(ញូយ៉ក)៖ ការឆ្លងរាតត្បាត COVID-19 ក្នុងរយៈពេល៣ខែកន្លងមកនេះ បានបង្កផលប៉ះអវិជ្ជមានយ៉ាងខ្លាំងដល់សេដ្ឋកិច្ច និងជីវិភាពរស់នៅរបស់ប្រជាជន នៅជុំវិញ ពិភពលោក ជាពិសេសគឺប្រជាជនអាមេរិកតែម្ដង ដែលរងគ្រោះធ្ងន់ធ្ងរជាងគេដោយសារតែជំងឺឆ្លងរាតត្បាតសកលមួយនេះ។ ប៉ុន្តែ COVID-19 មិនបានធ្វើឱ្យក្រុម មហាសេដ្ឋីអាមេរិកឈឺក្បាលវិលមុខនោះទេ ផ្ទុយទៅវិញ បែរជួយឱ្យពួកគេរកលុយបានរាប់រយពាន់លានដុល្លារ។ នេះបើតាមរបាយការណ៍ថ្មីមួយចេញផ្សាយដោយ សារព័ត៌មាន CNN នៅថ្ងៃសុក្រ ទី០៥ ខែមិថុនា ឆ្នាំ២០២០។
បើតាមរបាយការណ៍ថ្មីមួយ ចេញផ្សាយដោយវិទ្យាស្ថានសម្រាប់សិក្សាគោលនយោបាយ (Institute for Policy Studies) គិតចាប់តាំងពីថ្ងៃទី១៨ ខែមីនាមក មហាសេដ្ឋី ទាំងអស់ នៅក្នុងសហរដ្ឋអាមេរិក ប្រមូលបានប្រាក់សរុប ៥៦៥ពាន់លានដុល្លារ ពីអាជីវកម្មរបស់ពួកគេ ធ្វើឱ្យទ្រព្យសរុបរបស់ពួកគេកើនដល់ ៣.៥ទី្រលានដុល្លារ ឬកើន ឡើង១៩ភាគរយ ចាប់តាំងពីការចាប់ផ្ដើមឆ្លងរាតត្បាត COVID-19។ របាយការណ៍ដដែល ឱ្យដឹងទៀតថា គ្រាន់តែម្ចាស់ក្រុមហ៊ុន Amazon លោក Jeff Bezos តែម្នាក់ឯង ប៉ុណ្ណោះ អាចកើបលុយបានរហូតដល់ទៅ ៣៦.២ពាន់លានដុល្លារ ពោលគឺច្រើនជាងលុយដែលលោករកបានគិតត្រឹមថ្ងៃទី១៨ ខែមីនា។
ក៏ប៉ុន្តែ ចាប់តាំងពីថ្ងៃទី១៨ ខែមីនាមកដែរ ប្រជាជនអាមេរិកជិត ៤៣លាននាក់ បានដាក់ពាក់ស្នើសុំអត្ថាប្រយោជន៍គ្មានការងារធ្វើ ហើយអ្នកដែលរកបានចំណូលទាប ជាពិសេស អ្នកធ្វើការនៅក្នុងវិស័យទេសចរណ៍ និងសេវាកម្មបានរងផលប៉ះពាល់ធ្ងន់ធ្ងរជាងគេ ដោយសារ COVID-19។
គួរជម្រាបថា ក្រៅពីលោក Jeff Bezos, នាយកប្រតិបត្តិក្រុមហ៊ុន (CEO) Facebook លោក Mark Zuckerberg រកចំណូលបាន ៣០.១ពាន់លានដុល្លារ ខណៈមហាសេដ្ឋី ដទៃទៀតដូចជាម្ចាស់ក្រុមហ៊ុន Tesla និង Space X លោក Elon Musk, សហស្ថាបនិកក្រុមហ៊ុន Google លោក Sergey Brin និងលោក Larry Page រួមទាំងអតីតនាយកប្រតិបត្តិក្រុមហ៊ុន Microsoft លោក Steve Ballmer សុទ្ធតែរកបានចំណូលម្នាក់ ១៣ពាន់លានដុល្លារ ឬច្រើនជាងនេះ គិតចាប់តាំងពីថ្ងៃទី១៨ ខែមីនាដួចគ្នា៕