(ក្រុងឡុងដ៍)៖​ យោងតាមការចេញផ្សាយដោយ Channel News Asia នាថ្ងៃទី៣០ ខែឧសភា ឆ្នាំ២០២០ បានឲ្យដឹងថា ប្រធានក្របខណ្ឌលីគបាល់ទាត់អង់គ្លេស Premier League បានលើកឡើងថា​ សម្រាប់ក្រុមអ្នកគាំទ្រអាចវិលចូលទស្សនាការប្រកួតបានឡើងវិញនៅរដូវកាល២០២០-២០២១ នៅពេលដែលវិបត្តិ COVID-19 ធ្លាក់ចុះដែលត្រូវធ្វើទៅដោយជាជំហានៗសិន។

លោក Richard Masters បានលើកឡើងកាលពីថ្ងៃសុក្រ ទី២៩ ខែឧសភា ថា​ ក្រុមអ្នកគាំទ្រអាចវិលចូលទស្សនាការប្រកួតវិញបានដោយធ្វើទៅតាមលក្ខណ:ជាជំហានៗ ខណៈការប្រកួតរដូវកាលឆ្នាំ២០១៩-២០២០នេះ​ គ្រោងចាប់ផ្តើមនៅថ្ងៃទី១៧ ខែមិថុនា ឆ្នាំ២០២០​ ពីការលេងបិទទ្វារកីឡដ្ឋានដែលស្របទៅតាមការការពារ COVID-19​ ឲ្យបន្តធ្លាក់ចុះ​ និងធានាសុខសុវត្ថិភាព។

គួរបញ្ជាក់ផងថា លីគកំពូល Premier League ក្នុងរដូវកាល២០១៩-២០២០ ត្រូវបានផ្អាកដោយវិបត្តិវីរុស COVID-19 តាំងពីខែមីនាមកម្ល៉េះ​ ដោយប្រកួតបានសប្តាហ៍ទី២៩ នៅសល់ ៩ប្រកួតត្រូវបញ្ចប់។

ហង្សក្រហម​ Liverpool រកបាន ៨២ពិន្ទុដែលជាលទ្ធផលខ្ពស់ក្នុងការលើកពានរង្វាន់នេះ តែលោកប្រធានលីគបានបន្តថា សម្រាប់គម្រោងបន្តឡើងវិញនេះគឺស្ថិតក្នុងការព្រួយបារម្ភជុំវិញរលកទី២ នៃ COVID-19 ដែលអាចធ្វើឲ្យការប្រកួតត្រូវបានផ្អាកម្តងទៀតក៏ថាបាន៕