(ភ្នំពេញ)៖ មិនធ្វើឲ្យទស្សនិកជនរងចាំយូរឡើយ ពេលនេះផលិតកម្ម Galaxy Navatra បានបញ្ចេញ Full MV បទ ជាស្នាដៃនិពន្ធទំនុកច្រៀង ដោយលោកឧកញ៉ា ឡេង ណាវ៉ាត្រា មានចំណងជើងថា «សុំមួយពេលមក» បានជាផ្លូវការហើយ។ ក្រៅពីមហាជនចាប់អារម្មណ៍នូវទឹកដមសំនៀងរបស់តារាចម្រៀង តន់ ច័ន្ទសីម៉ា និង ខេម ដែលច្រៀងរួមគ្នាក្នុងបទនេះ ងាកមកការសម្តែង MV វិញគឺប្លែកភ្នែកតែម្តង។

ជាក់ស្តែងក្នុងចម្រៀងមួយបទនេះ តន់ ច័ន្ទសីម៉ា និង ខេម បានសម្តែងយ៉ាងស័ក្តសម លេងស្ទីលខ្លួនបែបយុវវ័យ ឌឺដង ផ្លែផ្កាគ្នាទៅវិញទៅមក លេងទឹកមុខបែបស៉ីអារម្មណ៍ ធ្វើឲ្យអ្នកទស្សនា MV នេះហើយ ជក់ចិត្តចង់មើលម្តងទៀត។ ចំណែកឯសំឡេងស្អកពីរោះស្រដៀងគ្នា របស់តារាប្រុសស្រីទាំងពីរ បូករួមទាំងរថយន្តសេរីទំនើប ដែលគេហៅថា រថយន្តស្ព័រ ចំនួនពីរគ្រឿង ដែលមានក្នុង MV នេះវិញ គឺកាន់តែជាការចាប់អារម្មណ៍មួយផ្នែកទៀត។

គួរជម្រាបថា បទ «សុំមួយពេលមក» គឺជាចម្រៀងថ្មីដំបូង ដែល ខេម បានចម្រៀងក្នុងផលិតកម្ម Galaxy Navatra ដោយចាប់ដៃគូជាមួយតារាស្រីកំពុងពេញនិយម តន់ ច័ន្ទសីម៉ា។ យ៉ាងណាមិញ មិនមែនមានតែចម្រៀងមួយបទនេះទេ ដែលអ្នកទាំងពីរបានចាប់ដៃគ្នាច្រៀង ពោលគឺមានជាច្រើនទៀត ដែលបាននឹងកំពុងទទួលការចាប់អារម្មណ៍ ពីមហាជនមានដូចជាបទ «កម្លាំងកាយក៏អស់ កម្លាំងចិត្តក៏អស់», បទ «ចង់សុំ Wifi» និង បទ «ការស្រឡាញ់ខ្វះជាតិស្ករ» ជាដើម៕