(បរទេស)៖ ការធ្វើដំណើរទេសចរណ៍តាមនាវា គឺជាវិស័យដែលមានការរីកដុះដាលខ្លាំងមួយ និងទទួលបានការគាំទ្រជាខ្លាំង។ ជាច្រើនឆ្នាំកន្លងមកនេះ នាវាទេសចរណ៍ធំៗ ត្រូវបានផលិតឡើងជាបន្តបន្ទាប់ ដែលរួមមាននូវកន្លែងកម្សាន្តផ្សេងៗយ៉ាងសម្បូរបែប នៅលើនោះផ្ទាល់ សម្រាប់ភ្ញៀវទេសចរ។ ប៉ុន្តែតើអ្នកមានដឹងទេថា បច្ចុប្បន្ននាវាទេសចរណ៍មួយណា ដែលត្រូវគេចាត់ទុកថា ជានាវាទេសចរណ៍ធំជាងគេបង្អស់?
១៖ «ស៉ីមហ្វូនី (Symphony)»
នាវា Symphony of the Seas គឺជារបស់ក្រុមហ៊ុន Royal Caribbean International ដែលបច្ចុប្បន្នវាត្រូវគេចាត់ទុកជា កប៉ាល់ទេសចរណ៍មានទំហំធំជាងគេបំផុតនៅលើពិភពលោក។ នាវាទេសចរណ៍ខ្នាតយក្សនេះ មានចំណុះ២២៨,០៨១តោន បណ្តោយប្រវែងជាង៣៦១ម៉ែត្រ និងទទឹងអតិបរមាជាង៦៥ម៉ែត្រ។ វាមានបន្ទប់ស្នាក់នៅចំនួន២,៧៥៩បន្ទប់ ហើយអាចឲ្យភ្ញៀវស្នាក់នៅបាន៥,៥១៨នាក់ និងអាចឡើងរហូតដល់៦,៦៨០នាក់ ជាចំនួនអតិបរមា។
កប៉ាល់ទេសចរណ៍ដ៏ធំបំផុតនៅលើពិភពលោកនេះ ត្រូវគេចាត់ទុកជា គោលដៅវិស្សមកាលដ៏អស្ចារ្យលក្ខណៈគ្រួសារ ដែលអាចផ្តល់នូវបទពិសោធន៍វិសេសវិសាលមិនអាចបំភ្លេចបាន។ វាត្រូវបានសាងសង់ឡើងនៅក្រុមហ៊ុនសង់ត្យេ ឌឺ ឡាត់ត្លង់ទិច (Chantiers de l'Atlantique/STX France) នៅប្រទេសបារាំង និងប្រគល់ឲ្យ Royal Caribbean កាលពីឆ្នាំ២០១៨។
២៖ «ហាម៉ូនី (Harmony)»
នាវាទេសចរណ៍ Harmony of the Seas ក៏ជាកម្មសិទ្ធិរបស់ក្រុមហ៊ុន Royal Caribbean ដែរ។ បច្ចុប្បន្នវាជាប់ចំណាត់ថ្នាក់ទី២ ក្នុងចំណោមនាវាទេសចរណ៍ ដែលមានទំហំធំជាងគេបំផុតក្នុងពិភពលោក។ Harmony ត្រូវបានសាងសង់ឡើងដោយក្រុមហ៊ុន STX France។ នាវានេះត្រូវបានប្រគល់ឲ្យក្រុមហ៊ុន Royal Caribbean កាលឆ្នាំ២០១៦ និងបានចេញដំណើរទេសចរណ៍លើកដំបូង កាលពី ឆ្នាំ២០១៩។
នាវានេះមានចំណុះ២២៦,៩៦៣តោន បណ្តោយប្រវែងជាង៣៦២ម៉ែត្រ និងទទឹងអតិបរមាជាង៦៥ម៉ែត្រ។ Harmony មានបន្ទប់ស្នាក់នៅចំនួន២,៧៤៧បន្ទប់ ហើយអាចឲ្យភ្ញៀវស្នាក់នៅបាន៥,៤៩៤នាក់ បើស្នាក់នៅក្នុងបន្ទប់មួយពីរនាក់ និងអាចឡើងរហូតដល់៦,៦៨៧នាក់ ជាចំនួនអតិបរមា បើគិតតែពីប្រវែងបណ្តោយគឺ Harmony វែងជាងគេបង្អស់។
៣៖ «អូអេស៉ីស (Oasis)»
Oasis of the Seas ក៏ជានាវាទេសចរណ៍របស់ក្រុមហ៊ុន Royal Caribbean ដែរ។ នាវាទេសចរណ៍ Oasis ត្រូវបានផលិតដោយក្រុមហ៊ុន STX Europe និងត្រូវបានប្រគល់ទៅឲ្យ Royal Caribbean កាលពីឆ្នាំ២០០៩។ នាវានេះមានចំណុះ២២៦,៨៣៨តោន បណ្តោយប្រវែង៣៦០ម៉ែត្រ ទទឹងអតិបរមាជាង៦០ម៉ែត្រ។ Oasis មានសមត្ថភាពអាចផ្ទុកអ្នកដំណើរបានចំនួន៥៤៨៤នាក់ ឬអាចរហូតដល់៦,៧៨០នាក់ ជាចំនួនអតិបរមា។
៤៖ «អាល័រ (Allure)»
Allure of the Seas គឺជានាវាទេសចរណ៍មួយផ្សេងទៀតរបស់ក្រុមហ៊ុន Royal Caribbean International ដែលជាប់ចំណាត់ថ្នាក់ទី៤ នៅក្នុងចំណោមនាវាទេសចរណ៍ ដែលមានទំហំធំជាងគេបំផុតក្នុងពិភពលោក។ វាត្រូវបានធ្វើការសាងសង់ឡើងដោយក្រុមហ៊ុន STX Europe នៅប្រទេសហ្វាំងឡង់។
នាវាទេសចរណ៍នេះ មានចំណុះ២២៥,២៨២តោន បណ្តោយប្រវែង៣៦០ម៉ែត្រ និងប្រវែងទទឹងអតិបរមាជាង៦០ម៉ែត្រ។ Allure ត្រូវបានប្រគល់ឲ្យក្រុមហ៊ុន Royal Caribbean International កាលពីឆ្នាំ២០១០។ នាវានេះមានបន្ទប់ស្នាក់នៅ២,៧៤២បន្ទប់ អាចទទួលភ្ញៀវបាន៥,៤៨៤នាក់ និងបានរហូតដល់ ៦,៧៨០នាក់ ជាចំនួនអតិបរមា។
៥៖ «កូស្តា ស្មឺរ៉ាល់ដា (Costa Smeralda)»
Costa Smeralda ជានាវាទេសចរណ៍របស់ក្រុមហ៊ុន Costa Cruises ដែលជាបុត្រសម្ព័ន្ធនៃក្រុមហ៊ុន Carnival Corporation។ វាត្រូវបានផលិតឡើងដោយក្រុមហ៊ុន Meyer Turku នៅប្រទេសហ្វាំងឡង់ ហើយបានប្រគល់ឲ្យ Costa Cruises នៅឆ្នាំ២០១៩។ នាវានេះមានចំណុះ១៨៥,០១០តោន បណ្តោយប្រវែង៣៣៧ម៉ែត្រ ទទឹង៤២ម៉ែត្រ ហើយមានបន្ទប់ស្នាក់នៅ២,៦១២បន្ទប់ អាចទទួលភ្ញៀវបានប្រមាណ៥,២២៤នាក់ និងបានរហូតដល់៦,៥៥៤នាក់ ជាចំនួនអតិបរមា។
៦៖ «អៃដាណូវ៉ា (AIDANova)»
នាវាទេសចរណ៍ AIDAnova ជាកម្មសិទ្ធិរបស់ក្រុមហ៊ុន AIDA Cruises ដែលជាបុត្រសម្ព័ន្ធរបស់ក្រុមហ៊ុន Carnival Corporation ។ វាជានាវាទេសចរណ៍ដំបូងបំផុត ដែលអាចដំណើរការដោយឧស្ម័នធម្មជាតិក្នុងទម្រង់រ៉ាវហៅថា LNG។ នាវាសមុទ្រ AIDANova ត្រូវបានផលិតឡើងដោយក្រុមហ៊ុន Meyer Werft នៅអាល្លឺម៉ង់ ហើយប្រគល់ឲ្យ AIDA Cruises កាលពីឆ្នាំ២០១៨។
នាវានេះមានចំណុះ១៨៣,៨៥៨តោន បណ្តោយប្រវែង៣៣៧ម៉ែត្រ និងទទឹង៤២ម៉ែត្រ។ វាមានបន្ទប់ស្នាក់នៅ២,៦២៦បន្ទប់ និងអាចទទួលភ្ញៀវបាន៥,២៥២នាក់ ហើយជាអតិបរមាបានរហូតដល់៦,៦៥៤នាក់ ។
៧៖ «ហ្គ្រេនឌីអូសា (Grandiosa)»
MSC Grandiosa ជានាវាទេសចរណ៍របស់ក្រុមហ៊ុន MSC Cruises។ នាវានេះមានចំណុះ១៨១,៥៤១តោន បណ្តោយប្រវែងជាង៣៣១ម៉ែត្រ និងទទឹង៤៣ម៉ែត្រ។ វាមានបន្ទប់ស្នាក់នៅ២,៦៣២បន្ទប់ អាចឲ្យភ្ញៀវស្នាក់នៅបាន៥,២៦៤នាក់ ហើយជាអតិបរមាបានរហូតដល់៦,៧៦១នាក់។ វាត្រូវបានផលិតឡើងដោយក្រុមហ៊ុន STX France និងប្រគល់ឲ្យ MSC Cruises កាលពីឆ្នាំ២០១៩។
៨៖ «ម៉ឺរ៉ាវីគលៀ (Meraviglia)»
MSC Meraviglia ក៏ជានាវាទេសចរណ៍របស់ក្រុមហ៊ុន MSC Cruises ដែរ។ នាវានេះមានចំណុះ១៧១,៥៩៨តោន បណ្តោយប្រវែងជិត៣១៦ម៉ែត្រ ទទឹង៤៣ម៉ែត្រ។ វាមានបន្ទប់ស្នាក់នៅ២,២៤៤បន្ទប់ អាចទទួលភ្ញៀវបាន៤,៤៨៨នាក់ និងជាអតិបរមារហូតដល់៥,៦៥៥នាក់។
MSC Meraviglia ត្រូវបានផលិតឡើងដោយក្រុមហ៊ុនសង់ត្យេ ឌឺ ឡាត់ត្លង់ទិច (Chantiers de l'Atlantique/STX France) និងត្រូវបានរចនាឡើងឲ្យអាចមានសមត្ថភាពដំណើរការបានគ្រប់រដូវកាលទាំងអស់។ នាវានេះត្រូវបានប្រគល់ឲ្យទៅ MSC Cruises កាលពីឆ្នាំ២០១៧ និង
ទទួលបានការពេញចិត្តជាខ្លាំងពីអតិថិជនក្នុងមជ្ឈដ្ឋានឧស្សាហកម្មទេសចរណ៍នេះ ព្រមទាំងទទួលបានពានរង្វាន់កិត្យានុភាពជាច្រើន។
៩៖ «បេលីស្ស៉ីម៉ា (Bellissima)»
MSC Bellissima ជានាវាទេសចរណ៍របស់ MSC Cruises ដដែល ដែលមានចំណុះ១៧១,៥៩៨តោន បណ្តោយប្រវែងជិត៣១៦ម៉ែត្រ និងទទឹង៤៣ម៉ែត្រ។ វាមានបន្ទប់ស្នាក់នៅ២,២១៧បន្ទប់ អាចទទួលភ្ញៀវបាន៤,៤៣៤នាក់ និងជាអតិបរមាបានរហូតដល់៥,៦៨៦នាក់។ MSC Meraviglia ត្រូវបានផលិតឡើងដោយក្រុមហ៊ុនសង់ត្យេ ឌឺ ឡាត់ត្លង់ទិច (Chantiers de l'Atlantique/STX France) និងប្រគល់ឲ្យទៅ MSC Cruises កាលពីឆ្នាំ២០១៩។
១០៖ «ស្ពិកទ្រោម (Spectrum)»
នៅចំណាត់ថ្នាក់ចុងក្រោយគេនេះ គឺ Spectrum of the Seas របស់ក្រុមហ៊ុន Royal Caribbean International។ វាត្រូវបានសាងសង់ឡើងដោយក្រុមហ៊ុន Meyer Werft នៅអាល្លឺម៉ង់ និងប្រគល់ឲ្យ Royal Caribbean កាលពីឆ្នាំ២០១៩។ នាវាទេសចរណ៍នេះ មានចំណុះប្រហែល១៦៩,៣៧៩តោន បណ្តោយប្រវែងជាង៣៤៧ម៉ែត្រ ទទឹងជិត៥០ម៉ែត្រ។ Spectrum មានបន្ទប់ស្នាក់នៅ២,១៣៧បន្ទប់ អាចទទួលភ្ញៀវឲ្យស្នាក់នៅ៤,២៤៦នាក់ និងជាអតិបរមាបានរហូតដល់៥,៦២២នាក់ ៕