(ភ្នំពេញ)៖ ប្រុសរបស់តារាចម្រៀងស្រីស្រគត់ស្រគំ អ្នកនាង សុន ស្រីពេជ្រ ដែលរងនូវជំងឺធ្ងន់ធ្ងរ «ជំងឺខូចខួរឆ្អឹងខ្នង» ពេលនេះលោកបានលាចាកលោកទៅហើយ នៅម៉ោង១០ព្រឹក ថ្ងៃទី៣០ ខែមេសា ឆ្នាំ២០២០ ក្រោយការតស៊ូជំនះ នឹងជំងឺក៏កាចសាហាវមួយនេះ អស់មួយរយៈមក។ នេះចាត់ទុកជាដំណឹងដ៏ក្រៀមក្រំបំផុត សម្រាប់គ្រួសារអ្នកសិល្បៈមួយដួង មានឈ្មោះល្បី និងដល់សាច់ញាតិរបស់នាង។
ប្អូនប្រុសរបស់តារាចម្រៀង សុន ស្រីពេជ្រ មានឈ្មោះថា សុន សំណាង ហៅ សុនសឺត អាយុ ៣២ឆ្នាំ ជាកូនប្រុសទី៦ ក្នុងគ្រួសារ។ ប្អូនប្រុសបានធ្លាក់ខ្លួនឈឺជាមួយនឹងជំងឺនៃការ «ខូចខួរឆ្អឹងខ្នង» អស់រយៈពេលជាច្រើនខែ។ ការបាត់បង់ជីវិតប្អូនប្រុសរបស់ អ្នកនាង សុន ស្រីពេជ្រ ទៅកាន់ទីឆ្ងាយមិនអាចវិលត្រឡប់មកវិញ ចាកចោលលោកអ្នកមានគុណ បងប្អូនសាច់ញាតិ គឺជាបាត់បង់ដ៏ធំធេង ដែលចាត់ទុកបានថា អ្នកនាង សុន ស្រីពេជ្រ ជួបទុក្ខធំ ព្រោះកន្លងមករូបនាងផ្ទាល់ និងក្រុមគ្រួសារបានខិតខំគ្រប់មធ្យោបាយ ក្នុងការរកប្រាក់មកព្យាបាលមនុស្សជាទីស្រឡាញ់របស់ខ្លួន។
អ្នកនាង សុន ស្រីពេជ្រ បានឲ្យដឹងថា សពប្អូនប្រុសរបស់នាង គឺតម្កល់ធ្វើបុណ្យសពនៅវត្តសំរោងអណ្តែត រាជធានីភ្នំពេញ ហើយអ្នកនាងនិងក្រុមគ្រួសារ កំពុងពិភាក្សារឿងពេលវេលានៃការបូជាសព។ នេះជាការជូនដំណឹងដល់មិត្តសិល្បៈ និងអ្នកស្គាល់នាងទាំងអស់ ទៅចូលរួមរំលែកទុក្ខដល់ក្រុមគ្រួសារ របស់នាងផងដែរ។
សូមបញ្ជាក់ថា អំឡុងពេលព្យាបាលប្អូនប្រុសកន្លងមក អ្នកនាង សុន ស្រីពេជ្រ ក្នុងនាមជាបងស្រី បានព្យាយាមស្វែងរកជំនួយពី សប្បុរសជនជាច្រើននៅពេលដឹងថា អស់លទ្ធភាពបូកទាំង បញ្ហាកូវីដកើតឡើងទៀត ធ្វើឲ្យនាង មិនអាចចេញក្រៅរកលុយបានទៀតទេ។ បើយោងតាមស្ថានភាពជំងឺប្អូន ប្រុសរបស់ សុន ស្រីពេជ្រ មានជំងឺរបេងឆ្អឹងខ្នង ព្យាបាលច្រើនខែមកហើយ រាប់ទាំងការចេញទៅប្រទេសជិតខាង៕