(មាឌ្រីដ)៖​ លោក​ Zidane បានបន្តឲ្យកីឡាករទាំងអស់សម្រាករហូតដល់ថ្ងៃអង្គារសប្តាហ៍ក្រោយ​ មុនការប្រកួតពានអឺរ៉ុប​ UEFA Champions League មកដល់ទល់នឹងក្រុមអង់គ្លេស ​Manchester City។

តាមរយ:ព័ត៌មានពីគេហទំព័រកីឡា​all football បានឲ្យដឹងថា Zidane បានសម្រេចផ្តល់ឲ្យក្រុមរបស់គាត់នូវថ្ងៃសម្រាកបន្ថែម​ទៀត​ មុនពេលការរៀបចំចាប់ផ្តើមប្រឈមមុខនឹងថ្ងៃចុងក្រោយនៃរដូវកាលមកដល់។ កីឡាករទាំងអស់នឹងត្រូវមកជុំគ្នានៅកីឡដ្ឋាន​ Valdebebas នៅថ្ងៃចន្ទ​ ដើម្បីឆ្លងកាត់ការធ្វើតេស្តមេរោគ​បន្ទាប់មកត្រូវរង់ចាំលទ្ធផលមុនពេលការហ្វឹកហាត់ចាប់ផ្តេីមឡេីងវិញ។

នេះមានន័យថា ​Real Madrid មានរយៈពេល១០ថ្ងៃ ដើម្បីត្រៀមសម្រាប់ការប្រកួតជើងទី២​វគ្គ១៦​ជាមួយក្រុម Manchester City។

ការប្រកួតគ្រោងនឹងធ្វើឡើងនៅថ្ងៃទី០៨​ខែសីហា​ក្នុងការប្រកួតបិទទ្វារកីឡដ្ឋាន ​Etihad។ Real នឹងអវត្តមានកីឡាករ​ Sergio Ramos ដែលត្រូវបានពិន័យកាតក្រហមកាលពីជេីងទី១​នៅទឹកដីអេស្ប៉ាញ​នៅពេលក្រុមលោក​ Zidane បានបរាជ័យក្នុងផ្ទះ​២-១៕