(ភ្នំពេញ)៖ តារាសម្ដែងដ៏ល្បី កំពុងមានប្រជាប្រិយភាព និងទើបនឹងជួបរឿងទុក្ខសោក ខណៈអ្នកម្ដាយបានទទួលមរណភាព កាលពីថ្មីៗនេះ គឺតារាសម្ដែង សូ ដានីតា បានដាច់ចិត្តសរសេរបង្ហោះជាសាធារណៈ ព្រមានចាត់វិធានការ ប្ដឹងលើអ្នកដឹកនាំសម្ដែងល្បីឈ្មោះ នៅក្នុងផលិតកម្មថោន គឺលោក ឃុន ធារិទ្ធិ ហៅ Rith Omega រឿងមិនព្រមចេញមុខដោះស្រាយបំណុល ដែលបានជំពាក់រូបនាងរាប់ខែមកហើយ។
យោងទៅលើគណនីហ្វេសប៊ុកផ្លូវការ របស់តារាសម្ដែង សូ ដានីតា បានសរសេររៀបរាប់ឲ្យដឹងថា «នាងខ្ញុំ សូ ដានីតា សូមប្រកាសរកឈ្មោះ (Rith Omega) ចេញមុខមកដោះស្រាយលុយចំនួន 6500$ ព្រោះបំពានសន្យា ដែលមានស្នាមមេដៃជាច្រើនដងហើយ ដោយតេមិនលើក បិទទូរស័ព្ទ។ បើមិនចេញមកខ្ញុំដាក់បណ្តឹង ឡើងដល់តុលាការ»។
យ៉ាងណាមិញ តាមរយៈការបង្ហោះសារដ៏គួរឲ្យភ្ញាក់ផ្អើល រឿងជំពាក់បំណុលគ្នាបែបនេះ ពីសំណាក់តារាសម្ដែងកញ្ញា សូ ដានីតា គឺបន្ទាប់ពីម្ដាយរបស់នាង បានទទួលមរណភាព និងបានរៀបចំពិធីបុណ្យ៧ថ្ងៃរួចរាល នាពេលថ្មីៗនេះ។ គេមិនទាន់ដឹងនោះទេថា តើនាងមានការខ្វះខាត ការធ្វើបុណ្យឲ្យម្ដាយរបស់នាង ឬក៏យ៉ាងណានោះទេ ទើបធ្វើឲ្យនាងដាច់ចិត្តទម្លាយ រឿងលោក Rith Omega ជំពាក់លុយ ហើយមិនចេញមុខដោះស្រាយ។
អ្វីដែលគួរឲ្យចាប់អារម្មណ៍មួយទៀត នៅក្នុងសំណេរខ្លីរបស់ សូ ដានីតា បានសង្កត់ធ្ងន់ថា លោក Rith Omega បានបំពានសន្យា ទាំងដែលខ្លួនបានផ្ដិតមេដៃជាច្រើនដង និងបិទទូរស័ព្ទខលមិនចូលទៀតផង។
ជាមួយគ្នានេះ គេក៏មិនទាន់ដឹងច្បាស់ថា តើលោក ឃុន ធារិទ្ធិ ហៅ Rith Omega ជំពាក់លុយ តារាសម្ដែង សូ ដានីតា តាំងពីឆ្នាំណានោះទេ ទើបតែពេលនេះ នាងដាច់ចិត្តចេញមុខបកអាក្រាតជាសាធារណៈបែបនេះ។ ក្នុងនោះគេក៏នៅមិនទាន់ឃើញ ភាគីខាងលោក Rith Omega ចេញមុខបំភ្លឺនោះដែរ៕
