វើការស្នើសុំដីកាចាប់ខ្លួនថ្មីផ្សេងទៀត ទៅលើ Seungri ដោយក្នុងនោះមានរឿងក្តីចំនួន ៧ករណីឯណោះ។ នេះបើយោងតាមការចេញផ្សាយដោយសារព័ត៌មាន Koreaboo នៅថ្ងៃទី១០ ខែមករា ឆ្នាំ២០២០។
បើយោងតាមការចេញផ្សាយដោយសារព័ត៌មាន News1 ដកស្រាយប្រភពពី Star News កាលពីថ្ងៃទី០៨ ខែមករាកន្លងទៅ បានឲ្យដឹងថា អយ្យការបានស្នើសុំដីកាចាប់ខ្លួនថ្មី ទៅលើ Seungri ជាមួយនឹងរឿងក្តីសរុបចំនួន ៧ករណី។ ក្នុងនោះរួមមានទាំង៥ករណីដូចគ្នាទៅនឹងដីកាចាប់ខ្លួនកាលពីខែឧសភា ឆ្នាំ២០១៩ កន្លងទៅ ដែលរួមមាន ពីបទចោទករណីពេស្យាចារ, លួចផ្ដល់នូវសេវាផ្លូវភេទ, ល្មើសច្បាប់សុខភាពចំណីអាហារ, បំពានច្បាប់ប្រតិបត្តិការអាជីវកម្ម និងគេចពន្ធជាដើម។ ខណៈរឿងក្តី ២ករណីទៀតបន្ថែមទៀត គឺអំពើដោះដូររូបិយវត្ថុបរទេសខុសច្បាប់ និងការលេងល្បែកស៊ីសងខុសច្បាប់។
យ៉ាងណាមិញ បើតាមការរំពឹង តុលាការនឹងចាប់ផ្តើមវាយតម្លៃលើរឿងក្តីរបស់ Seungri នៅថ្ងៃទី១៣ ខែមករា ឆ្នាំ២០២០ ខាងមុខនេះ៕
