(សេអ៊ូល)៖ ជារឿងមួយគួរឲ្យភ្ញាក់ផ្អើលសម្រាប់អ្នកគាំទ្រវិស័យ K-POP ខណៈតារាប្រុសសមាជិកក្រុម MONSTA X គឺលោក Kihyun បានបង្ហាញទំនាក់ទំនងរបស់លោក ជាមួយកញ្ញា Bona ដែលជាសមាជិកក្រុម Cosmic Girls ជាផ្លូវការ បន្ទាប់ពីអ្នកទាំងពីរបានបិទបាំងទំនាក់ទំនងអស់រយៈពេល៥ឆ្នាំ។ នេះយោងតាមការដកស្រង់ការចេញផ្សាយពីសារព័ត៌មាន allkpop នៅថ្ងៃទី២១ ខែមេសា ឆ្នាំ២០២០។
បើតាមអ្វីដែលអ្នកគាំទ្របានដឹង លោក Kihyun និងកញ្ញា Bona គឺជាតារាក្នុងផលិតកម្ម Starship Entertainment។ ទន្ទឹមគ្នានេះ Sports Chosun បានចុះផ្សាយថា ដំបូងឡើយតារាប្រុសស្រីទាំងពីរ គឺជាមិត្តជិតស្និតនឹងគ្នា តាំងពីពួកគេធ្វើការងារជាមួយគ្នាដំបូងមកម្ល៉េះ។ បន្ទាប់មកក៏ចាប់ផ្តើមស្វែងយល់ចិត្តគ្នាទៅវិញទៅមក អស់រយៈពេល៥ឆ្នាំមកហើយ បើគិតមកទល់នឹងពេលនេះ។
Kihyun និង Bona ត្រូវបានគេដឹងថា មានការប្រុងប្រយ័ត្នខ្ពស់បំផុត សម្រាប់ការណាត់ជួបរបស់ពួកគេ ដោយជ្រើសរើសកន្លែងស្ងប់ស្ងាត់លក្ខណៈឯកជនដូចជានៅ Shinsa-dong ឬក៏ក្នុងរថយន្តរបស់ Kihyun។ Sports Chosun ក៏បានរាយការណ៍បន្ថែមថា ថ្មីៗនេះ អ្នកទាំងពីរបានទៅវិស្សមកាលជាមួយគ្នានៅកោះ Jeju រួមជាមួយនឹងមិត្តស្និតស្នាលរបស់ពួកគេមួយចំនួនផងដែរ៕