(អាល្លឺម៉ង់)៖ ក្រុមហ៊ុនផលិតរថយន្ត Volkswagen និងក្រុមហ៊ុនផលិតសម្ភារៈកីឡា Puma និង Adidas នៅថ្ងៃអង្គារ ទី៣០ ខែមិថុនា បាន​ប្រកាសចូលរួមក្នុងយុទ្ធនាការធ្វើពហិកាផ្សាយពាណិជ្ជកម្មលើ Facebook ខណៈមកទល់ឥឡូវក្រុមហ៊ុនខ្ទង់២០០ហើយ បានចូលរួមក្នុង​​យុទ្ធនាការនេះ។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មាន AFP នៅថ្ងៃពុធ ទី០១ ខែកក្កដា ឆ្នាំ២០២០។

ក្រុមហ៊ុនយក្ស Volkswagen ដែលជាម្ចាស់ប្រេនរថយន្តមួយចំនួនទៀតដូចជា Audi, Porsche, និង Skoda បានប្រាប់ថា ខ្លួននឹងផ្អាកការ​ផ្សាយពាណិជ្ជកម្មនៅលើបណ្តាញទំនាក់ទំនងសង្គម Facebook ដើម្បីជាការប្រឆាំងនឹងសារញុះញង់អំពើហិង្សា ស្អប់ខ្ពើម រើសអើង និង​ផ្ទុកព័ត៌មានមិនពិត។ បើតាមក្រុមហ៊ុន Volkswagen ការអនុញ្ញាតឲ្យសារទាំងនេះ ត្រូវបង្ហោះនិងចែកចាយព្រោងព្រាតនៅលើ Facebook ដែលជាបណ្តាញសង្គមយក្សធំបំផុតលើលោក គឺត្រូវតែទទួលរងផលវិបាក។ ចំណែក ក្រុមហ៊ុន Puma និង Adidas ក៏បានប្រកាសដូចគ្នា​ដែរ។

គួរជម្រាបថា យុទ្ធនាការខាងលើបានចាប់ផ្តើមឡើង ក្រោយការស្លាប់របស់លោក George Floyd កាលពីថ្ងៃទី២៥ ខែឧសភា ហើយទទួល​បានការគាំទ្រជាខ្លាំង។ មកទល់ឥឡូវក្រុមហ៊ុនប្រហែល២០០ហើយ បានចូលរួមក្នុងយុទ្ធនាការនេះ រួមមានទាំងក្រុមហ៊ុនធំៗដូចជា Unilever, Starbucks, Coca-Cola និង Levi Strauss ជាដើម ខណៈ Facebook បានបាត់បង់តម្លៃទីផ្សាររាប់ពាន់លានដុល្លាររួចស្រេចទៅ​ហើយ ដោយសារតែយុទ្ធនាការហៅថា «Stop Hate for Profit»។ ជាការឆ្លើយតប Facebook ក៏បានប្រកាសពីចំណាត់ការមួយចំនួនថ្មី ដើម្បី​ទប់ស្កាត់សារស្អប់ខ្ពើម-រើសអើង និងព័ត៌មានមិនពិត៕