(ភ្នំពេញ)៖ ផលិតករទឹកភ្នែក និងបទស៊ីអារម្មណ៍ជាច្រើន ជាពិសេសបទ «ពុកខ្ញុំជាប៉ូលិសចរាចរណ៍» លោក ប៊ុន រតនា និងបងប្រុស ប៊ុន វុត្ថា ថៅកែអេសអូតូ បានធ្វើកម្មវិធីចែកអំណោយ ជាអង្ករ អាល់កុល និង ម៉ាស់ និងប្រាក់១០០០០រៀលដល់ប្រជាពលរដ្ឋចំនួន ២០០គ្រួសារ ស្ថិតនៅក្នុងសង្កាត់ទួលសង្កែទី២ រាជធានីភ្នំពេញ អំឡុងពេលរីករាលដាលនៃជំងឺកូវីដ១៩។ ពិធីចែករំលែកនូវអង្ករ អាល់កុល និងម៉ាស់ នេះធ្វើឡើងនៅឃ្លាំងរថយន្ត S-Auto របស់លោកស្ថិតនៅបណ្តោយផ្លូវ ៥៩៨ ដោយមានការចូលរួមពីសំណាក់ លោកចៅសង្កាត់ទួលសង្កែទី២ ផងដែរ។
ផលិតករដ៏សំបូរបទពិសោធ ជាពិសេសបទចម្រៀង «ពុកខ្ញុំជាពិសេសចរាចរណ៍» និងបងប្រុស ប៊ុន វុត្ថា បានលើកឡើងថា នេះមិនមែនជាលើកទី១ទេ ដែលពួកលោកបានចែករំលែក នូវសកម្មភាពសប្បុរសធម៌ឡើង ជូនប្រជាពលរដ្ឋ ក្នុងអំឡុងកូវីដ១៩ នេះ ដោយកាលពីប៉ុន្មានថ្ងៃនេះ បានធ្វើឡើងនៅ ទឹកដីខេត្តបាត់ដំបង ដោយចែកជូនអង្ករ ដល់ប្រជាពលរដ្ឋចំនួន១៦០គ្រួសារ ដោយមួយគ្រួសារទទួលបាន អង្ករ ២៥គីឡូក្រាម។ កម្មវិធីលើទឹកដីបាត់ដំបងនេះ ជាការចូលរួមចំណែកជាមួយលោក ឧកញ៉ាបណ្ឌិត យូ សាម៉េត។ លោកបានបន្តថា កន្លងទៅក៏បានចែកជូនធុងទឹកអំពៅ ដល់គ្រួសារមួយ ដើម្បីជួយសម្រួលជីវភាពរបស់ពួកគាត់ និងសកម្មភាពជាច្រើនទៀត។
ពីរនាក់បងប្អូន ដែលប្រឡូកក្នុងវិស័យសិល្បៈឡើងចាស់វស្សា និងវិវត្តន៍ខ្លួនមួយដំណាក់កាលថែមទៀត ចូលក្នុងអាជីពអ្នករកស៊ីលក់រថយន្តដ៏ជោគជ័យ បានបន្តថា «ពួកខ្ញុំសប្បាយចិត្ត ខ្លាំងណាស់ ដែលបានចូលរួមរំលែកនូវសកម្មភាពសប្បុរសធម៌ ខណៈនៃការរីករាលដាលនៃជំងឺកូវីដ១៩ វាមិនច្រើនទេ សម្រាប់ការចែកអង្ករ ដោយមួយគ្រួសារទទួលបាន១០គីឡូក្រាម អាល់កុល១ដប និងម៉ាស់ចំនួន២ ឲ្យក្រុមគ្រួសារចំនួន ២០០គ្រួសារ ប៉ុន្តែបើយើងក្រឡេកទៅវិញ ពេលដែលគេអត់យើងឲ្យវាពិតជាធ្វើឲ្យពួកគាត់សប្បាយរីករាយ។ ថ្វីបើអំណោយនេះតិចតួច ប្រើបានរយៈពេលខ្លី តែវាក៏ជួយសម្រួល ការខ្វះខាត របស់ពួកគាត់មួយរយៈតូចផងដែរ»។
លោក ប៊ុន រតនា បានលើកឡើងថា លោកនឹងបន្តជួយទៅទៀត ទៅតាមលទ្ធភាពរបស់លោក ហើយក៏ថ្លែងអំណរគុណទៅកាន់អតិថិជន S-Auto ទាំងអស់ ដែលបានគាំទ្រមកលើឃ្លាំង លក់រថយន្តរបស់លោក ហើយក៏ជាចំណែកនៃការចូលរួមសប្បុរសធម៌ លើកនេះផងដែរ៕
