(ភ្នំពេញ)៖ ស្ថិតក្នុងកាលៈទេសៈ ដែលប្រទេសកម្ពុជា កំពុងតែរងគ្រោះ នូវជំងឺផ្លូវដង្ហើមកូវីដ១៩ មិនទាន់ស្រាកស្រាន្តនៅឡើយ ហើយតារាសម្ដែង តារាចម្រៀងជាច្រើន កំពុងតែរងផលប៉ះពាល់ទៅលើអាជីព និងបានបាត់បង់ចំណូលយ៉ាងច្រើនគំហុកផងនោះ ងាកមកអតីតតារាចម្រៀង យ៉ុង ចាន់កណ្ណិកា ទោះឃ្លាតឆ្ងាយពីសិល្បៈហើយ នាង និងបងប្អូនបានរួមសហការគ្នា បោះទុនក្នុងរដូវកាលជំងឺកូវីដ១៩នេះ រហូតទទួលបានការគាំទ្រ លើមុខរបររីកសាយសាខា ដែលទើបតែកសាងរួចថ្មីៗមកនេះ។
ទោះបីជាស្ថានភាពបច្ចុប្បន្ន មនុស្សជាច្រើន ហាក់កំពុងសំងំនៅតែក្នុងផ្ទះ ដើម្បីការពារខ្លួនពីជំងឺដ៏កាចសាហាវនេះក្ដី តែជំនួញរបស់អ្នកនាង យ៉ុង ចាន់កណ្ណិកា ហាក់បានទទួលការគាំទ្រពីសំណាក់អតិថិជន ក្រោយពេលជួយលក់ផលិតផលសំអាត និងថែរក្សាសម្រស់ដល់អតិថិជន ត្រូវនឹងស្ថានការណ៍។ គេសង្កេតឃើញថា ក្នុងមួយថ្ងៃៗអ្នកនាង យ៉ុង ចាន់កណ្ណិកា រវល់រកវិធីសាស្រ្តថ្មីៗទៀត ដើម្បីបំពេញសេវាភ្ញៀវ គាំទ្រកណ្ណិកា។ ជាប់រវល់នឹងការងារថ្មី ទើបតារាចម្រៀងសំឡេងរណ្តំចិត្តរូបនេះ មិនអាចវិលមករកវិថីដែលខ្លួនស្រឡាញ់ និងខំតស៊ូរហូតល្បីឈ្មោះមួយនេះបានទៀតទេ ទោះបីនឹកនា។
អ្នកនាង យ៉ុង ចាន់កណ្ណិកា និងសាច់ញាតិ ព្រមទាំងស្វាមី បានធ្វើឲ្យគេភ្ញាក់ផ្អើល ព្រោះចូលដល់ឆ្នាំថ្មីភ្លាម នាងស្រាប់តែហ៊ានបោះទុនពង្រីកហាង ទាំងមិនភ័យភិត បង្កើតពីរទៅ៣មុខ មានជាសាឡន កន្លែងលក់កាហ្វេ អាហារដ្ឋាន សុទ្ធតែជាជំនួញដែលមហាជនចូលចិត្ត។
សូមបញ្ជាក់ថា សាខាថ្មី ទើបបង្កើតបានជាហាងទ្រង់ទ្រាញធំឈ្មោះ «ប៊ីលេនកាហ្វេ» បានកសាងរចនា និងបើកដំណើរការច្រើនខែមកហើយ។ គ្រាន់តែដល់ថ្ងៃចូលឆ្នាំម្នាក់ៗសប្បាយចិត្ត ព្រោះឃើញសមិទ្ធផលថ្មីកើតឡើង។ បែបនេះហើយទើបថ្ងៃទទួលទេវតា នាងបានបួងសួងសុំឲ្យជួបតសេចក្តីសុខ។ យ៉ាងណាមិញអ្នកគាំទ្រ តារាតូចច្រឡឹងរូបនេះ សុំឲ្យការរកស៊ីនៅទីតាំងថ្មី កាន់តែការរីកចម្រើន និងមានអតិថិជនច្រើន ប្រកបដោយទំនុកចិត្ត និងពុំមានភាពភ័យខ្លាច៕