(ភ្នំពេញ)៖ ផលិតកម្ម BN បានធ្វើពិធីក្រុងពាលីថតខ្សែភាពយន្ត «N Love Series កំពូលស្វាមី» ដើម្បីត្រៀមវាយលុកទីផ្សារភាពយន្ត នៅក្នុងប្រទេសកម្ពុជា ក្នុងឆ្នាំ២០២០នេះ ដែលជាការួមចំណែកមួយ លើកស្ទួយភាពយន្តយន្តខ្មែរ ទាំងក្នុងប្រទេស និងលើឆាកអន្តរជាតិ។ ពិធីនេះត្រូវបានធ្វើឡើងនៅក្នុងសង្កាត់ស្ទឹងមានជ័យ ខណ្ឌមានជ័យ ក្រោមវត្តមានតារាសម្ដែងប្រុសស្រីល្បីឈ្មោះ ចូលរួមយ៉ាងច្រើនកុះករ។
លោក ផុន សេម ចាងហ្វាងផលិតកម្ម BN បានថ្លែងក្នុងពិធីក្រុងពាលីរឿងខាងលើនេះ ឲ្យដឹងថា ខ្សែភាពយន្ត «N Love Series កំពូលស្វាមី» ជាប្រភេទរឿង បែបមនោសញ្ចេតនាស្នេហាអូនបង បែបកំប្លែង លាយឡំជាមួយឈុតវាយតប់ទាត់ធាក់គ្នាយ៉ាងជក់ចិត្ត និងបង្កប់ដោយការអប់រំជាច្រើន ធ្វើឲ្យអ្នកទស្សនាជក់ចិត្តមិនខាន។
លោកបន្តថា ខ្សែភាពយន្ត N Love Series ឬ «កំពូលស្វាមី» ត្រូវបានផលិតកម្មចាយពេលវេលា ក្នុងការថតរយៈពេល២ខែ។ រីឯដើមទុនក្នុងការផលិតខ្ទង់៥ម៉ឺនដុល្លារអាមេរិក។ ចំពោះទីតាំងថតវិញ មាននៅរាជធានីភ្នំពេញ និងបណ្ដាខេត្តមួយចំនួនដូចជា កោះកុងជាដើម។ រឿងនេះគ្រោងនឹងចេញថតនៅថ្ងៃទី ១២ ខែមីនានេះហើយ។ បន្ទាប់ពីរឿងនេះទៅផលិតកម្ម BN ក៏មារឿងថ្មីៗត្រៀមថតជាបន្តបន្ទាប់ផងដែរ។
សូមបញ្ជាក់ថា ខ្សែភាពយន្ត «N Love Series កំពូលស្វាមី» ចូលរួមសម្ដែងដោយ៖ កញ្ញា ចាន់ ស្រីម៉ី, កញ្ញា សូ សីតា, លោក លឹមម៉េងគ័ង, កញ្ញា អាហ្វុង, លោក រ៉េត សុវណ្ណពន្លឺ និងតារាសម្ដែងល្បីៗជាច្រើនដួងទៀត៕