(សេអ៊ូល)៖ ថ្មីៗនេះផលិតកម្មដ៏ធំមួយនៅកូរ៉េខាងត្បូង គឺ YG Entertainment បានរាយការណ៍ថានឹងបង្ហាញមុខក្រុមនារីថ្មី នៅពាក់កណ្តាលឆ្នាំ២០២០។ នេះបើយោងតាមការដកស្រង់ការចេញផ្សាយពីសារព័ត៌មាន CGTN នៅថ្ងៃទី២៧ ខែកុម្ភៈ ឆ្នាំ២០២០។
បើយោងតាមសារព័ត៌មាន SPOTVnews បានឲ្យដឹងថា ផលិតកម្ម YG កំពុងតែរៀបចំគម្រោងជាច្រើន សម្រាប់ផលិតកម្មរបស់ខ្លួន ក្នុងនោះរួមមាន ការបង្កើតក្រុមនារីថ្មីនៅពាក់កណ្តាលឆ្នាំ២០២០ និងការរៀបចេញអាល់ប៊ុមថ្មីសម្រាប់ក្រុមនារី BLACKPINK ជាដើម។ ងាកមកពាក្យចចាមអារាមបានសាយភាយថា ក្រុមតារា K-POP ថ្មីដែល YG គ្រោងបង្កើតគឺមានឈ្មោះថា «monster rookie»។ ខណៈពាក្យចចាមអារាមចេះតែមានជាបន្តបន្ទាប់ ផលិតកកម្ម YG បានឲ្យដឹងថា ផលិតកម្មកំពុងតែធ្វើការសម្រេចចិត្តជាមួយនឹងសមាជិកក្នុងក្រុមថ្មីនេះ បន្ទាប់មកនឹងធ្វើកិច្ចសន្យារសមាជិកក្រុមនីមួយៗ។
បន្ថែមពីនេះ YG បានចេញសេចក្តីថ្លែងការណ៍ថា «ជាការពិតផលិតកម្មកំពុងតែត្រៀមបង្កើតក្រុមនារីថ្មីពិតមែន ហើយខាងផលិតកម្មនឹងរាយការណ៍ព័ត៌មានបន្ថែមជាផ្លូវការបន្តទៀត។ ខណៈបច្ចុប្បន្នក្រុមហ៊ុនកំពុងតែផ្តោតលើការបញ្ចេញអាល់ប៊ុមថ្មី សម្រាប់ BLACKPINK»។
សូមជម្រាបថា បច្ចុប្បន្ននេះ BLACKPINK គឺជាក្រុមនារីតែមួយគត់ ក្នុងផលិតកម្ម ស្របពេលក្រុមបុរសមានច្រើនជាងដូចជា BIGBANG, WINNER, iKON និង TREASUE ដែលជាក្រុមថ្មីមួយដែរ៕