(បរទេស)៖ ដូចដែលមនុស្សភាគច្រើនបានដឹងមកហើយថា លោក Elon Musk គឺជាមនុស្សដែលមានគំនិត និងការគិតខុសប្លែកពីអ្នកដទៃយ៉ាងខ្លាំង ប៉ុន្តែការគិតប្លែកពីអ្នកដទៃនេះហើយ ទោះធ្វើឱ្យលោកបានក្លាយជាកំពូលមហាសេដ្ឋីមួយរូបនៅសព្វថ្ងៃនេះ។

នៅថ្ងៃនេះ Fresh News Plus សូមលើកយកចំណុចអាថ៍កំបាំងមួយចំនួនទាក់ទងនឹងលោក Elon Musk មកបង្ហាញជូន៖

១៖ មានសញ្ជាតិ៣
លោក Elon Musk ធំដឹងក្ដីឡើងនៅអាហ្វ្រិកខាងត្បូង និងបានប្ដូរទៅរស់នៅប្រទេសកាណាដា ក្នុងអាយុ១៧ឆ្នាំ។ ក្រោយមកបានផ្លាស់ទៅសហរដ្ឋអាមេរិក ដើម្បីសិក្សានៅសកលវិទ្យាផ្នែកជំនួញ និងរួបវិទ្យា។

២៖ ចេះសរសេរកម្មវិធីកុំព្យូទ័រតាំងពីអាយុ៩ឆ្នាំ
យោងតាមកិច្ចសម្ភាសន៍មួយបានឱ្យដឹងថា លោក Elon Musk គឺជាមនុស្សចូលចិត្តសិក្សាផ្នែកកុំព្យូទ័រតាំងពីតូច ដោយនៅអាយុ ៩ឆ្នាំ លោកបាន បង្កើតហ្គេមមួយដែលមានឈ្មោះថា «Blastar» និង៣ឆ្នាំក្រោយមក លោកបានលក់ហ្គេមនោះទៅឱ្យទស្សនាវដ្ដីកុំព្យូទ័រមួយក្នុងតម្លៃ ៥០០ដុល្លារ អាមេរិក។

៣៖ រត់ចោលសាលាក្រោយចូលរៀនបាន២ថ្ងៃ
បន្ទាប់ពីទទួលបានបរិញ្ញាបត្រ២ នៅសកលវិទ្យា University of Pennsylvania លោក Elon Musk បានប្ដូរទៅរដ្ឋ California ដើម្បីសិក្សាផ្នែករូបវិទ្យា ប៉ុន្តែក្រោយពីចូលរៀនបាន២ថ្ងៃគត់ គាត់ក៏ព្យួរការសិក្សា ដោយមកបង្កើតក្រុមហ៊ុនផ្ទាល់ខ្លួន និងដំបូងរបស់លោកគឺ Zip2 Corporation។

៤៖ ជាអ្នកបំផុតគំនិតក្នុងការថតភាពយន្តរឿង Iron Man 2 (ឈុតខ្លះជាគំនិតរបស់គាត់)
ភាពយន្ត Super Hero ដែលមានចំណងជើងថា «Iron Man 2» មានឈុតខ្លះត្រូវបានថតនៅក្នុងក្រុមហ៊ុន SpaceX របស់លោក Elon Musk ដោយ ក្នុងនោះមានការប្រើប្រាស់បច្ចេកវិទ្យាមួយចំនួន ជាការផ្ដល់គំនិតពីលោកផ្ទាល់។ លោក Robert Downey Jr តួអង្គ Tony Stark ឬ Ironman ចង់ជួប លោក Elon Musk ដើម្បីពិភាក្សាគ្នារឿងថតភាគយន្តនេះផងដែរ។ ជាលទ្ធផល នៅក្នុងភាពយន្តរឿង «Iron Man 2» គឺមានវត្តមានរបស់លោក Musk ដែលបានចាប់ដៃជាមួយនឹង តួអង្គ Tony Stark។

៥៖ Musk គឺជាម្ចាស់រថយន្តក្នុងរឿង James Bond 007
រថយន្តរបស់តួអង្គ James Bond 007 ដែលបានជិះនៅក្នុងរឿង «The Spy Who Loved Me» កាលពីឆ្នាំ១៩៧០ គឺជាកម្មសិទ្ធិរបស់លោក Musk ហើយលោកក៏មានបំណងប្រែក្លាយរថយន្តនេះឱ្យដូចជាការពិតផងដែរ។

6៖ បើកក្លឹបកម្សាន្តនៅក្នុងផ្ទះជួល
នៅពេលដែលគាត់កំពុងសិក្សានៅសាកលវិទ្យាល័យ Pennsylvania។ Musk និងមិត្តរួមបន្ទប់បានសំរេចចិត្តគេចចេញពីលំនៅដ្ឋានរបស់និស្សិត ហើយមករស់នៅក្នុងផ្ទះធំមួយនៅខាងក្រៅបរិវេណសាលាវិញ ដែលជាផ្ទះជួល។ ដើម្បីរកប្រាក់សម្រាប់បង់ថ្លៃឈ្នួល Musk បានប្រែក្លាយផ្ទះជួលនោះ ទៅជាក្លឹបរាត្រីមួយដែលទាក់ទាញបានមនុស្សយ៉ាងច្រើន។

៧៖ រៀនបង្កើតគ្រាប់រ៉ូកែតតាំងពីក្មេង
«នៅពេលប៉ាម៉ាក់ខ្ញុំមិននៅផ្ទះ, អ្នកមីងដែលជាស្ត្រីមេផ្ទះបានតាមដានខ្ញុំចាប់ជានិច្ច ព្រោះថារាល់ពេលដែលគ្មានវត្តមានប៉ាម៉ាក់ គឺខ្ញុំតែងតែយកគ្រាប់ រ៉ូកែតដែលខ្ញុំបានបង្កើតវាដោយផ្ទាល់ដៃមកសាកល្បង»។ នេះជាសម្ដីរបស់លោក Musk ថ្លែងប្រាប់អ្នកសារព័ត៌មាន។ លោកបានបន្ថែមទៀតថា គ្រាប់រ៉ូកែតទាំងនោះ គឺខ្ញុំបង្កើតវាតាមរយៈការអានសៀវភៅ ហើយពេលសាកល្បងវាម្ដងៗ ដៃរបស់ខ្ញុំតែងតែរបួសជានិច្ច។

៨៖ ចំណាយតែ១ដុល្លារប៉ុណ្ណោះ ដើម្បីរស់ប្រចាំថ្ងៃ
កាលពីរស់នៅអាហ្វ្រិកខាងត្បួង Musk ចំណាយត្រឹមតែ ១ដុល្លារប៉ុណ្ណោះ ដើម្បីទិញ Hotdogs និងផ្លែក្រូច។ គោលបំណងរបស់គាត់គឺចង់សន្សំលុយ ដើម្បីទុករកស៊ី ខណៈដែល Hotdogs មួយគឺអាចអោយគាត់រស់បានមួយថ្ងៃ។

៩៖ អានសៀវភៅ១០ម៉ោងក្នុង១ថ្ងៃ
កាលពីអាយុ ៩ឆ្នាំ Musk ជាមនុស្សចូលចិត្តអានសៀវភៅបំផុត គាត់អានសៀវភៅស្ទើរតែគ្រប់មុខ ដោយមួយថ្ងៃគាត់ចំណាយពេល១០ម៉ោងដើម្បីអានសៀវភៅ។ សៀវភៅដែលគាត់អានភាគច្រើនជាសៀវភៅបែបវិទ្យាសាស្ត្រ និងសៀវភៅសម្រាប់មនុស្សពេញវ័យ ព្រោះប្រើការគិតខ្ពស់ ប៉ុន្តែ Musk ចូលចិត្តអានវាណាស់ និងអានចប់ច្រើនក្បាលទៀតផង។

១០៖ ចូលចិត្តនូវអ្វីដែលជាភាពអស្ចារ្យ
ជាទូទៅ Musk តែប្រាប់ទៅក្រុមការងារថា លោកចង់ធ្វើអ្វីដែលជាភាពអស្ចារ្យសម្រាប់មនុស្ស ដែលភាពអស្ចារ្យទាំងនោះគឺមនុស្សភាគច្រើនគិតនិងនឹកស្មានមិនដល់។ លោកតែងតែនិយាយថា «អាភាពអស្ចារ្យដែលលោកចង់បានហ្នឹងហើយ» គឺជំរុញឱ្យលោក និងក្រុមការងារ ក្លាយជាមហាសេដ្ឋី។

គួរបញ្ជាក់ផងដែរថា គិតត្រឹមពេលនេះ Elon Musk មានទ្រព្យសម្បត្តិគិតជាប្រាក់មានចំនួន ៦៩.៩ពាន់លានដុល្លារអាមេរិក (គិតត្រឹមថ្ងៃទី១៨ ខែកក្កដា ឆ្នាំ២០២០)៕