(ភ្នំពេញ)៖ ដើម្បីស្រាយចម្ងល់ និងមន្ទិលសង្ស័យរបស់មហាជនទូទៅ ជាពិសេសអ្នករស់នៅក្នុងមជ្ឈដ្ឋានសិល្បៈដូចគ្នា ចំពោះការបាត់បង់ជីវិត របស់តារាសម្ដែងល្បី ក្នុងទសវត្សរ៍ ៩០-២០០០ គឺអ្នកនាង ជុំ ចាន់តី ដែលបានស្ថិតក្នុងទីអាថ៌កំបាំង អស់រយៈពេលជាយូរមកហើយនោះ នៅគ្រានេះ តារាចម្រៀង អ្នកនាង ស៊ិន ឧត្តមផល្លា បានចេញមុខអះអាងជាថ្មីថា តារាសម្ដែង ជុំ ចាន់តី ពិតជាបានទទួលមរណភាព កាលពីជាង១០ឆ្នាំមុន ប្រាកដមែន ដោយការស្លាប់នោះ គឺស្ថិតនៅក្នុងប្រទេសកាណាដា។
តាមរយៈផេកហ្វេសប៊ុករបស់អ្នកនាង ស៊ិន ឧត្តមផល្លា មានឈ្មោះថា «Movie Star Research» បានបញ្ជាក់ថា «សម្រាប់បងប្អូនដែលចង់ដឹងអំពីដំណឹង តារាសម្ដែងផ្នែកមនោសញ្ចេតនា ជុំ ចាន់តី នាងពិតជាបានទទួលមរណភាព កាលពីជាង១០ឆ្នាំមុនយ៉ាងពិតប្រាកដមែន នាងស្លាប់នៅក្នុងប្រទេសកាណាដា ដោយដំណឹងនេះត្រូវបានផ្ដល់ដោយបងប្អូន ដែលចូលរួមខមមិននៅក្នុងការផុស កាលពីម្សិលមិញនេះ ០៧/០៥/២០២០»។
ការស្លាប់របស់តារាសម្ដែង អ្នកនាង ជុំ ចាន់តី ហាក់ស្ថិតនៅក្នុងភាពអាថ៌កំបាំងយូរណាស់មកហើយ ដោយអ្នកសិល្បៈ និងមហាជនខ្លះបានគិតថា នាងកំពុងមានជីវិតនៅឡើយ ហើយគិតថា ដំណឹងនៃការស្លាប់នេះ គឺគ្រាន់តែជាពាក្យចចាមអារ៉ាម និយាយតៗគ្នា ពីមាត់មួយទៅមាត់មួយប៉ុណ្ណោះ។ ដោយសារតែការសួរដេញដោល និងមិនអស់ចិត្តពីម្នាក់ទៅម្នាក់នេះហើយ ទើបអ្នកនាង ស៊ិន ឧត្តមផល្លា បានបង្ហាញរូបភាពតារាសម្ដែង ជុំ ចាន់តី ពីម្សិលមិញនេះ នៅក្នុងផេក ដើម្បីស្វែងរកការពិត តាមរយៈការខមិនចូលក្នុងផេករបស់អ្នកនាង ខណៈដែលអ្នកខមិនស្ទើរតែ១០០% បានបញ្ជាក់ថា តារាសម្ដែង ជុំ ចាន់តី ពិតជាបានស្លាប់មែន។
អ្នកនាង ស៊ិន ឧត្តមផល្លា បានបន្ថែមទៀតថា «យើងនៅចាំបានថា ជុំ ចាន់តី គឺជាតារាសម្ដែងផ្នែកមនោសញ្ចេតនា បានយ៉ាងស័ក្តិសម តាំងពីទសវត្សរ៍ ៩០-២០០០ នៅក្នុងបទចម្រៀងកាយវិការ ខារ៉ាអូខេ ស្ទើរតែគ្រប់ផលិតកម្ម និងសម្ដែងរឿងជាច្រើន ហើយរឿងដែលធ្វើឲ្យមហាជនស្គាល់នាងយ៉ាងច្បាស់ គឺរឿង «ទុំទាវ» ដោយនាងសម្ដែងជាតួ នាងនោ នៅក្នុងផលិតកម្ម SSB របស់លោក ហ្វៃ សំអាង»៕