(ភ្នំពេញ)៖ តារាសម្ដែងស្រី ច្រើនតែទទួលបានតំណែងជាតួអ្នកម្ដាយ តួជំទាវ និងតួបងស្រី គឺកញ្ញា ហេង ស្រីពេជ្រ បានសម្ដែងក្ដីបារម្ភកាន់តែខ្លាំង ខណៈដែលជនអនាមិកនៅតែបន្តយករូបថតនាង ទៅបង្កើតគណនីហ្វេសប៊ុក ក្លែងក្លាយ ដាក់ឈ្មោះផ្សេងៗគ្នាជាបន្តបន្ទាប់ ដោយមិនខ្លាចញញើត ហើយមិនដឹងថា ការធ្វើបែបនេះក្នុងចេតនាល្អ ឬអាក្រក់នោះមកលើរូបនាងឡើយ។
ហេង ស្រីពេជ្រ បានថ្លែងប្រាប់នៅថ្ងៃនេះថា ចាប់តាំងពីថ្ងៃទី៣ ខែមេសា រហូតមកដល់ពាក់កណ្ដាលខែឧសភា ឆ្នាំ២០២០ នេះ មានគណនីហ្វេសប៊ុកចំនួន១០ហើយ បានយករូបថតនាងទៅប្រើ ហើយមិនទាន់ដកចេញវិញនៅឡើយទេ។ ទោះជាយ៉ាងណានាងមិនហាមឃាត់ឡើយ ចំពោះអ្នកគាំទ្រដែលប្រើរូបនាង ក្នុងន័យគោរពស្រឡាញ់ ប៉ុន្តែនាងព្រួយបារម្ភខ្លាច មានជនខិលខូចយកវាទៅប្រើក្នុងទិសដៅផ្សេង ហើយប៉ះពាល់ធ្ងន់ធ្ងរដល់កិតិ្ដយសនាង និងសង្គម។
«គណនីពិតរបស់ខ្ញុំមានតែពីរទេបង ហើយមានតែការងារសិល្បៈ និងរកស៊ីផ្ទាល់ខ្លួន។ អ៊ីចឹងខ្ញុំមិនចង់ឃើញគេយករូបខ្ញុំទៅប្រើ ហើយប្រើក្នុងគោលបំណងមិនសមរម្យនោះទេ ព្រោះដល់ពេលគេរករឿងមករកខ្ញុំ ដែលជាម្ចាស់រូប គឺខ្ញុំមិនដឹងអីសោះ ខ្ញុំពិតជាពិបាកចិត្តណាស់បងអើយ...!»។ ស្រីពេជ្រ ថ្លែងបញ្ជាក់បន្ថែម។
តារាសម្ដែង ហេង ស្រីពេជ្រ ប៉ុន្មានថ្ងៃមកនេះ នាងពិតជាខ្វល់ខ្វាយណាស់ រហូតដេកមិនលក់បក់មិនល្ហើយ អារម្មណ៍របស់នាងមិនស្ងប់ ព្រោះតែរឿងគេយករូបថត ទៅបង្កើតគណនីហ្វេសប៊ុក ជាបន្តបន្ទាប់។ យ៉ាងណាមិញ ហេង ស្រីពេជ្រ បានព្រមានថា នឹងវែកញែករកខុសត្រូវតាមផ្លូវច្បាប់ ហើយនាងក៏បានត្រៀមខ្លួនរួចជាស្រេចដែរ ដើម្បីរកខុសត្រូវតាមផ្លូវច្បាប់បើគេមិនបញ្ឈប់ ព្រោះការដែលយករូបថតនាង ទៅដាក់ជា Profile facebook ដើម្បីប្រយោជន៍ផ្ទាល់ខ្លួន ឬប្រព្រឹត្តបទល្មើសអ្វីមួយ គឺនាំឲ្យប៉ះពាល់ដល់កិត្ដិយសនាងយ៉ាងធ្ងន់ធ្ងរ ក្នុងនាមជាតារាសម្ដែងល្បីឈ្មោះម្នាក់។
សូមបញ្ជាក់ថា តារាសម្ដែង ហេង ស្រីពេជ្រ បានបង្កើតគណនីហ្វេសប៊ុកឈ្មោះ Heng Sreypich នៅឆ្នាំ២០១៥ ហើយគណនីឈ្មោះ ហេង ស្រីពេជ្រ បានបង្កើតនៅឆ្នាំ២០១៦។ គណនីពិតទាំងពីររបស់នាងមានមិត្ត និងអ្នក Follow រាប់ម៉ឺននាក់ រហូតដល់អ្នកគាំទ្រខ្លះ បានយករូបថតនាងទៅប្រម៉ូដតាមហ្វេសប៊ុក ដើម្បីរកស៊ីទៀតផង៕
