(ភ្នំពេញ)៖ សំណុំរឿងទម្លាយរូបអាក្រាតកាយ របស់អតីតតារាចម្រៀងប្រចាំផលិតកម្ម ភ្លេងរីខត កញ្ញា វ៉ាន់ នីឡា ដែលបានទន្ទឹងរង់ចាំយុត្តិធម៌ អស់រយៈពេលជាង៤ឆ្នាំមកហើយនោះ នៅថ្ងៃ៣១ ខែកក្កដា ឆ្នាំ២០២០ស្អែកនេះ ត្រូវបានព្រះរាជអាជ្ញានៃមហាអយ្យការអមសាលាឧទ្ធរណ៍កោះហៅ ដើម្បីចូលទៅក្នុងសវនាការជុំនំជំរះសារជាថ្មី បន្ទាប់ពីសំណុំរឿងនេះ ត្រូវបានបង្វិលពីតុលាការកំពូល មកឲ្យសាលាឧទ្ធរណ៍ ដើម្បីធ្វើការស៊ើបអង្កេត និងជំនុំជំរះសារជាថ្មី។
យោងតាមដីកាកោះហៅ ដែល Fresh News Plus ទទួលបាននៅថ្ងៃទី៣០ ខែកក្កដា ឆ្នាំ២០២០ បានបញ្ជាក់ថា លោក អ៊ឹម សុផាន ព្រះរាជអាជ្ញា នៃមហាអយ្យការអមសាលាឧទ្ធរណ៍ បានបង្គាប់អញ្ជើញឈ្មោះ សុខ ចិន្តា (តារាចម្រៀង វ៉ាន់ នីឡា) ភេទស្រី អាយុ២៥ឆ្នាំ មានអាសយដ្ឋានបច្ចុប្បន្នផ្ទះលេខ B១ ផ្លូវប៉េតុង ភូមិបឹងឈូក សង្កាត់ឫស្សីកែវ រាជធានីភ្នំពេញ ឲ្យចូលខ្លួនមកសាលាឧទ្ធរណ៍ភ្នំពេញ នៅថ្ងៃទី៣១ ខែកក្កដា ឆ្នាំ២០២០ ដើម្បីចូលរួមសវនាការជំនុំជំរះ លើជនជាប់ចោទឈ្មោះ គុយ សិទ្ធិសក្ដិ ភេទប្រុស អាយុ២៧ឆ្នាំ ពីបទហិង្សាដោយចេតនា និងចែកចាយរូបអាសអាភាស ប្រព្រឹត្តិនៅរាជធានីភ្នំពេញ កាលពីអំឡុងឆ្នាំ២០១៦។
ដោយឡែក លោក សុខ ជំនោរ ជាបងប្រុសបង្កើតរបស់ វ៉ាន់ នីឡា ក៏បានថ្លែងប្រាប់ Fresh News Plus ឲ្យដឹងនៅថ្ងៃនេះថា លោកពិតជាបានទទួលដីកាកោះ ឲ្យចូលទៅកាន់សវនាការសាលាឧទ្ធរណ៍ នៅថ្ងៃស្អែកនេះពិតមែន ប៉ុន្តែនៅថ្ងៃ៣០ ខែកក្កដា នេះ រូបលោក និងប្អូនស្រី បានជួបពិភាក្សាគ្នាជាមួយមេធាវី និងបានត្រៀមនូវឯកសារ ភស្តុតាង ដើម្បីដាក់បន្ទុកបន្ថែម បន្ទាប់ពីសាលាដំបូងរាជធានីភ្នំពេញ បានចេញសាលក្រមកាត់ទោស ទៅលើឈ្មោះ គុយ សិទ្ធិសក្ដិ រួចមកហើយ កាលពីឆ្នាំ២០១៧។
លោកបន្តទៀតថា សំណុំរឿងដែលមានរយៈពេលជាង៤ឆ្នាំមកហើយនេះ នឹងរំពឹងថា ទទួលបាននូវយុត្តិធម៌ ព្រោះលោកយល់ឃើញថា បច្ចុប្បន្ននេះ ប្រព័ន្ធយុត្តិធម៌សម្រាប់ជនស្លូតត្រង់នៅកម្ពុជា មានការកែទម្រង់ស៊ីជម្រៅ គួរឲ្យកត់សម្គាល់។ ជាពិសេស សំណុំរឿងរបស់ប្អូនស្រីលោក លោកបានត្រៀមឯកសារជាច្រើន ដើម្បីយកទៅដាក់បន្ទុកបន្ថែមនៅសាលាឧទ្ធរណ៍ ហើយលោករំពឹងថា តុលាការនិងពិចារណា ផ្តល់យុត្តិធម៌ជូនដល់ជនរងគ្រោះ។
សូមបញ្ជាក់ថា រឿងក្តីជនជាប់ចោទ គុយ សិទ្ធិសក្តិ កូនប្រុសលោក គុយ ប៊ុនសន អតីតអគ្គនាយកនៃអគ្គនាយកដ្ឋានពន្ធនាគារ ជាមួយកញ្ញា សុខ ចិន្ដា ហៅ វ៉ាន់ នីឡា ពាក់ព័ន្ធការប្រើហិង្សា និងបង្ហោះរូបភាពអាក្រាតនោះ ត្រូវបានសាលាដំបូងរាជធានីភ្នំពេញ ប្រកាសសាលក្រមហើយ កាលពីរសៀលថ្ងៃទី១៥ ខែសីហា ឆ្នាំ២០១៧ ដោយផ្តន្ទាទោសជនជាប់ចោទ ដាក់ពន្ធនាគាររយៈពេល១ឆ្នាំ និងបង្គាប់ឲ្យសងសំណងជំងឺចិត្ត ដល់ដើមបណ្ដឹងចំនួន២០០លានរៀល។
នៅក្នុងការប្រកាសសាលក្រមនេះ គេពុំបានឮលោក កោ វណ្ឌី អនុប្រធានសាលាដំបូងរាជធានីភ្នំពេញ ប្រកាសចេញដីកាបង្គាប់ឲ្យចាប់ខ្លួន ជនជាប់ចោទ គុយ សិទ្ធិសក្តិ ទេ (ពុំមានចេញដីកាបង្គាប់ឲ្យចាប់ខ្លួនទេ) តែបើកផ្លូវឲ្យជនជាប់ចោទ ប្តឹងឧទ្ធរណ៍តាមកំណត់ច្បាប់។
ជនជាប់ចោទ គុយ សិទ្ធិសក្តិ ត្រូវបានចោទប្រកាន់ពីបទ «ហិង្សាដោយចេតនា និងចែកចាយរូបភាពអាសអាភាស» ប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០១៦ តាមមាត្រា២១៧ នៃក្រមព្រហ្មទណ្ឌ និងមាត្រា៣៨ និងមាត្រា៣៩ ច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។
អតីតសង្សារ របស់តារាចម្រៀងស្រី កញ្ញា វ៉ាន់ នីឡា គឺលោក គុយ សិទ្ធិសក្តិ ត្រូវបានគេស្គាល់គ្រប់គ្នាថា ជាមន្ត្រីប៉ូលីសពាក់សក្តិ៤កន្លះ បម្រើការងារនៅអគ្គនាយកដ្ឋានពន្ធនាគារ ក្រសួងមហាផ្ទៃ និងត្រូវជាកូនប្រុសរបស់លោកឧត្តមសេនីយ៍ គុយ ប៊ុនសន អតីតអគ្គនាយកនៃអគ្គនាយកដ្ឋានពន្ធនាគារ នៃក្រសួងមហាផ្ទៃ៕