(ភ្នំពេញ)៖ តារាចម្រៀងល្បីលំដាប់ប្រទេស លោក ព្រាប សុវត្ថិ និងជានាយរងការិយាល័យទី៥ នៃកងទ័ពជើងគោក បានប្រកាសបរិច្ចាគប្រាក់បៀវត្សផ្ទាល់ខ្លួនចំនួន ៤០ម៉ឺនរៀល រយៈពេល៦ខែ គឺគិតចាប់ពីខែឧសភា ដល់ខែតុលា ឆ្នាំ២០២០ ដល់គណៈកម្មាធិការជាតិ ប្រយុទ្ធប្រឆាំងនឹងជំងឺកូវីដ-១៩។
តារាចម្រៀងជួរមុខប្រចាំផលិតកម្មរស្មីហង្សមាស លោក ព្រាប សុវត្ថិ តែងតែទទួលបានការកោតសរសើរ និងគោរពស្រឡាញ់កាន់តែខ្លាំងពីអ្នកគាំទ្រ បន្ទាប់ពីលោកបានបរិច្ចាគផ្ទួនៗគ្នា នូវថវិកាផ្ទាល់ខ្លួនដល់សកម្មភាពមនុស្សធម៌។
តាមរយៈសារបង្ហោះ លើហ្វេសប៊ុកផ្ទាល់ខ្លួនរបស់លោក កាលពីពេលថ្មីៗនេះ មានអ្នកសិល្បៈ និងអ្នកគាំទ្រជាច្រើន បាន Comment សរសើរថា លោក ព្រាប សុវត្ថិ មិនត្រឹមតែមានសំឡេងពីរោះ និងរូបសម្បត្តិស្អាតបាតនោះទេ លោកថែមទាំងមានទឹកចិត្តល្អទៀត ដឹងពីទុក្ខលំបាករបស់ជាតិ ក្នុងគ្រាដែលប្រទេស កំពុងគំរាមកំហែងដោយកូវីដ-១៩។
លោក ព្រាប សុវត្ថិ និយាយថា ក្នុងស្មារតីចូលរួមចំណែកជាមួយរាជរដ្ឋាភិបាល ក្នុងការប្រយុទ្ធប្រឆាំងនឹងកូវីដ-១៩ រូបលោក និងគ្រួសារ ស្ម័គចិត្ដបរិច្ចាគថវិកានេះ ដោយស្ម័គ្រចិត្ត និងជាផ្នែកមួយជួយប្រយុទ្ធប្រឆាំង នឹងការរីករាលដាល នៃជំងឺកូវីដ១៩ នៅក្នុងប្រទេសកម្ពុជាផងដែរ៕