(ភ្នំពេញ)៖ ពិតជារឿងដ៏កម្រ ដែលតារាចម្រៀងប្រុសសំឡេងស្រទន់ ពិរោះរណ្តំចិត្តពីររូប បានប៉ះគ្នា ក្នុងបទចម្រៀងតែមួយ គឺបទ «ខ្យល់រដូវ»។ តារាជើងចាស់លោក សុះ ម៉ាច បានបង្ហើរសំនៀងរួមគ្នាជាមួយលោក សាន ផានិត ក្នុងបទ «ខ្យល់រដូវ» ជាមួយទឹកដមសំឡេងស្រទន់ ធ្វើឲ្យប្រិយមិត្តដែលបានស្តាប់ហើយ ស្លុងអារម្មណ៍តាមបទចម្រៀងនឹករឿងអតីតកាល។
ពិតណាស់ កន្លងមកមហាជនធ្លាប់តែឃើញតារាចម្រៀងប្រុសទាំងពីររូប បកស្រាយចម្រៀងតែឯង ប៉ុន្តែពេលនេះហាក់ប្លែកអារម្មណ៍ជាមួយរសជាតិថ្មី តាមរយៈការបកស្រាយរួមគ្នា ក្នុងចម្រៀងមនោសញ្ចេតនា រៀបរាប់ពីរឿងរ៉ាវស្នេហា ទន្ទឹងរងចាំគូស្នេហ៍ នឹករលឹករឿងរ៉ាវអតីតកាល។ តាមរយៈចម្រៀងថ្មីមួយបទនេះ កំពុងអន្ទងចិត្តទស្សនិកជនជាច្រើន ឲ្យទ្រាំមិនចូលស្តាប់មិនបាន ជាពិសេសស្តាប់ហើយ ចង់ស្តាប់ម្តងទៀត ព្រោះទឹកដមសំឡេងរបស់តារាប្រុសទាំងពីរដួង គឺពិរោះខ្លាំងមែនទែនក្នុងបទនេះ៕