(កូរ៉េ)៖ អ្នកគាំទ្រកំពុងរង់ចាំយ៉ាងអន្ទះសារ បន្ទាប់ពីក្រុមចម្រៀងនារីល្បីឈ្មោះ ក្នុងវិស័យ K-POP គឺ BLACKPINK បានប្រកាសថា នឹងបញ្ចេញអាល់ប៊ុមធំរបស់ខ្លួន នៅថ្ងៃទី០២ ខែតុលា ខាងមុខ ដែលត្រូវបានគេដឹងថា ជាអាល់ប៊ុមធំដំបូងបង្អស់របស់ក្រុម BLACKPINK ចាប់តាំងពីបង្កើតក្រុមក្នុងឆ្នាំ២០១៦មក។
YG Entertainment ដែលជាភ្នាក់ងាររបស់ BLACKPINK បានបញ្ចេញរូបភាពមួយសន្លឹក បង្ហាញពីមកុដពណ៌ផ្កាឈូក ចែងចាំងយ៉ាងទាក់ទាញ សម្រាប់អាល់ប៊ុមថ្មី ដែលគ្រោងបញ្ចេញនោះ។ ក្នុងឆ្នាំ២០២០ BLACKPINK នឹងកំណត់គោលដៅទៅកាន់ទីផ្សារពិភពលោក ជាមួយនឹងផែនការជាប្រព័ន្ធប្រកបដោយភាពហ្មត់ចត់ ខណៈពីមួយថ្ងៃទៅមួយថ្ងៃ ស្នាដៃរបស់ពួកគេកាន់តែមានភាពលេចធ្លោរជាសាលក។ នេះបើតាមសេចក្តីប្រកាសរបស់ YG។
បន្ថែមពីលើប្រជាប្រិយភាពរបស់ពួកគេ, BLACKPINK ក៏បានសហការច្រៀង ជាមួយកំពូលតារាចម្រៀងអាមេរិកល្បីៗដូចជា Lady Gaga ជាដើម។ ជាពិសេស ថ្មីៗនេះ BLACKPINK កំពុងសហការជាមួយតារាអាមេរិកផ្សេងទៀត ប៉ុន្តែមិនទាន់ទម្លាយប្រាប់អ្នកគាំទ្រថា ជាតារារូបណាឡើយ អ្នកខ្លះទាយថា Ariana Grande អ្នកខ្លះថា Selena Gomez និងអ្នកខ្លះទៀតថា Taylor Swift។
គួរជម្រាបថា ក្រុម BLACKPINK ត្រូវបានបង្កើតឡើងក្នុងឆ្នាំ២០១៦ ជាមួយសមាជិកនារី៤នាក់ ដូចជា Jennie, Lisa, Rosé និង Jisoo៕