(សាន់ហ្រ្វាន់សុីស្កូ)៖ ក្រុមហ៊ុន Apple ទើបតែបានបង្ហាញខ្លួនប្រព័ន្ធប្រតិបត្តិការជំនាន់ចុងក្រោយសម្រាប់ iPhone គឺ iOS 14 ដោយក្នុងនោះផ្នែកទំព័រនៅ Home Screen ទទួលបានការអាប់ដេតធំជាងគេ។ នេះបើតាមការចេញផ្សាយដោយទីភ្នាក់ងារព័ត៌មាន ស៉ីនហួរ នៅថ្ងៃអង្គារ ទី២៣ ខែមីនា ឆ្នាំ២០២០។
iOS 14 បញ្ចូលនូវមុខងារថ្មីហៅថា «App Library» ដែលនឹងរៀបចំកម្មវិធី (App) នានានៅលើ iPhone ឲ្យមានរបៀបរៀបរយ ហើយ Widget ក៏ត្រូវបានរចនាឲ្យថ្មីសន្លាងស្អាតជាងមុនផងដែរ។ Widget នៅក្រោម iOS 14 បង្ហាញព័ត៌មានថ្មីៗទាន់ពេលវេលា ដោយគ្រាន់តែក្រឡេកមើលមួយភ្លែតប៉ុណ្ណោះ ហើយពួកវាអាចដាក់ឲ្យនៅជាប់នឹងទំព័រ Home Screen បាន តាមទំហំខុសៗគ្នា។ អ្នកប្រើប្រាស់ក៏អាចកំណត់ឲ្យ Widget ណាមួយដែលខ្លួនចង់បាន បង្ហាញវត្តមានលើអេក្រង់ តាមម៉ោង ទីកន្លែង និងសកម្មភាពផ្សេងៗបានផងដែរ។
សម្រាប់មុខងារថ្មី App Library នឹងធ្វើការរៀបចំដោយស្វ័យប្រវត្តិលើកម្មវិធី App ទាំងអស់របស់អ្នកប្រើប្រាស់ ឲ្យមានសណ្តាប់ធ្នាប់ ដោយកម្មវិធីទាំងនោះ ត្រូវបានបែងចែកតាមប្រភេទរបស់ពួកវា។ លើសពីនេះ អ្នកប្រើប្រាស់ក៏អាចជ្រើសរើសលាក់ទំព័រ Home Page ប៉ុន្មានក៏បានផងដែរ ដើម្បីអាចងាយអូសទៅដល់ App Library។ មុខងារដែលគួរឲ្យចាប់អារម្មណ៍មួយទៀតគឺ Picture-in-Picture ដែលអនុញ្ញាតឲ្យអ្នកប្រើប្រាស់ ប្រើកម្មវិធីផ្សេងៗទៀតបាន ពេលកំពុងទស្សនាវីដេអូ ឬនិយាយ FaceTime។
គួរជម្រាបថា នៅក្រោម iOS 14 គ្រប់ App ទាំងអស់ នឹងត្រូវសុំការអនុញ្ញាតពីអ្នកប្រើប្រាស់ជាមុនសិន មុនអាចតាមដាននិងប្រមូលទិន្នន័យពីអ្នកប្រើប្រាស់។ បើតាមក្រុមហ៊ុន Apple ប្រព័ន្ធប្រតិបត្តិការជំនាន់ថ្មីនេះ នឹងត្រូវបញ្ចេញឲ្យអ្នកប្រើប្រាស់អាចអាប់ដេតបាន នៅចន្លោះខែកញ្ញានិងខែធ្នូ ឆ្នាំ២០២០ សម្រាប់ iPhone ស៊េរីចាប់ពី 6s ឡើងទៅ។ iOS 14 ត្រូវ Apple បង្ហាញខ្លួនក្នុងព្រឹត្តិការណ៍ Worldwide Developers Conference (WWDC) ដែលបានចាប់ផ្តើមនាថ្ងៃចន្ទសប្តាហ៍នេះ ហើយនឹងបន្តរហូតដល់ថ្ងៃសុក្រ តាមអនឡាញ៕