(ភ្នំពេញ)៖ តារាចម្រៀង និងជាតារាសម្តែងស្រី កញ្ញា កែវ សុបញ្ញា ត្រូវបានទស្សនិកជនស្គាល់ច្រើន តាមរយៈចូលជាតារាចម្រៀងកុងត្រាក្នុងផលិតកម្មហង្សមាស។ ក្រៅពីមានទេពកោសល្យក្នុងវិស័យសិល្បៈហើយនោះ តារាស្រី កែវ សុបញ្ញា ថែមទាំងមានរូបសម្រស់ស្រស់សោភាថែមទៀតផង។ ទន្ទឹមគ្នានេះ សម្រាប់រឿងស្នេហាផ្ទាល់ខ្លួន កញ្ញា កែវ សុបញ្ញា ហាក់មិនមានភាពក្លាហានក្នុងការប្រាប់ទស្សនិកជនឡើយ ដោយគ្រាន់តែប្រាប់យ៉ាងខ្លីថា កំពុងមើលចិត្តគ្នាទៅវិញទៅមក។

កញ្ញា កែវ សុបញ្ញា ដែលជាតួអង្គនាង លំអង ក្នុងរឿង «រាជនីភូមិគ្រិះ» បានលើកឡើងបែបនេះ គឺតាមរយៈចូលរួមជាតារាកិត្តិយសក្នុងកម្មវិធី «អាថ៌កំបាំងក្រៅឆាក របស់តារា» របស់ទូរទស្សន៍ Fresh News។ កញ្ញា បានឲ្យដឹងថា បច្ចុប្បន្នអាយុរបស់នាងក៏ច្រើនដែរហើយ ដូច្នេះចំពោះរឿងស្នេហា គឺមិនអាចចេះតែគិតៗដូចក្មេងៗបែបយុវវ័យនោះឡើយ។ កញ្ញាថា ចំពោះរឿងនេះ គឺត្រូវតែជ្រើសរើសមនុស្សប្រុសដែលសមរម្យ ព្រោះយកច្បាស់លាស់ជាគូអនាគត។

និយាយដល់ចំណុចនេះ ពិធីករក្នុងកម្មវិធី «អាថ៌កំបាំងក្រៅឆាក របស់តារា» ក៏បានចោទសួរបន្ថែមពីបច្ចុប្បន្នភាពថាមានគូឬក៏អត់។ កែវ សុបញ្ញា ស្រាប់តែបង្ហើបយ៉ាងខ្លីថា មិនទាន់មាននោះទេ ហើយបច្ចុប្បន្ន គឺមើលឃើញគ្នាទៅវិញទៅមក មិនហ៊ានសារភាព ប៉ុន្តែស្ថិតក្នុងដំណាក់កាលមានចិត្តលើគ្នា។ តែយ៉ាងណា តារាស្រីរូបនេះ មិនហ៊ានបង្ហាញនោះទេ ថាមនុស្សប្រុសដែលនាងកំពុងមើលចិត្តថ្លើមនោះ ជាអ្នកក្នុងសង្គមសិល្បៈដូចគ្នាឬយ៉ាងណា។

ដោយឡែក ងាកមកជីវិតសិល្បៈវិញ ទន្ទឹមនឹងការវិវត្តន៍ខ្លួនជាបន្តបន្ទាប់ ពីតារាចម្រៀង ទៅជាតារាសម្តែងដ៏មានប្រជាប្រិយភាព កញ្ញា កែវ សុបញ្ញា កំពុងត្រូវបានទស្សនិកជនជាច្រើនគាំទ្រ និងមានបណ្តារក្នុងហ៊ុននានាមើលឃើញពីសមត្ថភាព។ កញ្ញាថា កន្លងទៅក៏មានអ្នកទាក់ទងឲ្យធ្វើជាតារាម៉ូដែលផងដែរ ប៉ុន្តែមិនទាន់សម្រេច។

គួរជម្រាបថា កញ្ញា កែវ សុបញ្ញា គឺជាតារាចម្រៀងមួយរូប ដែលធ្លាប់ជាបេក្ខនារីប្រឡង ក្នុងកម្មវិធីចម្រៀងលំបាក់ពិភពលោក «The Voice Cambodia» រដូវកាលទី១ រហូតបានក្លាយជាតារាពេញចិត្តក្នុងផលិតកម្មដ៏ធំរស្មីហង្សមាស។ ក្រោយមក នាងបានបញ្ចេញទេពកោសល្យពិសេសលើកដំបូង ដោយចូលរួមសម្តែងភាពយន្ត ជាតួអង្គកាចឆ្នាស់ ក្នុងរឿង «រាជនីភូមិគ្រិះ» យ៉ាងស័ក្តសមប្រៀបដូចតារាអាជីពតែម្តង៕