(ភ្នំពេញ)៖ កន្លងមកពុកម៉ែបងប្អូន ប្រាកដជាបានដឹងច្បាស់ហើយ ចំពោះបុរសជនជាតិបរទេសម្នាក់ សុខចិត្តចាកចេញពីស្រុកកំណើតនាំភរិយា និងកូនៗមករស់នៅក្នុងព្រៃជ្រៅ ដើម្បីជួយអភិរក្សព្រៃឈើ និងសត្វព្រៃដែលកំពុងរងនូវការបបាញ់កាប់ផ្លាញនាពេលបច្ចុប្បន្ន។ ការតស៊ូ និងលះបង់របស់លោក Ben Davis បានធ្វើមហាជនគាំទ្រជាថវិកា ព្រមទាំងមានការកោតសរសើរជាខ្លាំង។ ទន្ទឹមគ្នានោះដែរ ដោយក្ដីអាណិតអាសូរ ព្រះព្រហ្មវិជ្ជា នី សុវណ្ណមុន្នីរ៉េត សមាជិកកុដលេខ២៤ វត្តនាគវ័ន្ត បានប្រកាសឧបត្ថម្ភថវិកា១លានរៀល ព្រមទាំង៨០ម៉ឺនរៀល ជារៀងរាល់ខែ រហូតដល់១ឆ្នាំពេញ ដល់លោក Ben Davis តាមរយៈលោក Tan Kimsour ដើម្បីជួយអភិរក្សព្រៃឈើនៅកម្ពុជា។
ព្រះព្រហ្មវិជ្ជា នី សុវណ្ណមុន្នីរ៉េត សមាជិកកុដលេខ២៤ វត្តនាគវ័ន្ត បានបង្ហោះសារនៅលើបណ្ដាញទំនាក់ទំនាក់សង្គមថា «ថ្ងៃអាទិត្យ ១រោច ខែមាឃ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០៩ ខែកុម្ភៈ ឆ្នាំ២០២០ ប្អូនប្រុស Tan Kimsour បានមកទទួលអំណោយពីខ្ញុំព្រះករុណាអាត្មាភាព ដែលបានប្រកាសចង់ចូលរួមជួយឧបត្ថម្ភជាថវិកាចំនួន១,០០០,០០០៛ និងឧបត្ថម្ភជាថវិកាបន្ថែម ៨០០,០០០៛ ជារៀងរាល់ខែចំនួន១ឆ្នាំពេញតែម្តង សរុបថវិកាចំនួន ៩,៦០០,០០០៛ ចាប់ពីខែ០៣នេះតទៅ ជូនដល់លោក បេន និងក្រុមគ្រួសារ ដែលជាអ្នកស្រឡាញ់ និងថែរក្សាធនធានធម្មជាតិ នៅក្នុងប្រទេសកម្ពុជាយើង»។
ចំពោះសកម្មភាពសប្បុរសធម៌នេះដែរ មិនមែនជាលើកទី១នោះទេ ដែលព្រះព្រហ្មវិជ្ជា នី សុវណ្ណមុន្នីរ៉េត ជួយឧបត្ថម្ភដល់ញាតិញោមពុទ្ធបរិស័ទ ជាក់ស្ដែងថ្មីៗនេះព្រះតេជគុណបានជួយស្ត្រីមេម៉ាយម្នាក់តស៊ូចិញ្ចឹមកូន៤នាក់តែម្នាក់ឯង។
ជួយដល់មន្ត្រីប៉ូលិសម្នាក់ ជួបគ្រោះថ្នាក់ចរាចរណ៍កំពុងតែសម្រាកព្យាបាល នៅមន្ទីពេទ្យលោកសង្ឃ ផងដែរ ជួយដល់មន្ទីរពេទ្យគន្ធបុប្ផាជាដើម។ គួរបញ្ជាក់ដែរថា លោក Ben Davis បានមករស់នៅក្នុងប្រទេសកម្ពុជា អស់រយៈពេលជិត ៣០ឆ្នាំហើយ ហើយរយៈពេលប៉ុន្មានឆ្នាំចុងក្រោយនេះ រូបលោក ជាមួយនិងក្រុមគ្រួសារ បាននឹងកំពុងតែរស់នៅក្នុងព្រៃជ្រៅមួយក្នុងខេត្តព្រះវិហារ៕
