(ភ្នំពេញ)៖ លោក ហ៊ុយ យ៉ាឡេង ជាផលិតករដឹកនាំសម្ដែងភាពយន្តខ្នាតធំរឿង «ដើម្បីកូន» បានថ្លែងជាសាធារណៈថា លោកចង់បណ្ដុះក្ដីស្រឡាញ់នៅក្នុងសង្គម ក៏ដូចជាបង្កើនភាពជិតស្និទ្ធ ក្នុងគ្រួសារឲ្យបានកាន់តែច្រើន ទើបលោកមានក្ដីរំពឹងយុវវ័យទាំងអស់ អាចជូនអំណោយទៅអ្នកមានគុណ ដោយការជូនពួកគាត់មកទស្សនារឿង ព្រោះលោកជឿថា អ៊ុ ពូ មា មីង ក៏ប្រាថ្នាពេលវេលាបែបនេះដែរ ប៉ុន្តែរឿងដែលពិបាក គឺខ្វះភាពយន្តដែលពួកគាត់អាចទស្សនាបាន។
ការថ្លែងបែបនេះរបស់លោក គឺក្នុងឱកាសបើកសម្ពោធដាក់បញ្ចាំងជាផ្លូវការ នូវខ្សែភាពយន្តរឿង «ដើម្បីកូន» របស់ផលិតកម្មកថាជ័យ កាលពីល្ងាចថ្ងៃទី២៧ ខែមករា ម្សិលមិញនេះនៅរោងភាពយន្ត Major Cineplex By Smart ផ្សារទំនើបអ៊ីអន១ ក្រោមវត្តមានអ្នកគាំទ្រទាំងក្នុង និងក្រៅសិល្បៈមកចូលរួមយ៉ាងភ្លូកទឹកភ្លូកដី។
លោក ហ៊ុយ យ៉ាឡេង បានបន្តឲ្យដឹងថា សាច់រឿង គឺលោកដកស្រង់ពីជីវិតពិតរបស់អ្នកធាក់ស៊ីក្លូម្នាក់ យកមកធ្វើចេញជាភាពយន្ត។ លោកចង់ឲ្យយុវវ័យ បានយល់កាន់តែច្បាស់ ពីពលិកម្មរបស់បុគ្គលជាអាណាព្យាបាលម្នាក់ៗ តស៊ូ លះបង់ខ្លាំងប៉ុណ្ណា ទើបអាចបីបាច់កូនៗរហូតដល់ពេញវ័យ អាចរកអនាគតបាន។
រឿង «ដើម្បីកូន» នឹងដាក់បញ្ចាំងជាផ្លូវការ នៅគ្រប់រោងភាពយន្តទំនើបៗទាំងក្នុងរាជធានីភ្នំពេញ និងតាមបណ្ដាខេត្តនៅថ្ងៃទី៣០ ខែមករា ឆ្នាំ២០២០ ខាងមុខនេះ។
គួរបញ្ជាក់ថា មុនថ្ងៃសម្ពោធដាក់បញ្ចាំងរឿង «ដើម្បីកូន» ផលិតករ និងជាចាងហ្វាងផលិតកម្មខាងលើ បានប្រកាសលក់ស៊ីក្លូមានអាយុកាល៨០ឆ្នាំ ក្នុងតម្លៃ១លានដុល្លារ ដើម្បីយកថវិកាទៅជួយមន្ទីរពេទ្យគន្ធបុប្ផា។ កន្លងទៅលោក ទើបនឹងបរិច្ចាគថវិកា១០០០ដុល្លារ ទៅមន្ទីរពេទ្យកាលពីដើមខែ និងគ្រោងកាត់១០%លើប្រាក់ចំណេញបន្ថែម ផ្ដល់ជូនមូលនិធិបន្តទៀត៕
