(ភ្នំពេញ)៖ កវីនិពន្ធបទចម្រៀងលោក យឹម តាស្រង់ កំពុងតែត្រៀមបញ្ចេញវត្តមានតារាចម្រៀងថ្មី ម្នាក់ទៀតប្រចាំក្នុងផលិតកម្ម Galaxy ដែលលោកទើបតែជ្រើសរើសបាន តាមរយៈការដាក់ពាក្យមកកាន់ផលិតកម្មផ្ទាល់ ហើយត្រូវបានលោកមើលឃើញថា មានសំឡេងល្អ អាចក្លាយជាតារាចម្រៀងអាជីព បន្ទាប់ពីឆ្លងកាត់ការហ្វឹកហាត់។

បទចម្រៀងដំបូងដែលលោក យឹម តាស្រង់ បាននិពន្ធ​ឲ្យច្រៀងដើម្បីសាកល្បងសមត្ថភាព លើតារាចម្រៀងថ្មីរូបនេះ គឺមានចំណងជើងថា «បបួលខ្លួនឯងឲ្យញញឹម» ដែលជាការនិពន្ធភ្លាមៗ ជូនដល់តារាចម្រៀងថ្មីមានឈ្មោះថា ឡា គាង ប៉ុន្តែលោកសុំមិនទាន់បញ្ចេញរូបរាង មុខមាត់ តារាថ្មីរូបនោះ ឲ្យមហាជនស្គាល់​នៅពេលនេះឡើយ។

លោក យឹម តាស្រង់ និយាយថា «មានបទចម្រៀងជាច្រើនមកហើយ ដែលខ្ញុំបាននិពន្ធ ហើយទទួលបានការគាំទ្រច្រើន តាមរយៈផលិតកម្ម Galaxy។ ដូច្នេះថ្ងៃនេះ ខ្ញុំសូមពាំនាំ​នូវអ្វីដែលថ្មីមួយទៀត ពាក់ព័ន្ធនឹង​បទចម្រៀង ហើយអ្នកចម្រៀងក៏ថ្មីសន្លាង មិនធ្លាប់កាន់ក្បាលមេក្រូទាល់តែសោះ កាលពីមុនមក ដែលខ្ញុំគិតថា អាចល្អប្រសើរនៅថ្ងៃខាងមុខ»។

លោកបានបញ្ជាក់ថា តារាចម្រៀង ឡា គាង គឺជាការជ្រើសរើសដោយរូបលោកផ្ទាល់ បន្ទាប់ពី​បានដាក់ពាក្យផ្ទាល់តាមរយៈផេក ហ្វេសប៊ុករបស់ផលិតកម្ម Galaxy ហើយលោក ក៏សូមទោសដល់បេក្ខជន-បេក្ខនារី ជាច្រើននាក់ទៀតផងដែរ ដែលមិនទាន់ត្រូវបានជ្រើសរើស ដើម្បីធ្វើតេស្ដសមត្ថភាព៕