(ភ្នំពេញ)៖ មិនខុសពីតារាផ្សេងៗទៀតនោះទេ កញ្ញា សុខ ពិសី ក៏ជាតារាមួយដួងក្នុងដួងចិត្តយុវវ័យ និងជាគ្រាប់ពេជ្រនៃផលិតកម្មសាន់ដេ។ ក្រៅពីភាពល្បីល្បាញក្នុងវិស័យចម្រៀង កញ្ញា សុខ ពិសី ជាតារាដែលមានសម្រស់ស្រស់ស្អាតផងដែរ និងក៏មិនទាន់បានបញ្ជាក់ជាសាធារណះដោយផ្ទាល់ថា កញ្ញាមានគូស្នេហ៍ហើយនោះទេ។ ជាហេតុធ្វើឲ្យអ្នកគាំទ្រចង់ដឹងថា តើជីវិតស្នេហានិងការរស់នៅរបស់កញ្ញា សុខ ពិសី ពីមួយថ្ងៃទៅមួយថ្ងៃ មានការផ្លាស់ប្តូរដូចម្ត៉េចខ្លះ?
ខាងក្រោមនេះ Fresh News Plus សូមនាំយកព័ត៌មានខ្លះៗជុំវិញការចង់ដឹងនេះមកជូនប្រិយមិត្តអ្នកគាំទ្រ៖
* អំពីប្រវត្តិសង្ខេបនិងការសិក្សា
កញ្ញា សុខ ពិសី កើតនៅថ្ងៃទី១៩ ខែធ្នូ ឆ្នាំ១៩៩០ នៅក្រុងតាខ្មៅ ខេត្តកណ្ដាល។ ម្ដាយឈ្មោះ រស់ សុគន្ធារី។ មានបងប្អូនបីនាក់ (ប្រុស២ ស្រី១) ហើយនាងជាកូនទីពីរ។ សុខ ពិសី មានកម្ពស់១៦៦សង់ទីម៉ែត្រ និងមានទម្ងន់ជាមធ្យម៥០គីឡូក្រាម។ សុខ ពិសី បានបញ្ចប់ការសិក្សាថ្នាក់បាក់ឌុបក្នុងឆ្នាំ២០០៨។
* អំពីស្នាដៃក្នុងវិស័យសិល្បៈ
សុខ ពិសី មានចំណូលចិត្តចម្រៀងតាំងតែពីកុមារ ហើយដោយសារតែចង់ក្លាយជាតារាចម្រៀងនៅវ័យ១៧ឆ្នាំ យុវតី សុខ ពិសី ក៏បានចូលខ្លួនមកហាត់ច្រៀងនៅក្នុងក្លិបសិល្បៈមួយកន្លែងក្នុងក្រុងភ្នំពេញ។ ដោយមើលឃើញថានាងមានទេពកោសល្យល្អលើវិស័យនេះ កញ្ញា ពិសី បានឈានជើងចូលផលិតកម្ម KH ដែលជាផលិតកម្មទី១របស់កញ្ញានៅក្នុងឆ្នាំ២០០៥។
លុះនៅឆ្នាំ២០០៧ តារាចម្រៀងដែលមានឈ្មោះល្បីរួចជាស្រេចនៅ KH ក៏បានប្តូរទ្រនំទៅកាន់ផលិតកម្ម Nice Star ទាំងមិនទាន់បានបញ្ចប់កុងត្រាជាមួយផលិតកម្ម KH។ សុខ ពិសី បន្សល់នូវបទពិរោះៗជាច្រើនបទក្នុងផលិតកម្មដំបូងនេះ។
ដោយការព្យាយាម និងខំប្រឹងប្រែងលើវិស័យមួយនេះមិនរាថយនៅឆ្នាំ២០០៨ តារាចម្រៀង សុខ ពិសី ក៏បានក្លាយជាតារាចម្រៀងរបស់ផលិតកម្មសាន់ដេ រហូតមកដល់សព្វថ្ងៃនេះហើយកំពុងក្រសោបបានភាពល្បីល្បាញយ៉ាងខ្លាំងផងដែរ។ ពីមួយថ្ងៃទៅមួយថ្ងៃ ពីមួយឆ្នាំទៅមួយឆ្នាំ សុខ ពិសី បានបង្កើនទឹកដមសម្លេង និងធ្វើឲ្យតំលៃខ្លួនក្លាយជាគ្រាប់ពេជ្ររបស់ផលិតកម្ម សានដេ។
កញ្ញា សុខ ពិសី ជាតារាចម្រៀងមួយដួង ដែរបានឈរជើងលើផលិតកម្ម សាន់ដេនេះមិនដែលងាករេម្ដងណាឡើយ បានបន្សល់បទចម្រៀងពិរោះៗជាច្រើនបទ ដូចជា «សុខសប្បាយទេសង្សារចាស់» «លះបង់» «ស្នេហាខ្ញុំមានអ្នកទីបី» ជាពិសេស «យប់នេះខ្ញុំសេដ» «ផ្លូវកម្ម» «ខ្វេះភ្នែកអូនទៅ!» ជាដើម។ និងមានច្រៀងឆ្លើយឆ្លងជាមួយ នាយចើម លោក ខេមរៈ លោក ឆៃ វីរៈយុទ្ធ ជាច្រើនបទទៀត។
តាមការសង្គេត កញ្ញា សុខ ពីសី មិនមែនមានកេរ្តិ៍ឈ្មោះតែក្នុងប្រទេសប៉ុណ្ណោះទេ យើងនៅចាំបានថាកាលពីថ្ងៃទី១៣ ខែមីនា ឆ្នាំ២០១៧ កន្លងទៅកញ្ញា សុខ ពិសី បានទៅកាន់ប្រទេសជប៉ុន។ ការទៅកាន់ប្រទេសជប៉ុនជាង១០ថ្ងៃនោះ ជាការចេញទៅច្រៀងជូនសមាគមមួយនៅទីនោះ ដើម្បីប្រមូលយកថវិកាជូនមន្ទីរពេទ្យគន្ធបុប្ជា។ នេះបញ្ជាក់ថាកញ្ញាមានការទាក់ទាញនៅក្រៅប្រទេស និងមានការនិយមគាំទ្រលើតារាចម្រៀងរូបនេះជាខ្លាំងមិនអាចខ្វះបានដែរ។ ហើយជាទឹកចិត្តដ៏មានតំលៃមួយដែលរួមចំណែកក្នុងការលើកំពស់វិស័យមនុស្សធម៌។
ភាពជាក់ស្តែងនិងមិនអាចខ្វះបានខាងលើនេះហើយ ដែលមានក្រុមហ៊ុនផលិតផលលំដាប់ពិភពលោកនានា បានអញ្ជើញកញ្ញាជាតំណាងទូតសុច្ឆន្ទៈនៃផលិតផលរបស់គេ ដូចជាក្រុមហ៊ុនទូរស័ព្ទ Vivo, Lux, Fairly lovely, Kongfulong, Zorus Cambodia, Hanna body lotion ។ល។
* អំពីជំនួញក្រៅពីសិល្បៈ និងប្រាក់ចំណូល
ចំពោះរឿងជំនួញក្រៅពីវិស័យសិល្បៈ កញ្ញា សុខ ពិសី មានអាជីវកម្មលក់ផលិតផលតាមអនឡាញ Gimmick Collagen ដែលមានការចាប់អារម្មណ៍ខ្លាំងពី អ្នកនិយមផលិតផលនេះ និងទទួលបានការជាវយ៉ាងច្រើនពីអតិថិជន។ តាមការឲ្យដឹងវាជាផលិតផលដ៏ពេញនិយមរបស់តារានៅថៃ ហើយចំណែកនាងក៏ប្រើផលិតផលនេះដែរ ទើបធ្វើឲ្យរូបកញ្ញាមានរូបសម្រស់ស្អាតគួរជាទីស្រឡាញ់ពីបុរសៗ។
ដោយភាពល្បីក្នុងវិស័យសិល្បៈក៏ដូចជាសម្រស់គ្មានផ្ទឹមរបស់កញ្ញា សុខ ពិសី ធ្វើឲ្យមានការចាប់អារម្មណ៏ពីម្ចាស់ផលិតផលមួយចំនួន។ ក្នុងនោះ កញ្ញា សុខ ពិសី ត្រូវបានក្រុមហ៊ុនទូរស័ព្ទ Vivo, Lux, Fairly lovely, Kongfulong, Zorus Cambodia, Hanna body lotion អញ្ជើញជាទូតសុច្ឆន្ទៈ នៃក្រុមហ៊ុនប្រចាំប្រទេសកម្ពុជា ដែលមានតំលៃរាប់ម៉ឺនដុល្លារ។ ចំពោះការចេញសម្តែងក្នុងការប្រគំតន្ត្រីម្តងៗ មានពី៣០០០ដុល្លារទៅ ៤០០០ដុល្លារ។ ចំណែកការចូលរួមច្រៀងជាកិតិ្តយសក្នុងពិធីមង្គលការមានពី៣០០០ដុល្លារ ទៅ ៤០០០ដុល្លារជាដើម។
* អំពីទ្រព្យសម្បត្តិ
និយាយពីទ្រព្យសម្បត្តិរបស់កញ្ញា សុខ ពិសី យើងមិនអាចបែងចែកបានទេ ព្រោះថាកញ្ញាស្ថិតនៅក្រោមការរស់នៅ និងគ្រប់គ្រងរបស់ឪពុកជាមន្ត្រីយោធា ដែលមានផ្ទះចំនួន២កន្លែង នៅក្រុងតាខ្មៅ និងមួយនៅរាជធានីភ្នំពេញ ព្រមទាំងមានហាងមួយកន្លែងទៀត។ យានជំនិះផ្ទាល់ខ្លួនប្រចាំថ្ងៃនោះជាប្រភេទរថយន្តលុច្សស៊ីស៥៧០ ព្រមទាំងទ្រព្យសម្បត្តិដីធ្លីមួយចំនួន និងគ្រឿងអលង្កា និងមាសប្រាក់មានចំនួនទៀតផងដែរ។
* អំពីទម្លាប់ និងចំណង់ចំណូលចិត្ត
កញ្ញា សុខ ពិសី ទម្លាប់លេង Instagram (IG) ជាងលេង Facebook ដែល IG របស់នាងមានអ្នក Follower ប្រមាណជាជិត 700K ។ កញ្ញា សុខ ពិសី កម្រចេញក្រៅម្នាក់ឯងណាស់ លើកលែងតែចេញទៅសាលារៀន។ ពេលចេញក្រៅមានតែទៅកន្លែងថតចម្រៀង កម្មវិធីមិត្តភ័ក្រ ហើយនិយមបើកដោយឡានខ្លួនឯង។ កញ្ញាចូលចិត្តញាំទឹកគ្រឿង និងនំបញ្ចុកសម្លរខ្មែរ។ កញ្ញាមិននិយមញាំភេជ្ជៈមានជាតិស្រវឹង និយមញាំទឹកផ្លែឈើ និងទឹកសុទ្ធ។ និយមហាត់ប្រាណនៅផ្ទះដោយមាន ឧបករណ៍ហាត់ប្រាណផ្ទាល់។ ឯសម្លៀកបំពាក់សំដែងលើឆាកភាគច្រើនឆ្នៃដោយខ្លួនឯងមានជាងកាត់ដេរប្រចាំខ្លូន និងទិញតាមហាងម្តងម្កាល។
ចំណែកសម្លៀកបំពាក់ក្នុងសង្គមបែបប្រពៃណីទម្លាប់រើសក្រណាត់ និងចេញម៉ូដដោយកញ្ញាផ្ទាល់ និងកាត់ដេរដោយជាងប្រចាំខ្លួន។ និយមគ្រឿងអលង្កាមាសនិងពេជ្រ តែមិននិយមទំហំធំៗទេ។ ចូលចិត្តលេងសើចជាមួយក្រុមការងារ និងពេលចេញក្រៅតែងស្វាគមន៍អ្នកគាំទ្រជានិច្ច៕