(កំពង់ឆ្នាំង)៖ តារាសម្ដែង កញ្ញា មាន សូនីតា បានបង្ហាញអារម្មណ៍អាណិតព្រះសង្ឃគង់នៅវត្តមួយ នាខេត្តកំពង់ឆ្នាំង មានឈ្មោះថា «វត្តទួលមេត្រី» ដែលពេលនេះ ព្រះសង្ឃស្ទើរដាច់ចង្ហាន់ ដោយព្រះសង្ឃដែលឃើញមានទាំងចាស់ និងកូននេនតូចៗ ព្រមទាំងយាយជីតាជីផងនោះ គឺនាំគ្នាហូប និងឆាន់មីកញ្ចប់ មើលទៅពិតជាគួរឲ្យសង្វែគពេកក្រៃ។
មាន សូនីតា បានថ្លែង នៅក្នុងបណ្ដាញសង្គមរបស់នាងថា «ពេលទៅដល់ភ្លាម ឃើញលោកឆុងមីកញ្ចប់ ១អង្គ ឃើញហើយចង់ស្រក់ទឹកភ្នែក ស្រុតថ្លើមដល់ដី។ រដូវការ Covid នេះ គ្មានចំណុះជើងវត្តដាក់វេនទេ ហើយលោកក៏មិនសូវមានចង្ហាន់គ្រប់គ្រាន់ដែរ។ អាចចូលបុណ្យដោយផ្ទាល់ជាមួយលោកបាន «សុផា និទ» វត្តទួលមេត្រី ខេត្តកំពង់ឆ្នាំង ០១២ ៥៦៣ ៦០១»។
តារាស្រីរូបនេះបានបញ្ជាក់ថា នាងបានដឹងដំណឹងពីវត្តនេះ តាមរយៈអ៊ុរបស់នាងម្នាក់ដែលធ្លាប់ទៅដល់វត្តនេះ តាំងពីច្រើនឆ្នាំមកហើយ និងបានដឹងថា វត្តមានខ្សត់ណាស់ ទើបសម្រេចនាំអ្នកម្ដាយរបស់នាង ទៅធ្វើបុណ្យសន្សំកុសលម្ដងទៀតនៅពេលនេះតែម្ដង និងបានឃើញទិដ្ឋភាពជាក់ស្ដែងផ្ទាល់ភ្នែក ធ្វើឲ្យនាងសង្វេគចិត្តតែម្ដង។ វត្តនេះខ្សត់ខ្សោយស្រាប់ លុះមកដល់បច្ចុប្បន្ន ជាកាលៈទេសៈកូវីដ ១៩ រាតត្បាតទៀត រឹតតែខ្សត់ថែមទៀត។
ជាការពិត ដោយសារភ័យខ្លាច Covid-19 វត្តនេះ មិនមានឧបាសក ឧបាសិកាចំណុះជើងវត្តដាក់វេនទេ ទើបជាហេតុធ្វើឲ្យលោកខ្វះចង្ហាន់។ ជាក់ស្ដែងពេលដែលនាងទៅដល់ព្រឹកនេះ គឺព្រះសង្ឃ និងយាយជីតាជីផង ឆាន់ និងពិសាតែមីស្រុះម្នាក់១កញ្ចប់ប៉ុណ្ណោះ។
មាន សូនីតា និងម្ដាយបានទៅដល់វត្ត «ទួលមេត្រី» នៅព្រឹកនេះ ដោយមុនពេលទៅដល់ នាងបានជួបរឿងជាច្រើន ដោយសារតែនាងមិនបានស្គាល់ទីតាំងភូមិសាស្ត្រច្បាស់លាស់។ ដោយសារតែបែបនេះ នាងបានចំណាយពេលយ៉ាងច្រើន សួរនាំគេគ្រប់គ្នា ទម្រាំអាចតែអាចនាំផ្លូវម្ដាយ ទៅដល់វត្តគោលដៅបាន ដោយស្ទើរផុតចង្ហាន់លោកថែមទៀត។ នាងបន្តថា «ផ្លូវស្ទះ , អត់ស្គាល់វត្ត, ជិះដើររកវត្ត, វត្តនៅខេត្ត, តាមផ្លូវគេធ្វើតាំងពីភ្នំពេញដល់ខេត្ត ជិះមិនបានលឿន, ប៊ិះហួសចង្ហាន់លោក»។
មាន សូនីតា និងម្ដាយបានប្រគេនចង្ហាន់ និងគ្រឿងឧបភោគ បរិភោគមួយចំនួនជូនព្រះសង្ឃ ទុកដោះស្រាយការលំបាកនៅក្នុងកាលៈទេសៈដ៏លំបាកនេះ។ ជាមួយគ្នានេះ នាងបានអំពាវនាវដល់ពុទ្ធបរិស័ទទាំងឡាយ សូមទៅសាងកុសលជាមួយវត្តខាងលើឲ្យបាន តាមកម្លាំងសុទ្ធាជ្រះថ្លារៀងខ្លួនផងចុះ៕
