(ភ្នំពេញ)៖ បើនិយាយពីដំណើរជីវិត ការតស៊ូ ពុះពារការលំបាក មនុស្សគ្រប់រូបសុទ្ធតែបានឆ្លងកាត់ និងមានបទពិសោធន៍ជីវិតផ្សេងៗពីគ្នា។ ទោះមិនទាន់ជោគជ័យធំដុំ តែការអភិវឌ្ឈន៍ខ្លួន ទៅជាមនុស្សម្នាក់ថ្មី ដែលមានការងារសមរម្យ តាមអ្វីដែលខ្លួនស្រឡាញ់ គឺជារឿងសំខាន់មួយសម្រាប់មនុស្សគ្រប់រូប។ ជាក់ស្តែង លោកសាល បាទី ដែលជាតារាចម្រៀងប្រុស កំពុងមានប្រជាប្រិយភាពសព្វថ្ងៃ ក៏បានហែលឆ្លង ជួបរឿងរ៉ាវជីវិតមិនតិចនោះទេ ទំរាំបានក្លាយជាតារាចម្រៀង ដែលជាអាជីពលោកស្រឡាញ់។ ព្រោះពីដើមឡើយ លោកជាអ្នករត់តុ ដែលចូលចិត្តច្រៀងមួយរូបប៉ុណ្ណោះ។
ថ្មីៗនេះ លោកសាល បាទី ដែលមានឈ្មោះពិតហៅថា សួន សាល បានមកលាតត្រដាងនូវប្រវត្តិជីវិតតស៊ូ តាមរយៈចូលរួមជាតារាកិត្តិយសក្នុងកម្មវិធី «អាថ៌កំបាំងក្រៅឆាក របស់តារា»។ ឆ្លើយតបនឹងការសាកសួររបស់ពិធីករ-ពិធីការិនី លោកសាល បាទី បានឲ្យដឹងថា បច្ចុប្បន្នលោកគឺជាតារាចម្រៀងម្នាក់ប្រចាំផលិតកម្ម Home Music។ ការច្រៀង គឺជាអាជីពមួយ ដែលលោកស្រឡាញ់ តាំងពីកុមារភាពមកម្ល៉េះ។ កាលមិនទាន់ចូលសិល្បៈ ជារើយៗលោកតែងតែច្រៀងជានិច្ច មិនថាពេលធ្វើការ ឬពេលទំនេរឡើយ រហូតពេលខ្លះត្រូវបានមនុស្សជុំវិញខ្លួនស្តីបន្តោសក៏មាន។
និយាយដល់ចំណុចនេះ លោក សាល បាទី ថាដំបូងឡើយ មុននឹងប្រឡូកក្នុងសិល្បៈដូចសព្វថ្ងៃ លោកបានធ្វើការនៅភោជ្ជនីយដ្ឋានមួយកន្លែង ដែលមានតួនាទីជាអ្នករត់តុ។ ដោយសារតែស្រឡាញ់ចម្រៀង ធ្វើជាអ្នករត់តុបណ្តើរ ច្រៀងបណ្តើរ ហើយមានពេលខ្លះច្រៀងឲ្យភ្ញៀវស្តាប់ក៏មាន។ ដោយមានទឹកដមសំឡេងក៏ត្រូវបាន ម្ចាស់ក្រុមហ៊ុនមួយចំនួនមើលឃើញ និងបើកផ្លូវឲ្យធ្វើជាតារាចម្រៀងក្នុងហាង និងរកលុយកាកបានខ្លះ គ្រាន់ចិញ្ចឹមជីវិត។
ក្រោយមក លោកក៏បានចូលរួមក្នុងកម្មវិធី ប្រឡងចម្រៀង របស់ស្ថានីយទូរទស្សន៍នានា។ ចាប់តាំងពីដើមឆ្នាំ២០១៩មក តារាចម្រៀងប្រុសស្រស់សង្ហា លោក សាល បាទី ចាប់ផ្តើមលេចមុខមាត់ច្រើនក្នុងការងារសិល្បៈ។ ពិសេស ត្រូវបានមហាជនឃើញវត្តមានឡើងច្រៀងស្ទើគ្រប់ស្ថានីយទូរទស្សន៍។ ដែលនេះជាផ្លូវមួយទៀត ធ្វើឲ្យលោកសាល បាទី អាចវិវឌ្ឈន៍ខ្លួន ចាប់យកអាជីពដែលខ្លួនស្រឡាញ់។
ជាតារាចម្រៀង ដែលធ្លាប់ឆ្លងកាត់ប្រវត្តិជូរចត់ ជាអ្នករត់តុក្នុងហាងនានាចិញ្ចឹមជីវិត សាល បាទី បានព្យាយាមវិវឌ្ឍន៍ខ្លួន និងស្វែងរកឱកាសក្លាយជាអ្នកសិល្បៈដែលមានគេស្គាល់ច្រើនរហូតមកទល់នឹងបច្ចុប្បន្ន និងមានទីផ្សារក្លាយជាតារាចម្រៀងពេញមុខពេញមាត់ មានទ្រនំផ្ទាល់ខ្លួនគឺ ផលិតកម្ម Home Music។ ខណៈថ្មីៗនេះ លោកត្រូវបានទស្សនិកជនស្គាល់ច្រើន តាមរយៈការច្រៀងបទ Cover គឺបទ «នោអើយ! ស្រីនោ» ដែលជាចង្វាក់ប្រពៃណីខ្មែរ៕