(ភ្នំពេញ)៖ តារាចម្រៀងមានឈ្មោះល្បីលោក ប៊ុន ស័ក្តិ បានបង្ហើរនូវចម្រៀងមួយបទ មានចំណងជើងថា «គ្រប់យ៉ាងដើម្បីកូន» ដែលជាស្នាដៃថ្មីប្រឹក្សានិពន្ធ និងផលិត ដោយលោក ហេង ឡុង បានបង្ហាញពីការយកចិត្តទុក្ខដាក់ខ្ពស់ របស់ថ្នាក់ដឹកនាំកំពូល គឺសម្ដេចតេជោ ហ៊ុន សែន ដល់ប្រជាពលរដ្ឋកម្ពុជាទាំងមូល ក្នុងស្ថានភាពដែលប្រទេសជាតិ កំពុងជួបប្រទះគ្រោះអាសន្ន នូវជំងឺរាតត្បាត ដ៏កាចសាហាវកូវីដ១៩ និងអំពាំវនាវឲ្យចូលរួមប្រយុទ្ធប្រឆាំង ទាំងអស់គ្នា។
ក្នុងអត្ថន័យនៃបទចម្រៀង បានបង្ហាញទៀតថា ក្នុងកាលៈទេសៈនេះ ថ្នាក់ដឹកនាំប្រទេស បានធ្វើការសម្រេចចិត្តយ៉ាងលំបាកបំផុត ហើយទទូចដល់បងប្អូន មេត្តាចូលរួមទប់ស្កាត់ទាំងអស់គ្នា ដោយសុខចិត្តនៅធ្វើការងារធម្មតា កុំធ្វើដំណើរទៅស្រុកកំណើត អនាម័យគ្រប់ពេល ជាពិសេសត្រូវគោរពតាមការណែនាំ របស់ក្រសួងសុខាភិបាល និងអត់ធ្មត់គោរពតាមការណែនាំរបស់រាជរដ្ឋាភិបាល ដែលមានសម្ដេចតេជោ ជាអ្នកដឹកនាំ។ ការឲ្យគោរពទៅតាមបំរាមខាងលើនេះ គឺគ្មានអ្វីក្រៅពីឲ្យបងប្អូនទាំងអស់រស់បានសុខ ជៀសផុតពីជំងឺរាតត្បាត ដូចអ្វីដែលសម្ដេចតេជោ ធ្លាប់បានលើកឡើងថា «គ្រប់យ៉ាង គឺដើម្បីកូន»។
«គ្រប់យ៉ាងដើម្បីកូន» មានការប្រឹក្សានិពន្ធ និងផលិត ដោយ ហេង ឡុង, ផ្តួចផ្តើមផលិតដោយលោក ម៉ែន សុខ, និពន្ធទំនុកច្រៀងដោយលោក សៀ គឹមស្រៀង និងច្រៀងដោយតារាចម្រៀង ប៊ុន ស័ក្ដិ៕
