(ភ្នំពេញ)៖ តារាចម្រៀងមានដើមកំណើត មកពីទឹកដីខេត្តតាកែវ កញ្ញា តន់ ច័ន្ទសីម៉ា បានបង្ហាញមហិច្ឆតាធំរបស់ខ្លួនមួយទៀត នៅក្នុងជីវិតជាអ្នកសិល្បៈ គឺការបោះជំហានក្លាយជាតារាសម្ដែងអាជីព បន្ទាប់ពីវិស័យចម្រៀងរបស់នាង ទទួលបានផ្លែផ្កា គួរជាទីមោទនៈ ក្នុងរយៈពេលមួយឆ្នាំចុងក្រោយនេះ ក្រោយមានទ្រនំជ្រកច្បាស់លាស់ ក្នុងផលិតកម្ម Galaxy Navatra។
តារាចម្រៀងស្រីរាងតូចច្រឡឹង មានប្រវត្តិចេញពីអ្នកចម្រៀងអាយ៉ៃ យីកេ ក្នុងទឹកដីខេត្តតាកែវ ចូលមកដល់ឆ្នាំ ២០២០ នេះភ្លាម នាងហាក់ទទួលបានការផ្ចុងផ្ដើមយ៉ាងខ្លាំង ពីផលិតកម្ម Galaxy Navatra ហើយបានផ្ទុះខ្លាំងតាមរយៈបទនិពន្ធដោយ លោកឧកញ៉ា ឡេង ណាវ៉ាត្រា មានចំណងជើងថា «ឡានស៊ីរ៉ែន» ដែលបទនេះ មានទាំងតារាថៃជាច្រើននាក់ បានយកទៅច្រៀងតាម (Cover) ទៀតផង។ ក្រៅពីនេះក៏នៅមានបទចម្រៀងល្បីៗជាច្រើនទៀត ជាស្នាដៃនិពន្ធដោយលោក យឹម តាស្រង់ ដែលទាំងនេះ បានបង្ហាញឲ្យឃើញថា តន់ ច័ន្ទសីម៉ា កាន់តែរឹងមាំក្នុងអាជីពចម្រៀង។
ទាំងអស់នេះ គឺជាពេលដែល តន់ ច័ន្ទសីម៉ា អាចងាកទៅគិតពង្រីកសមត្ថភាពសិល្បៈរបស់នាងបន្ថែម ពោលគឺដូចដែលនាងបានបង្ហាញមហិច្ឆតា ចង់ក្លាយជាតារាសម្ដែងភាពយន្តល្បីម្នាក់ នាពេលខាងមុខ។ តន់ ច័ន្ទសីម៉ា និយាយថា ពីដំបូងនាងប្រឹងធ្វើយ៉ាងណា ដើម្បីសម្រេចក្ដីសុបិនក្លាយជាតារាចម្រៀងអាជីព ហើយឥឡូវនាងធ្វើបានហើយ ក្រោយពីបានក្លាយជាតារាចម្រៀង កុងត្រារបស់ផលិតកម្ម Galaxy។ បន្ទាប់មកទៀត អ្វីដែលនាងប៉ងនៅក្នុងអាជីពសិល្បៈដែរនោះ គឺការសម្ដែងភាពយន្ត។ នាងចង់វិវត្តខ្លួនទៅជាតារាសម្ដែងក្នុងខ្សែភាពយន្តថែមទៀត ព្រោះថា ជាអ្នកសិល្បៈគួរតែមានជំនាញច្រើន ទើបប្រសើរ។
ជាមួយនឹងគោលបំណងធំថ្មីនេះ តន់ ច័ន្ទសីម៉ា សង្ឃឹមថា នៅពេលខាងមុខ ផលិតកម្ម Galaxy របស់នាង អាចនឹងបន្ថែមការផលិតកុន ពីលើការផលិតបទចម្រៀង ដែលសម្រុកចេញស្ទើរតែរកពេលសម្រាកគ្មានបែបនេះ។ ប្រសិនបើដល់ពេលនោះ ត្បិតថា មិនទាន់ដឹងថា នរណាខ្លះអាចទទួលឱកាស ប៉ុន្តែនាងថា ជាតារាចម្រៀងម្នាក់របស់ផលិតកម្ម អាចនឹងមានការឱកាសច្រើនជាងគេ ក្នុងការចូលរួមសម្ដែងភាពយន្ត ហើយនាងនឹងតាំងចិត្តធ្វើទាំងមិនអល់អែក ដើម្បីសម្រេចបំណង។
សូមបញ្ជាក់ថា តន់ ច័ន្ទសីម៉ា បានចុះកុងត្រារយៈពេល ៥ឆ្នាំជាមួយផលិតកម្ម Galaxy កាលពីពាក់កណ្ដាលឆ្នាំ ២០១៩។ ការវិវត្តន៍ខ្លួនពីតារាចម្រៀងឯករាជ្យ មកជាតារាចម្រៀងមានទ្រនំច្បាស់លាស់ បាននាំឲ្យមានការរំពឹងទុកថា នាងនឹងលេចធ្លោកាន់តែខ្លាំង។ ជាក់ស្ដែង នៅពេលនេះ នាងក៏បានបង្ហាញឲ្យឃើញថា កំពុងសិ្ថតនៅក្នុងកម្រិតជាតារាចម្រៀងអាជីព ដ៏មានទេពកោសល្យម្នាក់៕