(ភ្នំពេញ)៖ ម្ដាយបង្កើតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន គឺអ្នកឧកញ៉ា ព្រឹទ្ធមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី បានទទួលមរណភាព នាថ្ងៃចន្ទ ១៣កើត ខែពិសាខ ឆ្នាំជូត ទោស័ក ព.ស.២៥៦៣ ត្រូវនឹងថ្ងៃទី០៤ ខែឧសភា ឆ្នាំ២០២០ វេលាម៉ោង ២៖១២នាទីទៀបភ្លឺ ដោយជរាពាធ ក្នុងជន្មាយុ៩៦ឆ្នាំ បានធ្វើឲ្យមហាជនគ្រប់ជាន់ថ្នាក់ បានសម្ដែងនូវក្ដីក្រៀមក្រំ សោកស្ដាយជាទីបំផុត ចំពោះការបាត់បង់នេះ។ ក្នុងនោះអ្នកសិល្បៈល្បីៗ ក៏បានសម្ដែងនូវការសោកស្ដាយ និងចូលរួមរំលែកទុក្ខ ចំពោះការបាត់បង់នេះ។
ក្នុងនោះសមាគមមិត្តសិល្បៈស្ម័គ្រចិត្តជួយសង្គម អ្នកនាង ចន ច័ន្ទលក្ខិណា បានបង្ហោះនូវសាររំលែកទុក្ខថា «នាងខ្ញុំ និងក្រុមគ្រួសារ សូមគោរពដ៏ខ្ពង់ខ្ពស់បំផុត ចូលរួមរំលែកទុក្ខដ៏មហាក្រៀមក្រំ សោកស្ដាយអាឡោះអាល័យយ៉ាងក្រៃលែង និងសូមបួងសួងវត្ថុស័ក្ដិសិទ្ធិក្នុងលោកប្រទានពរ ជូនវិញ្ញាណក្ខន្ធលោកយាយជាទីគោរព សូមទៅកាន់សុគតិភពកុំបីឃ្លៀងឃ្លាតឡើយ»។ ក្រៅពី អ្នកនាង ចន ច័ន្ទលក្ខិណា នៅមានអ្នកសិល្បៈល្បីៗជាច្រើនរូបទៀត មានដូចជា តារាសម្ដែង កញ្ញា នី មុន្នីនាថ, លោក គង់ វិសាល, តារាសម្ដែង កញ្ញា ហាស់ វីរ៉ាស្រីរ័ត្ន រួមមានតារាចម្រៀង និងសម្ដែងជាច្រើនរូបជាបន្តបន្ទាប់ទៀត។
គួរជម្រាបថា អ្នកឧកញ៉ា ព្រឹទ្ធមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី គឺជាម្ដាយបង្កើតរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងត្រូវជាម្ដាយក្មេករបស់ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានបូជានូវកម្លាំងកាយចិត្ត និងបញ្ញាញាណ ក្នុងការចិញ្ចឹមបីបាច់បុត្រធីតារបស់មហាឧបាសិកា ចាប់តាំងពីប្រសូត្រពីផ្ទៃរហូតធំដឹងក្តី រហូតមានកេរ្តិ៍ឈ្មោះបោះសម្លេងក្នុងសង្គម និងក្លាយជាគ្រួសារដែលប្រជាពលរដ្ឋកម្ពុជាទូទៅគោរពស្រឡាញ់ និងជាគ្រួសារមួយដែលតែងតែមានព្រហ្មវិហាធម៌ សណ្តោសប្រោះប្រណី ដល់មនុស្សផងទាំងពួង តាមរយៈកាយវិកា និងកិច្ចការមនុស្សធម៌ធ្វើបុណ្យចែកទាន និងកសាងនូវសមិទ្ធផលសង្គមជាច្រើន រាប់មិនអស់ ចាប់តាំងពីទីក្រុងរហូតដល់ទីជនបទ ឆ្ងាយដាច់ស្រយាល ដោយមិនប្រកាន់នូវវណ្ណៈ ពណ៌សម្បុរ និងនិន្នាការអ្វីទាំងអស់៕
